Comelec, reresbakan ng ALAM

TINIYAK ng Alab ng Mamamahayag (ALAM) na reresbakan nito ang Comission on Election (Comelec) sa pagbasura ng kanilang aplikasyon sa akreditasyon bilang party list sa pamamagitan ng pagbibigkis ng Puwersa sa iba pang grupo na pinagkaitan ng aprubal.

Sa ipinalabas na pahayag, sinabi ng ALAM na “sa gitna ng mga kaganapan sa nakalipas na mga araw, kabilang na ang pagtatangka ng pangingikil ng dalawang empleyado ng Commission on Elections at pagbabanta ng libelo laban sa aming grupo, ang Alab ng Mamamahayag (ALAM), hinihimok naming ang iba pang mga aspirante sa party-list na makipagsanib-puwersa sa amin sa pagnanais na tuligsain ang pag-aabuso sa ating karapatan na kumatawan sa ating mga miyembro at ang mga marginalized na sector ng lipunan.”

“Alam namin na maraming mga aplikante sa party-list, tulad ng ALAM, ang tinanggihan ng akreditasyon dahil sa nabigong sumang-ayon sa maling gawi ng ilang mga tiwaling opisyal/empleyado ng COMELEC na walang takot na humingi ng salapi kapalit ng pag-apruba sa kanilang application for accreditation,” ayon sa ALAM.

Anila, subalit, naging pipi ang COMELEC tungkol sa isyu sa katunayan ay nagpakita pa ng kawalan ng interes sa ating adhikain.

“Ang tanging paraan para maibahagi natin ang ating paniniwala sa pagtaguyod ng ating mga prinsipyo at pagsanggalang sa ating karapatan kumatawan sa ating mga miyembro ay ang magkaisa tayo laban sa korapsyong nagbibigay ng dungis sa COMELEC,’ giit ng ALAM.

Dahil ditto, nananawagan ang ALAM sa lahat ng ibinasurang party list na makipagtuungan sa krusadang linisan ang electoral system laban sa panloloko at pagwalis sa mga tiwaling opisyal ng Comelec na siyang gumigiba sa pundasyton ng demokrasya na nakaluklok sa karapatan na maghalal ng taong karapat-dapat na namuno sa bansa.

“Kami sa ALAM ay handang sumuporta sa lahat sa adbokasiyang ito na mapabalik ang kredibilidad sa ating politika at halalan,” giit ng ALAM.

“Hindi dapat tayo matakot dahil ang ating ipinaglalaban ay ang kabutihan ng ating lipunan laban sa katiwaliang dumudurog sa ating kalayaan at mga karapatan na dala ng kasamaan sa ating lipunan. Dapat na magkapit-bisig tayo kahit pa ang laban ay maging madugo o marahas,” patapos ng grupo.

loading...

About accounting

You must be logged in to post a comment Login

Leave a Reply