NPC sa 60: Patuloy ang paglilingkod sa bayan

MALAYO na rin ang narating ng National Press Club bilang samahan ng mga mamamahayag sa buong Pinas.

At sa 60 taon nitong buhay at paglalakbay, may nanatiling katangian nito habang marami na rin ang nagbago.

Ngunit ang lahat ng ito ay nagbigay sa NPC ng lalong katatagan at lakas bilang isa sa mga moog ng mga mamamahayag at mamamayan na rin para sa kalayaang pamamahayag.

NOON AT NGAYON

Buhay na buhay ang alaala ng mga pundador ng NPC at makikita ito sa mismong tahanan ng mga mamamahayag na kung tawagin ay National Press Club Building sa Intramuros, Manila at sa tabi ng makasaysayang Pasig River.

Sa kabila ng kasalatan ng pananalapi ng ating mga ninunong mamamahayag, naitayo nila ang ating tahanan na naging kanlungan hindi lang ng mga mamamahayag kundi ng mga ordinaryong mamamayan sa oras ng kadiliman at kagipitan.

Naganap ito noong kasagsagan ng martial law na gumipit sa lahat ng kalayaan ng mamamayan.

Dito lamang matatagpuan noon ang buhay- kalayaan, kahit na nasa loob ka pa ng  kulungan sa mga kampo militar at pulisya.

‘Di ba, comrade Satur Ocampo?

At ito ang pinaninindigan natin hanggang ngayon.

Sinoman ang mga mamumuno sa NPC, dapat na manindigan para sa kalayaan, hindi lang sa larangan ng pamamahayag kundi maging sa pulitika, lipunan at ekonomiya na rin.

PINTUAN BINUKSAN

Sa pakiramdam ng marami noon, tanging ang mga sikat at malalaking mamamahayag at kompanya sa media ang magiging miyembro lamang ng NPC.

Ang kasaysayan na rin ang magsasabi na umabot na sa hinog na panahon ang paglahok kahit ng mga maliliit na mamamahayag at media outfit sa organisasyong ito.

Nagsimula ito sa pagpasok ng may kabataan na mga pinuno ng NPC mula kay  Louie Logarta, Roy Mabasa, Jerry Yap at ang iyong abang lingkod.

Simula noon, na-level na ang playing field kung tawagin.

Magkakapantay na bilang mga pinuno at miyembro ang mga malalaki, sikat, maliliit at hindi kilala.

At ito na rin ang nagbigay ng higit na lakas at tatag sa NPC para humarap sa mga nagbabagong anyo ng mga kalaban sa kalayaan.

MASAKER AT IBA PA

Nadatnan natin ang matinding pagsubok sa mga mamamahayag: ang pagpaslang sa kanila bilang ultimate censorship.

Kung noong martial law, eh, ang pagsasara at pagkumpiska sa mga media outfit at pagkontrol sa mga ito ang isinusuka, kasama na ang pagpapatahimik sa mediamen, ngayon, ang pagpaslang at masaker ang ating kinakaharap.

Mahigit na sa 150 ang pinagpapatay simula nang maging malaya tayo bilang bayan noong 1986.

Hindi nakuntento ang mga kalaban ng kalayaan sa pagdi-demanda sa atin sa libelo at pagkukulong sa atin.

Inaasinta mismo ang ating buhay upang ganap na tayong manahimik at makulong sa kamatayan.

Ito’y upang mapagtakpan ng mga corrupt, mandarambong at abusado ang kanilang mga krimen sa pamahalaan at bayan.

PINAKAMALAKING HAMON

Ang pagpatay sa mga mamamahayag ang maituturing kong pinakamalaking hamon sa hanay ng mga mamamahayag.

Kapag tayo’y pinagpapapatay, balewala ang lahat ng mga usapin sa libelo, sa ilalim man ng revised penal code o sa cyber law. Balewala rin ang problema natin sa pagkakakulong.

Sapagkat sinong patay nang mamamahayag ang masisiil sa kanyang kalayaan at makukulong?

KALIGTASAN NG MAMAMAHAYAG

Dahil sa mga pagpaslang sa ating hanay, gumagawa tayo ng paraan upang ganap na masugpo ito. Lumalapit tayo sa mga kinauukulan para magkaroon ng mga organisadong pagkilos bilang proteksyon sa buhay ng mga mamamahayag.

Nakalulungkot nga lamang isipin na maraming pagkakataong tayo’y napababayaan, lalo na sa antas ng prevention ng pagpaslang sa atin.

At kahit pa makaraang tayo’y pagpapaslangin.

Ang nakalulungkot, higit na nakakikilabot isipin na galing mismo sa mga kinaukulan ang karamihan sa mga berdugo na kumikitil sa ating buhay bilang mamamahayag.

Kaya gumagawa na rin tayo ng mga paraan upang hindi lang tayo dapat umasa sa iba kundi mismo sa sarili nating hanay.

KRIMENG LIBELO

Sa kasalukuyan, mga Bro, problema rin natin ang pagbabagong-anyo ng paninikil sa ating kalayaan bilang mamamahayag.

At hindi na lang tayo ang ginigipit kundi maging ang mamamayan.

Yun bang === sa pamamagitan ng batas na cybercrime prevention act of 2012 o cyberl law.

Hindi na lang tayo ang ginigipit sapagkat kasama na ang mamamayan dahil sa paggamit nating lahat ng internet sa pamamahayag.

Hindi na lang ang mga mamamamahayag ang naglalabas ng kanilang mga  nalalaman at puna sa mga kinauukulan kundi maging ang mga ordinaryong mamamayan sa pamamagitan ng Facebook, Twitter, cellphone at iba pa.

Kambal na pagkakulong na ating aabutin dahil sa paggamit ng mga anti-kalayaan ng libelo sa revised penal code at

cyber law.

Dito, pinagsisikapan ng NPC na isulong ang dekriminalisasyon ng libelo upang lumaya na tayo sa pagturing na tayo’y kriminal sa pagbabalita ng mga pangyayari at katotohanan.

Sa edad na 60, magpapatuloy ang NPC sa paglilingkod hindi lang sa mga mamamahayag kundi sa mamamayan.

Mabuhay ang NPC!

oOo

Anomang reklamo o puna ay maaaring iparating sa 09214303333.

loading...

About Gwenn

You must be logged in to post a comment Login

Leave a Reply