Tikoy

ISA sa pinakasikat na pagkain tuwing Chinese New Year ay ang “Nian Gao,” o mas kilala sa Pilipinas na tikoy.

Ang mga Tsino ang nagdala sa Pilipinas ng pagkain na ito.

Tinatawag din ang tikoy na Chinese New Year’s cake. Ito ay matamis na kakanin na gawa sa malagkit na kanin (Oryza glutinosa) na isang uri ng butil na talamak sa mga bansang Asya.

Batay sa Chinese Lunar calendar, ang tikoy ay isa sa pinakamahahalagang pagkaing inihahanda para sa pagdiriwang ng Bagong Taon.

Ang pinakasikat na pagluluto ng tikoy ay ang pagpiprito dito.

Sa mga Filipino na nawiwili na rin sa pagkain ng tikoy ay iginugulong muna ito sa itlog bago iprito sa mantika o margarine.

Bagama’t tinatawag na cake ang tikoy, ang itsura nito ay malayo sa konsepto ng cake sa mga kanluraning bansa.

Ang tikoy ay malagkit, siksik at may katigasan ngunit malambot naman kapag idinaan sa apoy (kung ipiprito o pasisingawin) di gaya tinapay o sponge cake na malalambot.

Gawa ang tikoy sa giniling na malagkit na kanin, arina at asukal.

Sa bayan ng Shanghai sa Tsina, ang tikoy ay kulay puti at isinasahog sa gulay at sabaw. Pinakasikat na luto ng tikoy Shanghai ay ang guisado.

Sa Guangdong naman, pinatatamis ang tikoy gamit ang asukal na pula (brown sugar) na siyang nagbibigay dito ng manilaw-nilaw na kulay.

Pinasisingawan ito hanggang sa ito ay tumigas. Maaari na rin itong ihain ngunit kadalasan ay itinutubog pa ang hiniwang tikoy sa itlog bago iprito.

Paniniwala

Naniniwala ang mga Tsino na hindi dapat mawala ang tikoy sa kanilang hapag tuwing ipinagdiriwang nila ang bagong taon.

Ang tradisyon ng pagkain ng tikoy ay nagsimula sa kanilang alamat at pamahiin sa pinaniniwalang may suwerteng hatid ang nasabing malagkit na kakanin.

Ang korte nito ay bilog na anila ay hugis ng pera.

Alamat

Ayon sa alamat, ang bawat tahanan ng Tsino ay may Panginoon ng kusina na kilala sa tawag na Zaowang. Siya ang nagsisilbing tagapagbantay ng bawat pamilya, at tagapag-ulat sa Kataastaasang Panginoon.

Sinasabing tuwing sasapit ang ika-23 araw ng huling buwan ng taon ay nililisan ni Zaowang ang bahay ng mga pamilya upang maghatid ng mensahe sa Kataastaasang Panginoon.

Kanyang ipinapabatid sa Kataastaasang Panginoon kung ano ang mga pag-uugali na ipinakita at ginawa ng pamilya sa nagdaang taon.

Upang maging maganda ang ibabalita ni Zaowang sa Kataastaasang Panginoon, ay nag-alalay sila kay Zaowang ng masasarap na pagkain, kabilang na ang tikoy bago pa man ito mag-ulat sa Kataastaasang Panginoon.

Gayunman, ayon sa kuwento, ang pagbibigay ng malagkit na tikoy ay hindi isang uri ng “suhol” sa panginoon ng kusina. Nagsisilbing pandikit sa bibig ni Zaowang ang tikoy upang hindi ito makapagsumbong ng masama sa Kataastaasang panginoon.

Pamahiin

Sa wikang Tsino, ang Nian ay kapwa nangangahulugan ng “malagkit” at “taon,” samantalang ang gao naman ay “keyk” at “tumaas/umalsa.”

Samakatuwid, ang Nian Gao nangangahulugan na “paangat bawat taon.” Ang paghahain nito tuwing Chinese New Year ay sinasabing nagdadala ng magandang kapalaran sa isang tahanan.

Representasyon din ito ng magandang samahan sa pamilya – pagkakabuklod at pagkakalapit. Ito ay makikita sa katangian ng tikoy na malagkit.

Ang mga Tsino ay naniniwala din na ang makakamit na yaman ng pamilya sa papasok na taon ay nakasalalay sa kung gaano kataas o kaalsa ang tikoy kapag ito ay pinasingawan.

Dito sa Maynila, maraming nagtitinda ng tikoy sa Binondo, hindi lamang tuwing Chinese New Year kundi maging sa buong taon.

loading...

About Thor

You must be logged in to post a comment Login

Leave a Reply