ILANG LEKSYON SA SIBAKAN SA ERC

benny-antiporda12
SIBAK na sa puwesto ang pinuno ng Energy Regulatory Commission na si Jose Vicente Salazar.

Nagsimula o nalantad nang husto ang problema kay Salazar makaraang mag-suicide si ERC Director Francisco “Jun” Villa, Jr. na noo’y pinuno ng Bids and Awards Committee sa kanyang tahanan sa Parañaque noong Nobyembre 9, 2016.

Matapos mamatay si Villa, naglakas-loob na ang ilang opisyal at empleyado ng ERC na magsampa ng kaso laban kay Salazar.

3 BATAS NILABAG

Sa kasong administratibo na isinampa ng mga kasamahan mismo ni Salazar, tatlong batas ang sinasabing nilabag nito.

‘Yun bang === batas laban sa korapsyon na Republic Act No. 3019, batas na Electric Power Industry Reform Act of 2001 o EPIRA o R.A. No. 9136 at Government Procurement Reform Act o RA No. 9184.

Isang Serious Misconduct at dalawang Simple Misconduct ang naging kasalanan ni Salazar batay sa desisyong may pamagat na Administrative Case Energy Regulatory Commission Chairman and Chief Executive Jose Vicente B. Salazar, OP-DC Case No. 17-D-094.

Pagkakasibak sa puwesto ang parusa ni Salazar at hindi na rin siya pupwedeng bumalik at humawak ng puwesto sa pamahalaan.

Wala na rin itong makukuhang retirement benefit at iba pang pakinabang mula sa pamahalaan.

PALIWANAG

Kabilang sa mga naging kasalanan ni Salazar ang pang-iimpluwensya sa mga miyembro ng Bids and Awards Committee na pumasok sa mga kontrata na ang ilang kompanyang kasali ay pinaburan ni Salazar.

Kabilang sa mga kontrata ang pagbili o pag-aayos ng mga kompyuter ng ERC, pagkuha ng mga consultant, pag-renovate ng bahagi ng ERC building at iba pa.

Hindi rin nito nirespeto ang desisyong kolektobo ng kanyang mga kasamahan at basta dinidiktahan ang mga ito o sinosolo nito ang pagdedesisyon ukol sa mga kontrata ng ERC.

At siyempre pa, kumita o nagkaroon siya ng mga benepisyo mula sa mga pinaburan niyang mga kakontrata.

PAANO SI VILLA?

Matanong lang natin: Wala bang makatarungang hakbang pabor sa nagpakamatay na si Villa?

Eh, tila ang mga reklamo ni Villa ay nagkatotoo.

Basta na lang ba charge to experience ang kamatayan ni Villa?

Alalahaning nag-suicide si Villa dahil sa mga akusasyon o laman ng mga demand laban kay Salazar.

At nagkatotoo ang kanyang mga ipinalalaman sa kanyang tatlong suicide note noong buwan ng Agosto 2016 o tatlong buwan bago ito nagkitil ng sariling buhay.

Hanggang sa pagkakasibak na lang ba kay Salazar ang katarungan para kay Villa?

Paano kaya kung masundan ng mga kasong kriminal ang kasong administratibo ni Salazar?

Para naman maranasan nito ang makulong bilang parusa sa kanya… magiging guilty siya.

OMBUDSMAN

Tiyak nang alam ni Ombudsman Conchita Carpio-Morales ang kaso ni Salazar.

Bata ni dating Pangulong Benigno Aquino III si Salazar. Dating Justice Undersecretary ito na binunot ni PNoy para maging pinuno ng ERC noong Agosto 5, 2015.

Binigyan ito ng pitong taon na panunungkulan bilang bosing ng ERC. Ngayon, isang hamon kay Omb. Morales ang kaso ni Salazar.

Aaksyon kaya si Madam Ombudsman Morales para mapanagot sa kasong kriminal si Salazar at mabilanggo?

MAY INISYATIBA

Kahit walang magdedemanda na mamamayan, kusang umaaksyon ang OMB sa mga kasong nakararating sa kanila.

Bahagi ito ng kanilang batas at tungkulin.

Minsan nang may nagsabing taga-OMB na hindi na sila magbubusisi ng mga problema ng mga opisyal at empleyado na sakop ng hurisdiksyon ng OMB hangga’t walang magsasampa ng demanda at sa tamang anyo pa, ha!

Pero naniniwala ang lahat na dapat may sariling palo ang OMB at hindi magiging de pukpok gaya ng isang pako na kailangang martilyuhin bago ito bumaon.

REKLAMO NI DIGONG

Sa kaso ni Salazar, tingnan natin kung tatama ang reklamo mismo ni Pangulong Rodrigo Duterte na may tinititigan sa tinitingnan ang OMB.

Impartial o namimili umano ang OMB ng kinakasuhan.

At buod ng reklamo ni Digong na kung kaalyado ni PNoy ang may kaso, hindi gaanong pinapansin ni Morales samantalang ang mga kaso ng mga kaaway ni PNoy ay mabilis pa sa alas-kwatro na inaaksyunan ni Morales.

O hamon po ‘yan sa inyo, Madam Ombudsman.

oOo
Anomang reklamo o puna, mangyaring i-text lamang po sa 09228403333. ULTIMATUM/BENNY ANTIPORDA

loading...

About Gilbert

You must be logged in to post a comment Login

Leave a Reply