Walang maliit at malaki na tulong at ang helmet

KAHIT na puno ng ‘di pagkakaunawaan ang mahal kong Pinas, sa panahong ito ng kalamidad, kitang-kita ang tulungan ng bawat isa.

Kaya naman, dapat nating pasalamatan ang lahat ng mga nakaiisip na tumulong sa mga nasalanta ng delubyo mula sa  habagat.

Para sa atin, walang maliit o malaki na tulong. Ang mahalaga ay naririyan ang pagmamahal at pagmamalasakit sa kapwa.

At ang pagmamahal at pagmamalasakit ay ipinaaabot sa bawat indibiduwal o pamilyang nangangailangan.

GUTOM LABANAN

Sa mga panahong ito, gutom ang pangunahing kalaban. Kasama na riyan ang sakit at kawalan ng kahit ano para sa araw-araw na pangangailangan.

Ngunit pinakamaganda na tingnan kung ano talaga ang pangangailangan ng mga kinakalamidad.

At magandang magtanong mismo sa mga biktima ng kalamidad o sa mga naatasang mag-asikaso sa kanila na mga indibidwal, organisasyon o sangay ng pamahalaan. Mayroon kasing mga uri ng tulong na hindi kailangan sa isang lugar ngunit kailangang-kailangan sa ibang lugar.

PANAHON NG PAGBABAGO

Batay sa karanasan ngayon at kung iuugnay sa mga nakaraang delubyo gaya ng Ondoy at iba pa, kitang-kita na ang mga malalaking problema.

Naririyan ang paulit-ulit na pagkabaha ng maraming lugar at nasasalanta ang libo-libo o milyong mamamayan.

Dito na dapat na mag-isip pangunahin ang pamahalaan sapagkat nasa kamay nito ang bilyon-bilyon o trilyong buwis ng mamamayan na dapat gamitin.

Halimbawa na lang ang kalagayan ng Metro Manila, Central Luzon at ilang lalawigan sa Ilocos Region na taon-taon na lang na kalahati ng sakop ng mga ito ay biktima ng delubyo.

Ano-ano ba ang mga posibleng gawin para mabawasan ng malaki ang mga delubyo o mailigtas sa delubyo ang milyong mamamayan?

DIKE AT BAGONG MGA TAHANAN

Ano-ano ang mga pagawaing bayan na dapat gawin gaya ng mga matitibay at pangmatagalang dike o dam laban sa baha?

Paano ba isasagawa ang mga malakihan at malawakang paglilikas tungo sa mga bago at ligtas na tahanan ng mamamayan?

Dapat na isama ng mga kinauukulan ang mga usaping ito kung gumagawa na sila ng mga kaukulang mga plano at programa laban sa baha at para sa mamamayan.

TUKOD PARA SA PAGBANGON

Ngunit hindi sapat ang lahat ng mga nabanggit sa itaas na tulong sa mga dinadapurak ng kalamidad.

Buksan lang ng mga kinauukulan ang kanilang mga tainga at kanilang maririnig ang hinaing ng nakararami sa mga biktima.

Higit na nakararami ang nawawalan ng kahit anoman para sa pagbangon nila sa pagkakatumba o pagkakadapa sa kalamidad.

Nawalan sila ng mga tahanan o hanapbuhay o ama o ina ng tahanan na kanilang sinasandalan at iba pang kamalasan.

Hindi lang mga araw at linggo ang gugugulin dito kundi mga buwan at taon.

ANG PAMAHALAAN

Ano-ano ang mga dapat na gawin para sa mga nakaaawang biktimang ito?

Ang pamahalaan ang dapat na manguna sa mga usaping ito sapagkat ipinasakamay rito ng mamamayan ang kasagutan sa ganitong uri ng kalbaryo sa pamamagitan ng kanilang buwis at pagluluklok sa puwesto ng mga lider sa bisa ng mga halalan at rebolusyon.

Kung mayroon mang magagawa ang iba ay walang iba kundi ang umalalay.

Tatandaang pinaiiral ng lahat ang kusang paglingap sa iba sa oras ng pangangailangan.

UZI-TEXT

Tunghayan naman natin, mga Bro, ang ilang mensahe ng ating mga tagasubaybay.

PUNA SA MILITANTE

Good am po, sir. Nasaan ang diwa ng mga militante, bakit tahimik sila sa pakikialam ng Tsina sa sakop nating karagatan? Tayong mga Filipino, ngayon natin ipakita na Filipino tayo. Kahit malakas na bansa ang ating kalaban, ipaglaban natin ang sa atin. +63930290….

PROBLEMA SA HELMET

Sir Benny! Tama po ba  ang ginagawa ng dti at ng gobyerno, tungkol dito sa motorcycle helmet act of 2009? Dito sa Naga City, kailangan ba na bibili ka muna ng helmet bago tatakan ng dti ng icc? Paano po kung ang nabili kong helmet ay ‘di pumasa sa kanila? ‘Di po ba dapat na ang bantayan nila ay ang pagbebenta at pagma-manufacture ng mga gamit (tulad ng helmet) na substandard, bago pa man ibenta at makabili ang consumer? Ang dami po kasing traders dito na ang ibinebentang helmet ay puro imitation. Kawawa ang consumers, sila palagi ang sumasalo ng mga kabulukan sa gobyerno! +63939374….

Magandang hapon po. Nabasa ko sa inyong ultimatum ang tungkol sa helmet ng mga nagmo-motor. Dapat ‘yung gumagawa ng mga sasakyan na yan ay dapat na magbigay ng libreng helmet. Salamat po. +63947320….

PROBLEMA SA TRAYSIKEL

Magandang hapon po. Ipinararating po naming homeowners ng Olympia Subdivision, ng Brgy. Labas, City of Sta. Rosa,  Laguna ang tungkol sa tricycle association dito. Ang unang kalsada sa unang kanto pagpasok po ninyo ng Olympia ay ginawang terminal na kaliwa’t kanan. Nilagyan pa nila ng sign na “No entry!” Walang magawa ang pamunuan at mayor’s office sa  problema namin sa ‘di malamang kadahilanan.

Kami po’y inyong masugid na mambabasa ng pahayang remate at umaasa kami na inyong matutulungan, kahit sa usok ng tambutso at ingay ng radyo na ubod nang lakas. Salamat po. Concerned citizens. Si Marcelo Tangonan ang brgy. captain at si Arlene Arcillas ang mayor namin. +63935127….

oOo

Anomang reklamo o puna ay maaaring iparating sa 09214303333.

loading...

About Gwenn

You must be logged in to post a comment Login

Leave a Reply