Tsunami at sashimi

NOONG Biyernes, sa gitna ng panonood sa telebisyon ng kagitla-gitlang kaganapan sa Japan, ay nakatanggap ako ng text message mula sa isang dating kasama sa Manila Times, na nag-iskedyul ng reunion sa susunod na buwan.

“Fort, baka hindi na tuloy ang reunion,” sabi ni Cora Lucas, isa sa mga hinahangaan kong feature writer. “Mag-end of the world na yata. Baka sa heaven na reunion natin.”

Nag-isip tuloy ako. End of the world na nga kaya? Kabibili ko pa naman ng lote.

Pero madali kong ibinalik ang aking katinuan. Sinagot ko ang text ni Cora: “Hindi naman siguro. Tuloy pa rin. Wala nga lang Japanese food.”

Sa totoo lang, talagang babaliktad ang sikmura at mawawalan ng gana ang sinumang makapapanood sa televised coverage ng trahedya sa kapit-bahay nating bansa.

Imadyinin mo ang iyong sarili na nasa loob ng iyong bahay nang bigla na lamang na tumambad sa harapan mo ang isang tila solidong pader na tubig-dagat na mahigit sa 30 talampakan ang taas at may palapit sa iyo sa bilis na parang isang jet plane.

Kahit malayo ang kamera mula sa himpapawid na nagko-cover sa kagila-gilalas na pangyayaring ito ay makikita mo ang tulin ng nangangalit na tubig-dagat, nilalamon ang lahat ng istraktura at kung anu-ano pa – mga bahay, factory, gusali, kotse, bangka, etc. – na minalas na napuwesto sa landas nito.

Sa gilid ng screen ay makikita ang pag-aapoy ng ilang building sa gitna ng tubig. Ano ito?

Laking pagkabahala ang naramdaman namin na nanonood sa newsroom matapos mapag-alaman na ang mga ito ay mga nuclear power plant. Dalawa o tatlong planta ang nasalanta na rin ng tsunami, ang pinakamatindi at pinakamapanira ayon sa mga matatandang Hapones.

Hindi maiwasang pumasok sa utak ko ang Chernobyl tragedy sa Ukraine, na noon ay bahagi ng Soviet Union. Ang trahedya ang tinuturing na “worst nuclear power plant accident in history.”

Noong Abril 26, 1986 ay sumabog ang nuclear reactor ng planta ng Chernobyl at ang buong mundo ay naapektuhan.

Dahil sa tubig at hangin na nagkalat ang kontaminasyon, buong Europa ang naapektuhan. At hindi lamang sa nasabing kontinente kundi sa iba pang parte ng mundo.

Kahit ang industriya ng bakahan ng Europa ay lubhang naapektuhan. Kinailangang higpitan ang pag-aangkat ng mga produkto tulad ng gatas at keso dahil sa nakontamina ang mga damuhan ng mga bansa sa kontinente.

Kinakain kasi ng mga baka ang mga damong na-contaminate ng sumabog na Chernobyl nuclear power plant at ito ang nakasasamang elementong ito rin ang lumalabas sa mga nasabing hayop.

Ganito rin kaya ang mangyayari sa pagkasira ng mga nuclear power plant ng Japan?

Tikom pa rin ang bibig ng mga awtoridad sa Japan kung ano ang tunay na nangyari sa mga planta at kung ito ba ay “Chernobyl tragedy” ng ating panahon. Ipanalangin nating huwag naman sana.

Hindi pa natin alam kung ang mga pagkaing nagmumula sa kalupaan at karagatan (halimbawa ay mga isdang ginagawang sashimi) ay ligtas kainin.

Sana ay malinawan ng buong mundo ang tunay na larawan. Kasi malapit na ang reunion ng Manila Times. Sayang kung walang Japanese food. Fort Nicolas

loading...

About Gwenn

You must be logged in to post a comment Login

Leave a Reply