Tawak

INILULUWAL na tila sanggol sa sinapupunan ng gawi at gawa ang mga salita. Sa pagkabihasa sa samut-saring gawi’t gawa isinusupling ang dagdag pang mga kataga.

Salita. Hindi magagap o maabot ng unawa ng sinuman na tiwalag o banyaga sa mga gawi at gawa na nagsilang, humubog, nag-aruga… nagyaman sa kahulugan ng salita.

Lagi’t lagi na gawi’t gawa ang gulugod na magbabangon sa salita. Nauna ang gawa bago sumalin sa diwa ang pandiwa. Verbs (pandiwa or pan deva, referring to the omnipresent deity or spirit) are action words that denote divine origins… actions speak louder than words… because words come from palpable acts.

Malay ko kung masusundan pa ‘to ng anak ko.

Nananalig siya sa bawat isaad ko hinggil sa gamit ng wika. Mapalad siya na napabilang sa mga nagsusulat ng ‘Amaya.’ Amaya. That word is so Sanskrit, it breathes of illusion, make-believe.

‘Tawak’ ang tawag sa isinilang na may kakambal na ahas. Malalim na pagturol kay Lilith… na kalaguyo ng apoy, ng anghel na itinakwil ng Maykapal, ng babaeng mapanghimagsik at maghahasik ng ligalig. ‘Yun ang talagang katuturan ng ‘Amaya.’

Walang pili sa daloy ng sandali ang pagtawag sa ‘kin ng anak. Sasangguni. Karaniwang ukol sa paghabi ng mga pangungusap. ‘Yung walang hibo ni bahid ng Español… ‘yung wagas na paghahayag ng nilalaman ng diwa’t dibdib mula sa ubod at buod ng mga gawi at gawa.

Umabot lang sa may 88 ang naitala ko noon… iba’t ibang galaw na buhat sa kamay… bawat isa’y pandiwa… bawat isa ay kilos o kislot, gawi o gawa.

Out and out body English (in Tagalog) was what I plied. A list of moves the hand can do88 moves…. 88… I need not tell the wealth of moves my hands can do…

Hindi pa kabilang ang mga haplit at hagupit mula sa tinatawag na “Kamay ng Demonyo.”

Ulitin natin. Hindi magagap o maabot ng unawa ng sinuman na tiwalag o banyaga sa mga gawi at gawa na nagsilang, humubog, nag-aruga… nagyaman, nagpayabong, nagpayamungmong sa kahulugan ng salita.

Hangad po ng pitak na ito ng mas marami pang ‘Amaya.’ Hindi po ito panoorin lang. Pagtatangka po ito na sinupin ang ating wika na walang pangiming binababoy ng broadcast media, lalo na ng kung sinu-sinong kupal sa larangan ng pelikula.

loading...

About Gwenn

You must be logged in to post a comment Login