Christmas party at smuggled rice ipamigay

benny antiporda

DUMARAMI ang mga samahan na nagkakansela ng kanilang mga Christmas Party.

May ilan ngang asosasyon sa ating hanay ang nagdesisyon nang hindi magdaos ng Christmas Party at sa halip ay tumulong na lang sa mga pagkilos para ayudahan ang libo-libong biktima ng bagyong Pablo.

Nauunawaan natin, mga Bro, ang nararamdaman ng mga nagkakansela ng kanilang dapat sana’y masayang pagsalubong sa pagkakapanganak ni Kristo Hesus.

Pupuwede nilang hanapin ang kanilang saya sa pamamagitan ng pagmamalasakit at pagpapakita ng pagmamahal sa kanilang mga kapwa na nangangailangan.

GUTOM PAKAININ, UHAW PAINUMIN

Walang kakayahan ang sinoman sa atin na mambuhay ng mga namatay, katulad ng mga ginagawa noon ni Kristo at ng kanyang mga apostoles.

Ngunit makakayanan nating bigyan ng buhay ang mga naghihingalo sa pisikal at iba pang nilang kalagayan.

Maituturing na naghihingalo ang mga nakararanas ng gutom, uhaw, sakit, walang saplot at tila walang kinabukasan makaraan silang hampasin ng bagyong Pablo.

Nakabubuhay ang pagpapakain sa mga nagugutom, pagpapainom sa mga nauuhaw, panggagamot sa mga nagkakasakit at nasusugatan at pagbibigay ng pag-asa sa mga nawalan ng mga pamilya at naulila.

PAGLIMOT SA LUNGKOT

Habang dumaraan ang mga araw, dumarami ang mga naiuulat na namamatay.

Kamakalawa, mahigit na 600 lamang ang mga ito. Kahapon mahigit nang 700.

Pataas-pababa naman ang mga naiuulat na nawawala. Minsang inabot ng kanilang bilang ang kulang-kulang sa 1,000, bumaba sa nasa 600 at kahapon, tumaas naman sa 800.

Ito’y dahil sa pag-abot na ng mga search and rescue teams maging sa mga dati’y hindi nararating sa iba’t ibang kadahilanan.

Daan-daan din ang matitindi ang sugat na inabot mula sa pagkabali ng kanilang mga buto hanggang sa nakatetenaong sugat mula sa bakal.

Ang nagkakansela ng kanilang Christmas Party ay kumikilos ding tumulong sa mga nabuhay na biktima na lumimot sa puno ng kamatayan at paghihirap na kalamidad.

KATANUNGAN SA IBA

Kung naiisipan at nagdedesisyon ang iba na magkansela ng kanilang mga Christmas Party alang-alang sa mga biktima ng kalamidad, katanungan na rin para sa ting lahat kung sumunod tayo sa kanila.

Anoman ang naiisip at ginagawang desisyon ng ating kapwa sa usaping ito, kalayaan nilang buombuo ang gumawa ng nararapat na kaisipan at desisyon.

Ang mahalaga ay hindi sila nakalilimot na sa kapaligiran ay may mga sobrang lungkot na pangyayari.

Para sa mga nagdaraos o magdaraos pa lang kanilang mga pagsalubong kay Kristo sa kapanganakan nito, wish lang natin sa kanila na maging makabuluhan ang lahat ng kanilang mga oras sa pagsasagawa nito.

KUMPISKADONG MGA BIGAS

Sa pag-abot ng mga tumutulong sa lahat ng mga nasalanta, naaabutan nila ang mga biktimang ilang araw o isang linggo nang hindi kumakain.

Ang mga bata, wala nang panggatas at sila’y nanghihina na.

Wala naman silang matatakbuhan sapagkat ang lahat ng mapagkukunan ng pagkain sa paligid ay sinira na ng bagyo, baha at landslide.

Dito natin naisip ang mga bigas na nakukumpiska ng Bureau of Customs.

Nasaan na nga pala ang daan-daan at libo-libong sakong bigas?

Nananatili ba ang mga ito sa mga bodega at hindi ginagalaw ang mga ito dahil bahagi ang mga ito ng mga kasong nakabimbin sa mga hukuman dahil sa mga kasong smuggling o iba pang kaugnay na kaso?

Kung nagaganap ito at hindi man lang naiisip ng mga awtoridad na posibleng gamitin ang mga ito para sa emergency, para sa malawakang gutom ngayon sa Mindanao at Visaya, hindi kaya malaking kamalian yan?

Mungkahi natin na ipaglalabas ang mga ‘yan, dalhin sa mga nangangailangan at ipamigay sa kanila.

Hayaan natin ang mga kaso na gumulong at kung matatalo ang pamahalaan, magbabayad na lang ito para sa mga sinomang tunay na may-ari sa mga ito.

KUMPISKADONG IBANG PAGKAIN

Kung ipamamahagi ang mga bigas na nakukumpiska ng pamahalaan mula sa mga nagpapalusot ng mga epektos o smuggler kung tawagin, mungkahi nating gawin din ito sa mga nakukumpiskang ibang pagkain.

Ang mga delata, karne sa anomang anyo, gulay at iba pang nakukumpiksa ay pag-aralan ng husto.

Kung “fit for human consumption” ang mga ‘yan, dapat nang madala patungo sa mga biktima ng kalamidad.

Dapat na mapakain ang mga nagugutom upang mapigilan ang kamatayan at [pagkakasakit dahil dito.

Parami nang parami ang mga namamatay at nagkakasakit hindi na dahil sa landslide, baha at lamig kundi dahil sa kawalan o labis na kakulangan ng maipalaman sa kanilang mga sikmura.

Hayaan din ang mga kaso na gumulong laban sa mga pinaghihinalang smugglers.

Kung mapatutunayan na nagkamali ang pamahalaan, hayaan ang mga nawalan ng negosyo o produkto na mabigyan ng katarungan.

‘Yun bang === ibalik sa kanila ang mga nawala sa pamamagitan ng mga danyos at iba pa.

Alalahaning hindi lahat ng aksyon ng pamahalaan laban sa mamamayan ay tama at hindi na mababali.

O kilos na kayong mga kinauukulan.

oOo

Anomang reklamo o puna ay maaaring iparating sa 09214303333.

loading...

About Gwenn

You must be logged in to post a comment Login

Leave a Reply