$1B sa IMF at maruming pulitika sa Pasay

HANGGA’T hindi naipaliliwanag nang husto ng pamahalaan ang paglalagak nito ng $1 bilyon sa International Monetary Fund, mananatiling mainit ito sa mata ng mamamayan.

Mainit dahil sa tingin ng mamamayan ay labis-labis ang pangangailangan nila na hindi natutugunan ng pamahalaan habang mabilis pa umano sa alas kuwatro ang pagbibigay nito ng napakalaking pera sa IMF.

At ang masakit pa umano, gagamitin lang ng IMF ang salapi sa pagsalba sa mga ekonomiya ng mga mayayamang bansa sa krisis na kinahaharap ng mga ito.

NATIONAL PRIDE

Hindi katanggap-tanggap sa maraming mamamayan ang pahayag ng pamahalaan na pambansang karangalan ang nakamit nito nang magbigay ng kontribusyon na $1B sa nasabing higanteng ahensya sa pananalapi.

National pride umano ang pagbibigay ng malaking halaga sa IMF sa gitna ng hindi pagbibigay rito ng Estados Unidos at unang pangyayari na rin umano sa Pinas ito kumpara sa kasaysayan na ito ang umuutang sa IMF.

Ngunit para sa maraming mamamayan, hindi uubra ang katwirang “hindi na baleng mawalan ng pera basta’t may yabang.”

KONTRIBUSYON O PAUTANG

Hindi gaanong maintindihan ng maraming mamamayan kung ano talaga ang perang ibinigay ng pamahalaan sa pamamagitan ng Bangko Sentral ng Pilipinas sa IMF.

Ito ba’y kontribusyon ng Pinas bilang isa sa nasa 188 na bansang miyembro ng IMF o ito’y pautang?

Sabi nila, kung kontribusyon, walang maaasahan ang Pinas na kapalit kundi ang karapatan muli na mangutang mula sa IMF.

Kung utang naman, dapat na may maaasahan tayo na bungang maganda gaya ng karapatan sa interes dito.

Alalahanin na kung magpautang ang IMF sa Pinas ay grabe ang mga kondisyon hanggang sa magkandahirap-hirap ang mamamayan.

PRIBATISASYON SA LANGIS, KURYENTE

Ayon sa mga kritiko, nang mangutang ng malaking halaga ang Pinas sa IMF, kasama ang World Bank at Asian Development Bank, noong panahon ni Pangulong Fidel Ramos, ‘yang pribatisasyon ng langis at kuryente ang kabilang sa mga kondisyon.

Mahigit $1 bilyon ang inutang ng Pinas sa IMF noon kaya naman mabilis na ipinasa ng gobyerno ang pribatisasyon ng Petron at ang batas sa oil deregulation.

Ang IMF din ang  nagpasimuno ng deregulasyon ng kuryente o pagbebenta ng mga planta at kawad ng National Power Corporation.

Ang ADB at Japan Bank of International Cooperation ay nagpautang ng $700 milyon sa Pinas upang magkaroon ito ng pambayad sa mga pinagkakautangan ng Napocor noon.

Ang IMF naman ay naghanda ng nasa $259M bilang standby fund para sa Napocor.

Tinakot pa nga umano ng mga internasyonal na financing institutions ang Pinas na hindi ito pauutangin kung hindi magkakaroon ng pribatisasyon sa Napocor.

IMF NAKINABANG NANG TODO
Sa pagpapautang sa Pinas ng bilyones na dolyar kaugnay ng mga pribatisasyon sa langis at kuryente, kumita ang IMF.

Kumita rin ang lahat ng mga kompanyang Amerikano, Europeo at Hapones na itinulak nito para kontrolin ang industriya ng langis at kuryente.

Kumikita sila lahat  mula sa langis at kuryente na napakamahal sa Pinas.

DAPAT KUMITA RIN ANG PINAS

Dahil kumita at patuloy na kumikita ang IMF at mga kakosa nito ng napakalalaki mula sa mga pagpapautang sa Pinas at programa o kondisyon nito sa pagpapautang, dapat ding kumita ang Pinas mula sa ibinigay nitong $1B sa una.

Kung hindi, ano ang mapapala ng Pinas dito, sabi ng mga kritiko.

Sa puntong ito naghahanap ang mamamayan ng linaw sa bigay na $1B sa IMF.

Kung hindi makapagpapaliwanag nang husto ang pamahalaan at ang BSP dito, tiyak namang mananatili ang hindi magandang pagtanaw dito ng mamamayan.

Ang masama ay kung maniningil ang mamamayan sa mga susunod na araw sa pamahalaan at BSP.

Tandaan natin na sobra ang krisis sa kabuhayan, edukasyon, hanapbuhay, presyo ng mga bilihin at iba pa sa hindi gaanong paggastos ng pamahalaan laban sa mga ito.

PULITIKA SA PASAY MARUMI

Kung hindi ka sanay sa pulitika, manginginig ka sa takot sa intriga rito.

Halimbawa sa Pasay City.

Akalain ba nating ginagamit ang kamatayan para harangin ang pagnanais ng isang lider at lingkod bayan na pumalaot sa pulitika upang baguhin ang sinasabing corrupt na local government sa lugar.

Sa kamatayan ni Jesus “Jay” del Rosario sa Amerika dahil sa aksidente sa bisikleta, ipinakakalat umano ng mga nakaupong politiko sa Pasay na umatras na ang ama nito na si Jorge del Rosario sa pagnanais nitong paglingkuran ang mga Pasayeño.

PANASONIC NG DEL ROSARIOS

Maalaala ba ninyo, mga Bro, ang tatak na Panasonic?

Ito ang maunlad na kompanya hanggang ngayon sa Pinas na itinayo ng ama ni Jorge del Rosario na si Jesus del Rosario at pinagkunan ng ngalan ni Jay del Rosario.

Joint venture ang Panasonic sa pagitan ni Del Rosario at isang kompanyang Hapon at sa Pasay itinatag ito.

Ito ang isa sa mga magbibigay ng larawan kung ano ang kinabukasan ng Pasay kung mabuwag na ni Jorge del Rosario ang bulok na lokal na pamahalaan sa Pasay.

O, kababayang Pasayeño, anong sey n’yo?

oOo

Anomang reklamo o puna ay maaaring iparating sa www.remate.ph o i-text sa 09214303333.

loading...

About Thor

You must be logged in to post a comment Login

Leave a Reply