Karma at hatol ni Lord vs mga hudas sa kalamidad

BUMUBUHOS ang tulong sa mga biktima ng kalamidad lalo na sa Cagayan de Oro at Iligan.

Sana naman, itong Negros Oriental na namatayan din ng nasa 35 katao ay mahatiran din ng tulong.

Itong mga humahawak o nagma-manage ng tulong, lalo na ang pamahalaan, ay dapat na hindi kalimutan ang lahat ng mga biktima ng bagyong Sendong saan man matatagpuan ang mga ito.

Lokal at international ang pinanggagalingan ng tulong.

Pagkain, salapi, kumot, damit, gamot, kabaong at marami pang iba.

TULONG NG MGA PULITIKO

Tulad ng inaasahan, ang mga pulitiko ang kauna-unahang pumupunta sa mga lugar na nasalanta.

Lalo na ang mga nakaupo sa bisa ng mandato ng bayan sa pamamagitan ng halalan.

Tungkulin kasi nilang paglingkuran at protektahan ang mamamayan, higit sa lahat at sa kanilang mga sarili.

Lalo na ang mga lokal na pulitiko.

Mga kapitan at kagawad ng barangay, mayor at konsehal ng mga bayan at lungsod, gobernador at bokal, kongresman.

Ang mga senador at taga-Palasyo ay tumatakbo rin para maghatid ng tulong.

HOKUS-POKUS SA TULONG

Meron lang tayong nasasagap na hindi maganda.

Totoo bang may mga pulitiko nang nagdidikit ng kanilang mga pangalan sa mga tulong kahit na hindi galing sa kanilang mga sariling bulsa?

Isa pa, dapat bang itatak ang pangalan ng mga pulitiko sa mga ayuda na galing sa mga calamity fund?

Kung sarili nilang tulong yan, hindi masama na sila’y magpakilala.

Lalo na ang mga hindi taga-riyan sa lugar.

Pulitiko kasi ang mga yan at hindi naman basta pilantropo.

Hindi uso sa mga pulitiko ang magiging anonymous na donor.

KINAKANGKONG ANG AYUDA

Kapag hindi kasi tinatakan ang mga tulong, may mga nangangangko.

Kung hindi ganap na mawala ang mga ayuda, mga Bro, ginagawan yan ng mga dagdag-bawas.

Hindi lang yan.

Pinapalitan ng mga peke ang mga ayuda kung magaganda at orig ang mga ito.

Diyan mismo sa ipunan ng tulong nagaganap ang mga milagro ng mga mandurugas.

Pero meron ding milagro habang ibinibiyahe ang mga ito.

COA DAPAT NA MAGHANDA

Itong grupo ni Commission on Audit Heidi Mendoza ay dapat na maghanda para sa pag-a-audit sa mga dumarating na tulong sa mga biktima ng kalamidad.

Lalo na ang mga dumadaloy sa kamay at opisina ng mga pulitiko.

Nangyayari kasi ang mga matitinding milagro sa pagtanggap at pamamahagi ng tulong kahit kailan.

Hindi nagkakasya ang mga ito sa kanilang mga ghost project at komisyon sa mga proyekto.

Pati ang mga pangkalamidad na ayuda ay kanila ring sinasalakay.

Kung minsan, may mga straight ding pulitiko.

Ngunit ang mga tauhan ng mga ito ang gumagawa ng mga milagro.

At dahil sa kabaitan ng mga straight na pulitiko, agad ng pinatatawad ang mga lumilihis sa tuwid na landas.

At sinasangga na lang ang mga mapanuring mata ng mga taga-COA.

IBALIK ANG NINAKAW

Sinasamantala ng mga tarantadong pulitiko at tauhan ng mga ito ang mga makataong patakaran ng COA.

Sa mga pag-a-audit kasi ng COA, maraming pagkakataon na binibigyan ang mga mandurugas at kawatan na magsauli ng kanilang mga dinudugas at ninanakaw.

Lalo na sa mga sitwasyon na may pagdududa kung sinadya o hindi sinadya ang pagkawala ng mga bagay na dapat ipaliwanag, isauli o palitan ng mga pulitiko at tauhan ng mga ito.

LUMALABAS LANG SA HALALAN

Kung magkakaroon ng kabiguan ang COA na mag-audit, lumalabas ang katotohanan sa oras ng halalan.

Tingnan ninyo ang lumalabas sa bunganga ng mga pulitiko.

Ginagawang paninira sa oras ng kampanya ang nalalaman nilang kalokohanan sa mga pulitiko.

Nalalaman ito dahil oras din ng mga balimbing ang oras ng halalan. Ang mga sikreto ngayon ay sa mga halalan lang nabubunyag dahil sa mga balimbing.

Ang problema nga lang, ay walang nagsasampa ng kaso laban sa mga mandurugas sa mga tulong o ayuda sa mga biktima ng kalamidad makaraan ang halalan.

Sapagkat karaniwang nadedemanda hindi lang ang mga itinuturong tiwali kundi maging ang mga whistleblower.

Higit sa lahat, kung ano ang ginagawa ng mga tarantadong nakaupo, gayundin ang gagawin ng mga papalit sa kanila, kabilang na ang mga balimbing.

IPASAKAMAY SA KARMA

Kung hindi mabubulatlat ang katarantaduhan ng mga nagsasamantala sa mga namamatay at naghihirap dahil sa mga kalamidad, ipaubaya na lang natin yan kay Lord.

At bahala na si Lord na makipag-usap sa kanila.

Kung halang talaga ang kaluluwa ng mga nandudugas, nagnanakaw, nagdadagdag-bawas at kung ano pa sa mga tulong sa kalamidad, bahala na si Lord sa kanila.

MATUTULAD KAY HUDAS

May karma na ipinararating ng tadhana.

Pero kung si Lord ang maghagis ng karma, nakupo, kahit magdasal ka, hindi ka na mapatatawad.

Matutulad ka kay Hudas na kailanman ay hindi nakabawi sa kanyang kalokohan at uod lang ang naging katapat nito.

oOo

Anomang reklamo o puna ay maaaring iparating sa www.remate.ph, itawag o i-text sa 09214303333.

loading...

About Thor

You must be logged in to post a comment Login

Leave a Reply