MANILA, Philippines – Lumagda ang Philippine Coast Guard (PCG) at Commission on Higher Education(CHED) ng Memorandum of Agreement (MOA) sa monitoring shipboard training para sa mga maritime students.

Pinangunahan nina PCG Commandant, CG Admiral Artemio Abu, at CHED Chairman, Prof Popoy De Vera III, ang signing ceremony.

Sa ilalim ng naturang kasunduan, bubuo ang CHED ng database ng mga mag-aaral na iniulat ng Maritime Higher Education Institutions (MHEIs) para makasakay sa mga domestic ship para sa pagsasanay.

Kukuha rin ng datos ang CHED regional office para sa wastong pagsubaybay sa mga mag-aaral na sakay ng mga domestic ship na sumasailalim sa pagsasanay.

Ang PCG naman ay magsasagawa ng mga panayam sa mga kadete at Shipboard Training Officer (STO) upang maberipika kung ang mga kadete ay tumatanggap ng wastong pagsasanay.

Dapat ding suriin ng PCG kung ang mga barkong may sakay na mga kadete ay may mga iskedyul ng pagsasanay at ginagamit lamang ang mga kadete para sa mga gawain sa barko na mayt kaugnayan sa layunin ng onboard training program.

Higit pa rito, dapat ding i-validate ang aktwal na bilang ng mga kadete na nakasakay sa barko batay sa pinayagang bilang ng mga deck at engine cadets gaya ng itinatadhana sa mga kaukulang regulasyon ng Maritime Industry Authority (MARINA).

Dapat ding tiyakin ng PCG na tanging mga kadete lamang na present on board ay makikita sa opisyal na listahan ng mga tripulante upang malaman ang ilang mga kasanayan kung saan ang ilang mga kadete ay naglilingkod sa kanilang mga shore-based offices sa halip na maglingkod on board.

Gayundin, dapat iulat ng PCG ang kanilang mga natuklasan sa CHED upang matiyak na ang lahat ng maritime students ay makakatanggap ng wastong pagsasanay sa barko bilang bahagi ng kanilang educational curriculum. Jocelyn Tabangcura-Domenden

MANILA, Philippines – Inaasahang magsisimula na sa Disyembre 2026 ang operasyon ng New Centennial Water Source – Kaliwa Dam Project (NCWS-KDP) na magbibigay ng 600 milyon litro ng tubig kada araw.

Ayon kay Metropolitan Waterworks and Sewerage System (MWSS) administrator Leonor Cleofas, nagsimula na ang tunnel boring mula sa Teresa patungong Morong, sa probinsya ng Rizal na may habang 22 kilometro.

Sinabi pa ni Cleofas na ang 42 pamilya na maaapektuhan ng konstruksyon ng tunnel ng Kadiwa Dam ay aalalayan ng pamahalaan.

Idinagdag pa niya na nakadagdag sa pagkaantala ng konstruksyon ng proyekto ang peace and order situation sa lugar na agad naman nang natugunan ng National Task Force to End Local Communist Armed Conflict (NTF-ELCAC) at Philippine National Police Special Action Force (PNP-SAF).

“Many studies have shown that the Kaliwa Dam is a viable option for preventing water shortage problems in the medium to long term,” sinabi naman ni MWSS chairman of the Board of Trustees Justice Elpidio Vega.

Inalala niya ang naranasang water shortages sa Metro Manila noong 2019. RNT/JGC

MANILA, Philippines – Arestado ang may-ari ng isang printing shop at limang iba pa dahil sa pag-iimprenta at pagbebenta ng pekeng driver’s license sa Sta. Cruz, Maynila.

Kinilala ang mga naaresto na sina Neil Jadonet, 54-taong gulang, negosyante, nakatira sa No. 1697 CM Recto Avenue, Sta. Cruz; mga tauhan niyang sina Orlando Dulay, 52; Christian Bejec, 28; Bernabe Grajo, 39; Dinalyn Coquia, 40; at Alice Braga, 30.

Pasado alas-6 kagabi, Pebrero 1 nang magkasa ng entrapment operation ang Manila Police District- Special Operations Unit, sa printing shop ng mga suspek sa may Recto Avenue.

Ikinasa ang operasyon dahil sa isang sumbong na nagbebenta ang mga suspek ng pekeng driver’s license ng Land Transportation Office (LTO) o mas kilala na “talahib”.

Matagumpay na nakapagpagawa at nakabili ng pekeng lisensya ang mga undercover buyer ng pulisya sa mga suspek dahilan para sila arestuhin.

Nakumpiska sa mga suspek ang isang P500 marked money na ginamit sa operasyon, isang pekeng driver’s license, 2 resibo, isang mobile phone at dalawang placards na gamit para matukoy ang dokumentong gagawin nila.

Kasong paglabag sa Article 172 ng Revised Penal Code o mas kilala na Falsification of Public Documents sa Manila City Prosecutors Office ang mga suspek. Jocelyn Tabangcura-Domenden

MANILA, Philippines – Nagtutulong-tulong na ang Tokyo at Manila para ayusin ang pagpapauwi sa apat na Japanese national na sangkot sa serye ng mga pagnanakaw sa Japan.

Ito ay makaraang mahuli ang mga ito sa bansa.

Ayon sa impormasyon nitong Huwebes, Pebrero 2, sinabi na humiling na ang Japanese police ng transfer ng mga suspek mula sa Maynila kung saan sila kasalukuyang nakakulong.

Umaasa naman si Justice Secretary Jesus Crispin Remulla na masosolusyunan na ang naturang isyu bago pa ang planong pagbisita ni Pangulong Ferdinand Marcos Jr. sa Japan sa susunod na linggo. RNT/JGC

MANILA, Philippines – Duda si Senador Francis Escudero na makalulusot sa Senado ang kasalukuyang bersyon ng panukala na bubuo sa Maharlika Investment Fund.

“I doubt it unless the economic managers get their acts together, come up with a common and unified stand,” pagbabahagi ni Escudero sa panayam ng ANC nitong Huwebes, Pebrero 2.

Nitong Miyerkules ay binusisi ng Senate panel ang naturang panukala na magtatatag sa isang sovereign wealth fund.

Nangako naman si Senate President Juan Miguel Zubiri na hindi niya mamadaliin ang diskusyon para sa MIF, sabay sabing ang kasalukuyang panukala ay nangangailangan pa ng ilang pag-amyenda.

Matatandaan na inendorso ng Kamara ang panukalang batas noong Disyembre ngunit binago pa makaraang makatanggap ng kritisismo mula sa publiko ng pangamba sa korapsyon.

Nauna nang ipinanawagan ni Pangulong Ferdinand Marcos Jr. ang agarang pagpasa sa panukala, na inihain ng kanyang anak at pinsan.

“What I can guarantee perhaps on my end would be if it will pass whether in April or March or sometime thereafter, it will not be in the shape, size, color or form that it is right now,” ani Escudero.

Sa bersyon ng Senado sa Maharlika Investment Fund, magkakaroon ito ng dalawang state banks —Landbank at Development Bank of the Philippines— na magbibigay ng inisyal na P75 bilyon na pondo.

Ipinanukala rin sa Senate bill ang paglalagay ng 15-man advisory council at third-party auditor na bubusisi sa paggamit ng pondo.

Samantala, kinwestyon naman ni Escudero ang hindi pantay na alokasyon ng pwesto sa panel ng mga banko na magbibigay ng seed capital.

“They want to adapt best corporate practices, so my question is, why not make the representation in the board proportional to the capital contribution of the entities forming this corporation?” aniya. RNT/JGC