Kalait-lait sa classroom ang lenggwahe ni Vice!

MAG-RUB on kaya ang box office appeal and luck ni Derek Ramsay sa “The Unkabogable Praybeyt Benjamin” na bale pinagtatambalan nila ni Vice Ganda? October 26 ang nakatakdang opening day ng kumedyang co-production din ng Star Cinema at Viva Entertainment, gaya ng hit na hit na “No Other Woman,” kung saan pinag-agawan nina Anne Curtis at Christine Reyes si Derek. Dahil sa commercial and artistic success ng nasabing pelikula (na binigyan ng rating na “A” ng Cinema Evaluation Board, isang sinyal na artistically meritorious ang pelikula), masasabing si Derek ang “actor of the hour.”

Pero di naman kinuhang leading man ng Star Cinema-Viva si Derek dahil sa tagumpay ng No Other Woman. Baka halos sabay na in-assign sa kanya ang dalawang pelikula at posible pa ngang “naglagare” siya sa pagsyusyuting nung dalawang pelikula.
May panahong nagtu-tweet ang girlfriend ni Derek na si Anjelica Panganiban na sa Skype (na lang sa Internet) sila nagkikita ni Derek dahil napakaraming showbiz commitments ng aktor. Naisip lang siguro ng Star Cinema-Viva na dahil sa walang bahid na kamachohan ni Derek, bagay siyang leading man ng binabaeng si Vice Ganda, lalo pa”t noon pa naman ipinagkakalat ni Vice na crush na crush n’ya si Derek.

Kapag naging monster hit din ang Praybeyt Benjamin, pwedeng sabihing si Derek ang lucky charm ng pelikula–dahil kagagaling lang n’ya sa monster hit na No Other Woman. Pero siyempre pa, si Vice ang ituturing na pinakamalaking luck factor pag naging hit ang naturang pelikula.

Pangalawang title role movie na ni Vice ang Praybeyt Benjamin, pagkatapos ng “Petrang Kabayo,” na naging hit din naman yata. Pag naging undoubtable at obvious hit ang Praybeyt Benjamin, kumpirmasyon yon na tanggap na ng madlang Pinoy ang isang certified bading bilang bida sa pelikula ng kabadingan. Kung sina Dolphy at Roderick Paulate ay nagbabading-badingan lang sa hit movies nila ng kabadingan (si Roderick ang unang nagbida sa Petrang Kabayo), si Vice Ganda ang lantay na lantay na bading. Magaling ding gumanap na bading ang lantay na bading din na si Fanny Serrano, pero hindi naman siya naging box office star. Happily, kumita naman yata ang pinagbidahan n’yang indie film na “Tarima,” and as far as we know, sa indie film pa lang na iyon siya nagbida (bagama’t marami na siyang pinagbidahang episodes sa Maalaala Mo Kaya ng ABS-CBN).

Masasabing phenomenal din ang pagsikat ni Vice Ganda bilang bading na versatile entertainer. Maraming biglang naungusan si Vice nang kunin siyang unevictable hurado sa “Showtime” ng ABS-CBN 2, gawing bida sa remake ng Petrang Kabayo, at mag-solo concert sa pagkalaki-laking Araneta Coliseum. (Ni ang world singing champ kuno na si Jed Madela nga ay di pa nakakapag-solo concert sa Big Dome. Buti nga si Daniel Razon nakapag-solo concert na run!)

Sa hanay ng mga bading na mula sa sing-along bars, naunang sumikat sa TV sina Arnel Ignacio, Allan K, at Chokoleit, pero sa kanilang tatlo ay si Allan K pa lang ang nakapag-solo concert sa Araneta, at sinundan na nga ni Vice pagkalipas ng maraming taon. (Actually, nakapag-solo concert na rin sa Folk Arts Theater si John Lapus, but he is a league of his own.

Hindi siya sa sing-along bars galing, kundi sa production staff ng ABS-CBN, at tapos siya ng college, di gaya ng maraming bading na nagtrabaho sa sing-along bars na siyang pinagmulan ni Vice Ganda.) Pero masasabing kinabog ni Vice si Allan K dahil si Vice ay nagkaroon ng title-role films samantalang si Allan K ay hindi pa.

Oo nga pala, parang idinagdag lang kamakailan ang “unkabogable” sa titulo ng peliku la ni Vice. Parang wala yon sa titulo nung ipina-press conference ang pelikula. Titulo yata yon ng concert ni Vice sa Araneta Coliseum, at dahil siguro dinagsa yon ng madla kaya naisip ng Star Cinema-Viva na idagdag yon sa titulo ng pelikula.

Pero gusto naming linawin sa mga estudyanteng di pa bihasang mag-Ingles na hindi Ingles, at hindi rin Filipino, ang ekspresyon na “unkabogable.” Ekspresyon na bading lang yon, dear students. Ewan kung si Vice Ganda ang umimbento ng ekspresyon na iyan o na-pick up lang n’ya sa mga kapwa n’ya bading nagpapaka-creative kuno.

Hindi n’yo pwedeng gamitin sa pormal na pagpapahayag sa Ingles man o sa Filipino ang “unkabogable” kahit na may kahulugan din naman ito bilang bukambibig ng mga bading (at ang ibig sabihin nito ay “di-pwedeng talunin, o di pwedeng maungusan). Ang lumang ekspresyong bading na katumbas nito ay “di kayang talbugan” o di-pwedeng talbugan”. Unless bading language ang ginagamit ng teacher n’yo sa classroom, saka n’yo lang pwedeng gamitin ang “unkabogable.” Pero walang karapatang maging teacher ang sino mang bading lang ang lengguwaheng alam gamitin sa pagtuturo sa klase. Kung may teacher kayong ganyan, i-report n’yo agad sa principal o sa dean para madisiplina o mapatalsik.

Phenomenal at nakakaaliw man si Vice bilang showbiz talent, ang lengguwahe niyang bading ay hindi pwedeng gawing huwaran sa pagsasalita at pagsusulat sa klase. Kalait-lait sa klasrum ang lengguwahe ni Vice dahil masama itong bisyo.

loading...

About Thor

You must be logged in to post a comment Login

Leave a Reply