Kamara, hati sa same-sex marriage

HATI ang mga kongresista sa plano ni House Speaker Pantaleon Alvarez na maghain ng panukalang batas na magsasaligal ng same-sex marriage sa Pilipinas.

Ayon kay House Deputy Speaker Pia Cayetano, suportado niya ang same-sex marriage bill dahil gaya ng Reproductive Health (RH) Law ay matagal nang panahon na dapat natatalakay ito at mabigyan ng pagkakataon.

Giit pa ni Cayetano, mainam na isantabi na ang biases sa isyu dahil kailangan na talagang isaalang-alang ang usapin para sa karapatan at kapakanan ng mga dumaraming Lesbian, Gay, Bisexual at Transgender (LGBT) community.

Pero para sa pro-life congressman na si Buhay Party-List Rep. Lito Atienza, dapat panindigan ang nasasaad sa batas na ang kasal ay sa pagitan lamang ng babae at lalaki, at walang rason para magbago ito.

Ayon kay Atienza, wala siyang anomang isyu laban sa LGBT community, at sa katunayan ay handa siyang ipagtanggol ang mga karapatan ng mga ito.

Subalit dismayado umano siya sa commitment ni Alvarez hinggil sa same-sex marriage, gayung inihayag nito noon na mas prayoridad ang Federalism at iba pang mahahalagang panukalang batas.

Umaasa si Atienza na magbabago pa ang isip ni Alvarez, at mas bibigyang-bigat ang kasagraduhan ng kasal sa ating bansa.

Dagdag naman ni House Deputy Speaker Fred Castro, bagama’t may tiyak na tututol sa Kamara, marami rin aniya ang papabor sa same-sex marriage lalo’t may tulak ito ng liderato.

Ang siguradong makakalaban aniya’y ang Simbahang Katolika, na mula’t sapul ay ayaw sa kasal ng babae sa babae o lalaki sa lalaki. JOHNNY ARASGA

About Gilbert

You must be logged in to post a comment Login

Leave a Reply