Ang impeachment at problema sa langis, EVAT

GUSTO nating makita na may pagbabago sa buhay ng mamamayan sa taong ito.

Nais nating marinig mula sa mamamayan na dumarami ang nakararanas ng pag-angat sa buhay at taliwas sa sinasabi ng survey kamakailan na dumarami ang nagsasabing sila’y naghihirap.

Kaya naman, yang kasong impeachment ay hindi dapat na magiging sagabal sa mga iniisip o programa ng pamahalaan na nakaka-sa na para sa ikaaangat ng buhay ng mamamayan.

Narito ang ilang problema na dapat asikasuhin ng mga kinauukulan kasabay ang pagdinig sa impeachment.

GRABENG OIL PRICE HIKE

Nasa bingit ng alanganin ang suplay ng bansa sa langis dahil sa girian ng mga bansa ukol sa paggawa ng bombang nukleyar.

Ginigipit ng ilang bansa ang Iran upang hindi matuloy ang paggawa nito ng bombang nukleyar.

Kasama sa panggigipit ang pagpatay sa mga nuclear scientist nito at pagharang sa mga negosyo at pera sa bangko ng mga taga-Iran.

May pangamba na ang panggigipit ay mauuwi sa digmaan sa Gitnang Silangan na magiging dahilan ng paghinto ng paglabas ng langis mula sa mga bansang ito.

Pero kahit wala pang aktwal na krisis, tumitiba na ang mga kompanyang langis sa pamamagitan ng pagtataas ng presyong petrolyo o oil price hike dahil sa nakaambang krisis.

PAWANG MGA INUTIL

Hindi natin akalain na ang pagrarasyon ng gasolina, diesel at iba pang mga produktong petrolyo ang ipinagngangawa ng mga kinauukulan.

Hindi nila iniisip na ang pangunahing problema ng mamamayan ngayon ay ang sobrang mahal na petrolyo at hindi ang kakapusan ng suplay ng langis.

Akala ng mga tipaklong na ito maaalis nila ang ating  puyo at ililipat sa ibang lugar para maligaw tayo.

Malaking problema ang oil price hike, period.

At ordinaryong mamamayan at maging ang mga may kaya sa buhay ay pinahihirapan nito.

SUGONG MGA INUTIL DIN

Itong mga sugo naman ng mamamayan sa Kongreso ay nakapagtatakang tahimik na tahimik
sa problema.

Mabibilang lang sa daliri ang nagpapakita ng pagkabahala at nagnanais na gumawa ng paraan laban sa oil price hike na anyo ng pagsasamantala ng mga kompanyang langis.

Tila yung pagkakakitaan lang nila ang kanilang sinisilip at walang iba kundi ang kasong impeachment at iba pang kontrobersiya na doon sila pipirma kapalit ng tiyak na pork barrel.

Sa P70 milyon na pork barrel kada taon, mababawi na nila ang kanilang gastos sa nakaraang halalan, may panggastos pa sila sa susunod na halalan.

Kung umayaw naman sila sa pulitika, sigurado na sila sa buhay na pakuya-kuyakoy na lamang.

DEREGULASYON NG LANGIS

Sa oras ng kagipitan na bunga ng pang-aabuso sa batas, pinakatuwid na daan ang pagrebyu o pagbusisi sa batas.

Dapat tingnan kung ano ang mga depekto na nagbubunga ng pagkadehado hindi lang sa bahagi ng mamamayan kundi sa pamahalaan.

Tingnan ninyo, mga Bro, habang nalulugi ang mga tsuper at operator ng mga pampublikong sasakyan, napeperhuwisyo naman ang pagpapatrulya ng mga pulis laban sa krimen.

Kabilang sa mga napeperhuwisyo rin ang napakaraming negosyo dahil sa pagmamahal ng kuryente.

Aminin man o hindi ng mga nasa pamahalaan, nagmamahal ang kuryente dahil sa malaki ang konsumo ng mga planta ng kuryente na langis.

Ang bentang kuryente  ng mga planta na gumagamit ng langis sa paglikha ng kuryente ang nagtutulak ng sobrang pagmamahal ng kuryente.

Tingnan ninyo, kumakaripas na ng takbo ang mga dayuhang gustong mamumuhunan sa Pinas dahil sa mahal nating kuryente.

DEDMA SA DEREGULASYON

Heto ngayon ang problema.

Bibihira na nga lang ang nagsusulong ng pagrebyu sa Oil Deregualtion Law, basta dinededma na lang din ito ng mga nasa Kongreso.

Ano ang dahilan at hindi magawang ayusin ang batas ng mga magagaling sa kasong impeachment ni Corona?

Ngayon ay gamit-gamit ng mga kompanya ng langis ang nasabing batas para paglaruan nang walang habas ang presyo ng langis.

Para hindi magawang magreklamo ng mamamayan, pinaiiral ngayon ang dagdag-bawas dito.

Kunwari, may pabor ang mamamayan pero sa totoo lang, tulak sa dibdib, kabig sa bibig ang lahat at pabor ang lahat sa mga kompanyang langis.

EVAT SA PETROLYO

Maging ang Expanded Value Added Tax na sobrang pabigat sa napakabigat nang pagpepresyo ng mga kompanya ng langis ay dinededma rin ng mga Boss ng bayan.

Walang umimik sa mga ito nang sinabi ng San Miguel Corporation na may patong na EVAT na P15 kada litro ang pamahalaan at ito ang nagpapamahal sa langis.

Ibig bang sabihin nito na  totoong kasabwat ang pamahalaan ng mga kompanya ng langis sa nagpapabigat sa buhay ng mamamayan at ng buong bansa sa pamamagitan ng oil price hike?

Ang nakasusuka, mga Bro, walang paki ang mga opisyal ng bayan.

MAGALING SA IMPEACHMENT

Ngayon ay magagaling silang lahat na opisyal sa kasong impeachment.

Tanong lang sa mga opisyal natin, alin ang higit na nagpapahirap sa bayan: Yang mga iniimpeach o yang mga walang paki sa paghihirap ng mamamayan?

oOo

Anomang reklamo o puna ay maaaring iparating sa  www.remate.ph o i-text sa 09214303333.

About Gwenn

You must be logged in to post a comment Login

Leave a Reply