Balatan nang buhay ang mga nagsasamantala

TUMITINDIG ang ating balahibo sa napakasamang epekto ng mga bagyong Pedring at Quiel.

Sino ang hindi titindigan ng balahibo sa tagal ng pananahanan ng libo-libong pamilya sa ibabaw ng mga bubong ng bahay dahil sa baha?

Sino ang hindi magkakaroon ng takot sa buhay sa pagkakaroon ng palaman sa sikmura na gutom?

At sino ang hindi kikilabutan sa hindi pagpapakita ng mga pinuno ng bansa habang puno ng lagim ang buhay ng milyon-milyong mamamayan?

Pero andiyan na yan at nangyari na.

Kahit papaano, may mga nagpapakita na sa mga ito sa gitna ng mga mamamayang hindi pala mga Boss ng nakararaming mga Herodes sa gobyerno.

TUBIG NAGMAHAL

Anak ng limang putakte, may nagsamantala nang todo sa mga biktima.

Akalain mong ang P30 na isang container ng tubig ay naging P140-P150 bawat isa.

Nawalan na nga ng pambili ang mga biktima dahil sa mapaminsalang mga bagyo at baha, naisip pa ng mga negosyante ang magsamantala.

Mas masahol pa ang mga animal na ito sa mga kompanya ng langis sa pandaraya.

Tubig-inumin na nga lang ang ginagawang pampalaman sa tiyan ng mga walang makain pero sinasamantala pa ang mga ito.

MAY AMOY ANG NFA RICE

Sinasabi ng gobyerno, lalo na ang mga taga-National Food Authority at Department of Agriculture na may sapat na bigas sa mga lugar ng mga nasalanta.

May bigas para sa lahat ng nangangailangan, sabi nila.

Pero hindi tayo nakasisiguro, mga Bro, dahil tiyak na may dalawang pabigat na magaganap sa mga susunod na araw.

Ang pagtataas ng presyo nito at pagtatago ng mga hayup na negosyante ng bigas ng suplay.

Bakit sinasabi natin ito?

Aba, ang inilalabas ng NFA na bigas ay may amoy at hindi basta nakapapasok sa sikmura ng mamamayan.

Kung papasok man, mga Bro, mababaw at sinisikmura ang mga biktima.

Nabubuhay na nga sa gutom ang mga tao, hindi pa sila makakain nang maayos.

Sa pangyayaring ito, maghahanap ang mga tao ng mas magandang bigas pero hindi sila gaanong makakita at makabibili ng mga magagandang bigas.

Yun ay kung may pambili sila.

RICE HOARDER

Mismong ang mga nasa gobyerno ang nagsimula nang mangamba na may makaiisip sa mga negosyante ng bigas na magtatago ng kanilang mga panindang bigas.

Kung kokontrolin umano nila ang mga rice trader, baka wala umanong magtinda.

At lalong maging kawawa ang mamamayan.

Naganap na ito umano sa mga nakaraang kalamidad at ayaw nilang maulit na mawalan o kulangin ng suplay ng bigas ang mga pamilihan.

Dito magaganap ang rice shortage, mga Bro.

Lalo na kung iisipin na hindi naman talaga sapat ang NFA rice na ibinibigay ng pamahalaan.

Karanasan na ito, mga Bro, sa mga nakaraang panahon at hindi basta mababago ito kahit ng mga nasa matuwid na daan.

DOBLE PRESYO NA ANG GULAY

Sa ulat sa atin, doble at higit pa rito ang presyo ng mga gulay na ibinebenta sa mga pamilihan.

Nagaganap ito sa mga pamilihang bayan sa Metro Manila.

Hindi malayong ganito rin ang magaganap sa mga lalawigang sinasalanta ng mga baha sa mga araw na ito.

Kung dumating ang mga gulay sa mga tindahan ng mga nasalanta, lalong mamamatay sa gutom ang mga biktima.

Hindi naman pupuwedeng kanin o lugar o noodles lang ang ipapalaman sa sikmura ng mga biktima.

Kailangan nila ang gulay hindi lang upang sila’y mabusog kundi magkaroon ng lakas ng katawan na lumaban sa mga sakit at impeksyon.

IMPEKSYON, SAKIT KAKALAT

Dahil sa naghalong mga echas ng tao at hayop, kemikal mula sa mga pabrika, dumi mula sa mga insecticide, polusyon mula sa mga  makina at sasakyan, walang masasagap ang mga biktima ng baha kundi sakit at impeksyon.

Dito kailangan ang pagkain at mainam na maghalo ang bigas at gulay bilang panlaban sa mga sumpang ito na dulot ng baha.

MANDARAYA LABANAN

Dapat na labanan ang kalamidad, lalo na ang mga mandaraya sa mga pangunahing pangangailangan ng mamamayan.

Itong mga nagtitinda ng tubig, kung maaari, ay lunurin na lang sa baha.

Dalhin sila sa mga bumabaho nang tubig sa Hagonoy at Marilao, Bulacan para sila ilublob nang buhay.

Itong mga taga-NFA at DA, hindi dapat na magpasindak sa mga rice trader na walang gusto kundi magtago ng mga magagandang bigas at saka na lang magtitinda kung abot-langit na ang presyo ng bigas.

Itong mga nagtitinda ng gulay, dapat ding madisiplina sa sobrang pagpapamahal ng paninda ng mga ito.

BALATAN SILA NANG BUHAY

Kung magpapatuloy ang mga gago at gagang negosyante sa pagsasamantala, dapat na silang balatan nang buhay.

Walang puwang sa ating lipunan ang naglalagay ng malaking tipak na bato sa leeg ng mamamayang labis nang naghihirap sa kalamidad EVAT alisin na!

Yang EVAT sa mga toll, pupuwede bang alisin na! Ito ang ginagawang dahilan kung bakit nagmamahal na ngayon maging ang pagde-deliver ng relief goods!

oOo

Anomang reklamo o puna ay maaaring iparating sa programang Power Point ng RHTV o DZRH 666khz AM tuwing Sabado 3 to 4 PM o i-text sa 09214303333.

loading...

About Gwenn

You must be logged in to post a comment Login

Leave a Reply