Mag-ingat kay Lawin at 8 oras ng mga parak

HINDI natin iiwanang usapin ang bagyong Lawin.

Iniisip kasi natin, mga Bro, ang binabagyo sa mga araw na ito hanggang sa huhupa ang bagyo marahil sa araw ng Linggo.

Nakatatakot naman talaga ang lakas ng bagyo na 240 kilometro ang bugsong hangin at mahigit 200 kilometro ang mahinang kampay nito.

Dahil sa lakas ng bagyo, nagbabala ang Philippine Atmospheric, Geophysical and Astronomical Services Administration sa lahat ng pumapalaot sa karagatan na huwag muna silang lulusong.

Kahit ang mga barko ay bawal ding maglayag sa mga lugar na sinasalanta ng bagyo gaya ng Paciic Ocean, China Sea at Babuyan Channel.

PAGASA ‘WAG TUMIGIL

Tama lang ang utos ng Palasyo na sa pagkakataong ganito, oras-oras dapat na mag-ulat ang PAGASA sa bayan.

Hindi uubra ang twitter o facebook lamang.

Kailangang maipaabot sa lahat ng mga binabagyo ang mga ulat ng panahon sa pinakamagaan na paraan.

Ang de-bateryang radyo ang epektibong paraan sa mabilis na pagbabalit.

Twitter, Facebook waepek

Sa bagyo kasi, mga Bro, karaniwang nalalagot ang mga kawad ng kuryente at natutumba ang mga poste.

Blackout ang ibig sabihin niyan at wala nang silbi ang mga twitter at facebook dahil ang mga computer ay hindi magamit.

Maganda rin kung magamit ang mga cellphone.

Kaya pupuwedeng gamitin o padaluyan dito ang mga balita.

Magandang makuha ng mga kinauukulan ang lahat ng mga cellphone ng mga kapitan, kagawad, mayor, konsehal, gobernador at iba pang mga susing tao sa mga nasasalantang lugar.

Maganda ring matiyak na may mga radyong transistor ang mga ito para sa malawak na komunikasyon.

Bahala na ang mga opisyal ng pamahalaan na nabanggit na makipag-uganayan sa lahat ng apektadong mamamayan.

Baha, tsunami, landslide

Ang talaga namang babantayan diyan ng lahat ay ang mga baha, landslide, tsunami at pagkawasak ng mga tahanan at gusali.

Dito nagaganap ang mga kamatayan at disgrasyang grabe.

Ang lahat ng ito ay dapat na maipaalam nang mabilis lalo na sa mamamayan upang mailigtas nila ang kanilang mga sarili sa kapahamakan.

At magagawa ang mabilis na impormasyon o balita sa pamamagitan ng mga radyo at cellphone.

Karaniwan kasing napaparalisa ang mga opisyal ng bayan o malalayo ang mga ito sa mga delikadong lugar.

Karaniwang nasa ligtas na lugar ang tahanan o opisina ng mga ito at tungkulin nila na isipin ang kanilang mga nasasakupan na nasa gitna ng kapahamakan.

DSWD, DA, DPWH dapat kumilos

Ang nasyonal na DSWD at mga lokal na sangay nito ay dapat na maging alerto sa mga kalagayan at kailangan na nabanggit na natin sa itaas.

Dapat na kasama rin ang Department of Agriculture, maging ang Department of Health.

Ang pagbibigay ng pagkain at iba pang pangangailangan ng mga tatamaan ng bagyo kahit sa mga panandaliang sitwasyon lamang ay inaasahan na tutugunan ng DSWD.

Gayundin na hindi dapat magpabaya ang DOH sa mga masusugatan at magkakasakit dahil sa bagyo, baha at disgrasya.

Itong DA dapat ay handang umalalay sa lahat ng mga masisiraan sa produksyon ng pagkain.

At ang Department of Public Works and Highways, dapat itong maging handa sa lahat ng mga lansangan at tulay na maaaring mabaha at mawasak at magiging sanhi ng pagkabara ng daloy ng mga produkto at serbisyo.

8 oras sa mga parak

Okay tayo sa patakaran ng Philippine National Police na gawing otso oras ang duty ng mga pulis.

Sa normal na sitwasyon, makatutulong ito para sa kanila na mamahinga at makasalamuha ang kani-kanilang mga pamilya.

Ang sabi ni NCRPO chief Leonardo Espina, dapat itulad ang mga pulis sa ibang empleyado ng pamahalaan na 8 oras lang ang trabaho.

Ang mga imbestigador

Ang isang nakita nating hindi makasusunod dito ay ang mga imbestigador at kasali sa mga follow-up operation ng kapulisan.

May mga kaso na dapat tutukan ng kung ilang araw at gabi at buwan o taon.

Dapat na ‘yung mga handa na gaganap sa mga trabaho rito ay bigyan ng karampatang benepisyo at iba pang pampalubag-loob.

Sa totoo lang, napakahirap ang masabak sa ganitong sitwasyon.

Lalo na kung itinutulak sila ng mga kinauukulan at ang mga maiimpluwensiya ang nasasangkot.

24 oras na duty

May nagsasabi na kahit wala pa ang mga relyebo ng mga pulis sa kanilang mga duty, pupuwede nang umalis ang mga ito.

Diyan tayo hindi kumporme, mga Bro.

Napakaraming serbisyo ang mga pulis na hindi dapat na basta iwanan.

Baka naman magkandahetot-hetot ang serbisyo ng mga pulis dahil dito.

Dapat makagawa ang PNP ng sistema na maayos ang mga paglilipat ng mga tungkulin.

Yun bang === pairalin pa rin ng mga pulis ang nakasanayan nilang 24 oras ang tawag sa kanila ng tungkulin.

Isa pang punto, hindi dapat na basta na lang sasabihin ng pulis na dahil off-duty na siya ay hindi niya lalabanan ang mga krimen na nakikita at nasa paligid niya.

Paano ang mamamayan kung mangyayari ito?

oOo

Anomang reklamo o puna ay maaaring iparating sa  www.remate.ph o i-text sa 09214303333.

About Thor

You must be logged in to post a comment Login

Leave a Reply