Halina at bumoto po tayo sa National Press Club

BUKAS na na magsisimula, Biyernes, Mayo 5 ang botohan para sa mga opisyal ng National Press Club at gaganapin mismo sa NPC building.

Itinakda ang Advance Voting sa Mayo 4, 2012, dakong ika-10 ng umaga hanggang ika-3 ng hapon para sa mga may tawag ng tungkulin at hindi makadadalo sa regular na botohan sa darating na Linggo, Mayo 6.

Bukas din ang presinto sa mga lifetime member na hindi na kaya ang makihalubilo sa maraming tao at ingay sa paligid.

‘Yun bang === mga may dinaramdam.

Ang mga regular na miyembro na sasailalim sa Advance Voting ay kinailangan lang na magdala ng sertipikasyon ng kanilang mga kaukulang namumuno gaya ng kanilang mga editor o publisher para rito.

MALAKING PUWERSA

Mahigit 800 na miyembro ang nakalistang qualified voters sa halalang ito ng NPC.

Kung magkakaisa lang ang mga ito sa prinsipyo, magiging matatag ang NPC sa susunod na dalawang taon at sa darating pang mga dekada o kaya’y siglo.

Normal na sa mga araw ng halalan ang pagkakaroon ng mga tampuhan at yung iba, walang maisip kundi ang manira para lang manalo.

Pero ang lahat ng ito ay dapat na mapangibabawan.

Lalo’t isang araw lang ang okasyong ito.

Matapos ang halalang ito, mananatili tayong nakaharap sa santambak at malalaking problema na hindi kayang harapin ng iilan, maging ang mga pinuno ng NPC.

Habambuhay, mga Bro, ang mga kinahaharap nating problema.

DARAMI PA

Sa pagsisikap nating maging matatag sa lahat ng araw at panahon ang NPC, lalong darami ang magiging kasapi natin at darating ang araw na lahat ng sulok ng Pilipinas ay magkaroon ng malalim na ugat ang NPC.

Sa pamamagitan nito, higit na lalaki ang karapatan at kapangyarihan ng NPC na isulong ang mga prinsipyong dala-dala nito.

Hindi lang para sa mediamen kundi sa bayan at mamamayan na pinaglilingkuran nito.

MANALO MATALO DAPAT MAGKAISA

Lahat ng mga kandidato, lalo na ang mga matatalo, ay hindi dapat magdamdam.

Ang buhay ng mediamen ay nalalagay na sa alanganin at hindi dapat itali ito sa ating mga kabiguan sa halalan.

Tingnan ninyo, tayo’y minamasaker at pinapatay.

Mahigit nang 160 simula noong 1986 ang pinapatay sa atin.

Kahit sa panahong ito na sana’y maituturing natin na paghupa ng pagkitil sa ating buhay, nagpapatuloy ang pagpatay sa atin.

Ang kasong libelo naman ay pinasasama sa kasalukuyan.

Habang inilalaban natin ang decriminalization ng libel, may nagpapanukala naman ng grabeng mataas na danyos na sisingilin sa atin.

May gustong pagbayarin tayo ng kalahating milyon sa bawat kaso at kung hindi natin malalabanan ito, para na rin tayong pinapatay.

Mamamatay sa gutom ang marami sa atin kung pagbabayarin tayo ng danyos na kalahating milyon sa mga kasong libelo.

PERSONAL NA AMBISYON

Anoman ang mga personal nating hangarin o ambisyon sa puwesto sa NPC o pagboto o hindi pagboto, isantabi nating lahat.

Walang saysay para sa kahit kanino ang pagkakaroon ng puwesto sa NPC nang wala namang magagawa sa mediamen na nasa kagipitan sa buhay, propesyon at iba pa.

Kaya nga, bumoto tayo kung may pagkakataon tayo.

Asahan na lamang natin na magiging mapaglingkod at matapat sa mediamen ang mga mahahalal ngayon.

MAGTIWALA TAYO SA ELECOM

Naniniwala tayo sa integridad ng Election Committee na mangangasiwa sa ating halalan.

Mga batikang mamamahayag ang mga ito at malalim na ang karanasan sa paghawak sa ating mga halalan.

Nasaksihan ko na mismo ang maayos na pamamahala ng mga ito at walang gusot na nagaganap.

Pero ang pinakamahalaga, napatunayan na ang mga ito sa pagpapairal ng patas at malinis na halalan.

MAGTIWALA SA NPC BOARD

Sa mga panahong may kuwestiyon ang resulta ng halalan at magkakaroon ng protesta, may batas tayong sinusunod dito.

Karapatan ng sinoman ang magsampa ng protesta sa malilikhang arbitration board na lilikhain ng bagong halal na pamunuan.

Dapat na sumandig tayo sa magiging desisyon ng board na ito.

Ang pagsasampa ng kaso sa labas ng NPC ay dapat na sanang iwasan.

Hangga’t maaari, hindi na hahantong sa mga hukuman ang sarili nating tungkulin na ayusin ang mga gusot sa sariling hanay.

Sayang lang ang mga panahon, pondo, tao at iba pa na ginugugol sa mga pangyayaring ito.

Sa halip, ibuhos na lang natin ang lahat ng ating panahon, pondo, sarili sa tuloy-tuloy na paglilingkod sa isa’t isa.

PAGLILINGKOD SA MAMAMAYAN

Isa pang ating alalahanin ang paglilingkod natin sa sambayanan.

Inaasahan tayo ng mamamayan na kanilang kaagapay sa pagsusulong nila ng buhay na ginagabayan ng katotohanan, katarungan at kalayaan.

Kasi naman, sa maraming pagkakataon, binabaluktot ang katotohanan,  binabalewala ang katarungan at tinatanggalan ng kalayaan ang mamamayan ng mga Herodes at Pilato.

Hindi natin sila dapat na biguin sa kanilang inaasahan sa atin sa pamamagitan ng ating mahigpit na pagkakaisa sa isip, sa salita at sa gawa sa bawat isa at sa kanila.

oOo

Anomang reklamo o puna ay maaaring itawag o i-text sa 09214303333.

loading...

About Gwenn

You must be logged in to post a comment Login

Leave a Reply