Patayan kahit saan matapos ang Holy Week

WALA ba kayong napapansin ukol sa krimen?

Bago ang Semana Santa, mayroon tayong iniuulat sa ating pahayagan na tatlo hanggang anim na patayan sa iba’t ibang bahagi ng bansa.

Matapos ang pagngingilin ng Mahal na Araw, gayundin ang nagaganap.

Walang pagbabago.

ANG BIKTIMA

Hindi na natin kikilalanin pa ang mga nagiging biktima dahil mauubusan tayo ng espasyo para rito.

Ngunit ang mga uri ng pagpaslang ay maaari nating isa-isahin hangga’t makakayanan natin.

Kapansin-pansin ang pagpaslang sa mga bata mula sa sanggol hanggang sa mga mura pa ang edad.

Karaniwang may natatagpuang mga patay na sanggol o fetus kahit pa sa mga simbahan.

Ang mga batang babae  ay karaniwan nang natatagpuang nakabulagta kahit saan at pinapatay ng mga rapist.

May mga sina-salvage na walang pagkakakilanlan. Itinatapon na lang kahit saan ang mga ito at mayroon pa ngang basta na lang tsina-chop-chop. Masahol pa ito sa pamumugot-ulo ng mga Abu Sayyaf.

Isa sa mga tsinaptsap ang babaeng walang ulo na isinilid sa dalawang sako ang katawan nitong nagdaang mga araw lamang sa Naga City.

Nauso na rin ang pagkatay ng ama sa anak o anak sa ama o kapatid sa kapatid.

Sunod-sunod din ang pamamaslang sa mga opisyal at tauhan ng pamahalaan, sibilyan man o militar o pulis ang mga ito.

At oo, ang mga mall na puno ng tao ay ‘di na sinasanto ng mga kriminal.

Sa mga demolisyon sa mga kapus-palad na walang sariling lupa, mayroon na ring mga patayan.

WALANG PAGBABAGO

Parang bulaklak lang ng dila ang “matuwid na daan.” Walang sumusunod dito sa mga nagpapatayan.

Hindi effective ang sinasabing crime prevention ng mga parak at iba pang awtoridad.
Basta dinaraan ang mga sigalot sa patayan.

Period.

RIDING-IN-TANDEM NANANALASA

May nakatatakot na uso ngayon: ang riding in tandem na pumapatay.

Maaaring holdaper ang mga ito. Maaari ring upahan o hired killers. ‘Yung iba, karnaper.

Bagama’t may nadadale sa mga ito ng mga parak, parang wala nang katapusan ang pananalasa ng mga ito. May suspetsa pa ngang karaniwang mga pulis at militar, aktibo o absent without leave o retirado, ang mga sangkot.

Nadidiskubre ito sa mga napapatay ng mga awtoridad na mga kriminal na nakasakay sa mga motorsiklo.

MAY MGA NAKAKIKILALA

Marami sa mga kriminal ang nakikilala. At hindi totoong walang nakakikilala sa mga ito gaya ng mga nauulat.

Kung masipag-sipag lang ang mga imbestigador na mag-usisa at hindi pabandying-bandying lang sa kanilang mga opisina, marami silang masasakote.

Pero may problema kung ang kanilang mga kabaro ang gumagawa ng krimen o kung protektado o bata ang mga kriminal ng mga may matataas na katungkulan.

WALANG SAKSI

Ang isa sa mga problema na naeengkwentro ng mga awtoridad ay ang kawalan ng saksi sa mga krimen.

Walang saksi hindi dahil wala talaga ang mga ito.

Karaniwang hindi nagsasalita ang nakasasaksi sa krimen dahil wala silang proteksyon mula sa pamahalaan.

Rekord na kasi ng gobyerno ang bumitiw sa mga saksi kung hindi na kailangan ang mga ito.

At walang mapupuntahan ang mga saksi kundi kapahamakan at paghihirap.

Karaniwan na ngang sariling bulsa ang pinanggagalingan ng panggastos ng mga saksi, wala pa silang katiyakan sa buhay at kinabukasan.

Sino ang magtitiyaga at magkakaroon ng lakas ng loob na maging saksi sa krimen sa ganitong kalagayan?

Lalo na kung ang mga makapangyarihan, pulis at militar ang madiriin sa mga kasong pagpatay.

TUWID NA DAAN AT MGA KRIMEN

Hindi dapat nakapako ang tuwid na daan laban sa mga korap at mandarambong.

Kung paano binubuhusan ng seguridad ang mga naglalaban-laban sa korapsyon at pandarambong, ganito rin dapat ang pagbubuhos ng puwersa ng pamahalaan laban sa mga kriminal at para sa proteksyon ng mga biktima at saksi.

Hangga’t hindi nagagawa ang mga ito, mananatiling mabuway ang sinasabing maayos at mapayapang buhay ng mamamayan.

Malaking hamon sa pamahalaan ni Pangulong Noynoy ang pagpapatino sa mga kriminal sa mga lansangan, sa loob ng mga tahanan, mall at iba pang lugar.

Lalo’t karamihan  sa mga krimen ay gawa mismo ng mga armadong opisyal at tauhan ng pamahalaan.

UGATIN ANG MGA PROBLEMA

Dapat sigurong ugatin ang lahat ng mga krimen na nagaganap.

Hangga’t hindi ginagawa ito, magbuhos man ang pamahalaan ng puwersa kung puro reaksyon lamang, walang magandang mangyayari.

Halimbawa, bakit nagiging parang laruan lamang ng ilang awtoridad ang buhay ng mga mamamayan samantalang guwardiyado nila nang todo ang mga kilalang korap at mandarambong?

Ano-ano naman ang nagtutulak sa mamamayan na mangholdap, mang-akyat-bahay saka pumatay sa kanilang mga biktima hanggang sa makipagpatayan naman sila sa mga awtoridad na humuhuli sa kanila?

Bakit ganun na lang na nakasiper ang bunganga ng mga saksi sa kabila ng mga lantarang pananalasa ng mga nakikilala nilang mga kriminal?

oOo

Anomang reklamo o puna ay itawag o i-text sa 09214303333.

loading...

About Gwenn

You must be logged in to post a comment Login

Leave a Reply