Pag-aaral sa lindol at pera sa bangko ni Corona

UMABOT sa intensity 7 ang lindol na tumama sa pagitan ng Cebu at Negros kahapon ng tanghali.

Nagmula ang lindol sa galaw ng lupa na may 10 kilometro ang lalim at malawak na bahagi ng Kabisayaan at Kamindanaoan ang tinamaan.

May labingtatlong namatay nang nagiba ang pader na malapit sa kanilang kinatatayuan.

Pinigil naman ang paglakbay ng mga sasakyang pandagat upang hindi matamaan ng tsunami.

May ilang lugar kasi na nagka-tsunami ng konti at kumalma rin.

Sa balita natin, may mga napinsala o nagibang mga tulay at mga kuryente ring napinsala.

SALAMAT

Hindi masamang magpasalamat tayo sa may likha ng langit at lupa sa kahit papaano’y maliit na pinsala natin sa lindol.

Hindi naman kasi katulad ng lindol kahapon ang lindol sa Baguio City at Cabanatuan City noong 1991 na umabot sa intensity 7.8 ang lakas at sa Japan na niyanig ng 8.9 na lindol kaya nagkatsunami.

PAG-ARALAN, INSPEKSYUNIN

Ang susunod na dapat gawin ng mga awtoridad sa lindol gaya ng Phivolcs at iba pang ahensiya ng pamahalaan na sumusubaybay sa mga delikadong lugar ay mag-inspeksyon at mag-aral sa paligid.

May bumitak bang mga bundok at mga patag?

Alalahanin na ang mga landslide na pumapatay ng marami tuwing tag-ulan ay maaaring galing sa mga lindol.

May mga bumitak din sa mga lansangan sa Pangasinan at Nueva Ecija noong 1991 at nagiging delikado na pagtayuan ng kahit anong gusali.

Anomang gusali na itinatayo sa mga lugar na ganito ay tiyak na mapanganib sa buhay ng mamamayan.

RESULTA IPAALAM SA TAUMBAYAN

Dapat na ihayag kaagad ng pamahalaan ang mga resulta ng pag-aaral nito.

Ang daming paglalabasan ng mga balita at nakahanda mismo ang ating pahayagan na maglabas ng mga lugar na delikado o pininsala ng nasabing lindol Pablik serbis natin yan, mga Bro.

MAY BITAK ABANDONAHIN

Kabilang sa mga dapat na pag-aralan ng mga awtoridad ang kalagayan ng mga gusali na gumalaw.

Sa totoo lang, mga Bro, maraming building ang may mga pinsala pero hindi ipinaaalam sa mga awtoridad sa nakaraang mga lindol.

Yung mga bumitak na building, basta na lang pinalitadahan.

Ito’y para matakpan ang mga bitak.

Ang ginagawa na lang ng mga nakaaalam ay maging alerto sa pagkakaroon ng lindol.

Pinupuno nila ng instruction ang mga nakatira sa gusali kung paano tatakas.

Pero paano ka makatatakas kung guguho ang iyong gusali na sabihin nating nasa lima, sampu o higit pang palapag?

Alalahaning tinatamaan ang gitna ng mga matataas na gusali sa oras ng lindol.

At ang mga baywang ng mga ito ang nagkakaron ng mga bitak.

HUWAG PERAHIN

Itong mga inspektor sa lupa, sa mga imprastraktura at gusali ay ‘di dapat mag-ala-Hudas sa kanilang trabaho na pangkaligtasan.

Kung may makita silang mga gusali o lugar na dapat  iabandona ay dapat nilang ihayag.

Hindi yung pagtatakpan nila ang mga depekto saka nila peperahin ang mga ito.

Sa totoo lang, sa sumbong ng ating uzi, kaya marami ang nadidisgrasya sa atin ay dahil sa pamemera ng mga nasa pamahalaan.

Lalo na ang mga inspector at mga bosing nila.

Magkakasabwat ang mga yan, sabi ng ating uzi.

KAKAMBAL NG SUNOG

Hindi lang sirang mga gusali, imprastraktura at bundok  ang bunga ng lindol.

May nalilikha ring mga sunog dahil sa pagkalagot ng mga electric wire.

Alam naman natin na kung maglalaro ang mga nalalagot na kawad ng kuryente, lumilikha sila ng apoy na pinagmumulan ng mga sunog.

KAMATAYAN AT IBA PA

Kamatayan, pagkakasugat, pagkakasakit at kasiraan ng mga ari-arian ang ibinubunga ng mga lindol at bunga ng mga ito gaya ng mga pagkakabitak ng lupa.

Sa mga malalang kalagayan, daan-daan o libo-libo katao ang namamatay at napipinsala at bilyon-bilyong halaga  ng ari-arian ang nasisira.

May mga tribu pa nga na na basta na lang nawa-wipe out at wala nang balita sa mga ito.

Kaya naman, ganito na lang ang pagpipilit natin na lahat ng malalaman ng mga inspector at mga bosing nila kaugnay ng lindol kahapon at iba pa ay dapat nilang ihayag ng buong katotohanan.

Tatandaan, malaki ang maitutulong mismo ng mamamayan sa pagpigil o pag-iwas sa mga kalamidad basta’t may alam silang mga makapipinsala sa kanila.

SUBPOENA SA BANK ACCOUNT

Ibaling naman natin, mga Bro, ang ating atensyon sa kasong impeachment laban kay Chief Justice Renato Corona.

Dinesisyunan ng impeach court ang pagpiprisinta ng dalawang bangko, isa sa Makati at isa sa Quezon City, ng mga bank account umano ni Corona.

Ano na ngayon ang mangyayari?

May lilitaw bang kahina-hinala o ill-gotten wealth itong si Corona?

Pero hayaan na lang natin ang hukuman na magpasya sa huling mga araw kung may nakaw at nakatago ngang yaman si Corona.

At kung may nakaw at nakatagong yaman si Corona, eh, di panagutin siya sa batas.

Kahit sinong public official na may ganito ay dapat na isalang sa katarungan.

oOo

Anomang reklamo o puna ay maaaring itawag o i-text sa 09214303333.

About Gwenn

You must be logged in to post a comment Login

Leave a Reply