13,000 COVID deaths naitala sa Tsina sa loob ng isang linggo

13,000 COVID deaths naitala sa Tsina sa loob ng isang linggo

January 23, 2023 @ 10:28 AM 2 weeks ago


BEIJING, China – Naiulat sa China ang halos 13,000 COVID-related deaths sa mga ospital sa pagitan ng January 13 at 19, matapos sabihin ng top health official na mayorya ng populasyon ang nasapul na ng virus.

Ito ay kasunod ng pag-ulat ng China na 60,000 indibidwal ang namatay dahil sa COVID sa ospital sa loob lamang ng isang buwan— subalit marami ang duda sa official data dahil kinalos ng Beijing ang anti-virus controls nito noong nakaraang buwan.

Inihayag ng Center for Disease Control and Prevention (CDC) ng China nitong Sabado na 681 hospitalised patients ang nasawi sa respiratory failure dahil sa coronavirus infection, at 11,977 ang namatay dahil sa ibang sakit na sinabayan ng impeksyon sa nasabing period.

Hindi pa kasama rito ang bilang ng mga namatay sa mga tahanan.

Sa pagtataya ng Airfinity, isang independent forecasting firm, magpi-peak ang arawang COVID deaths sa China sa halos 36,000 sa pagdaan ng Lunar New Year holiday.

Inihayag din nito na mahigit 600,000 indibidwal na ang nasawi sa sakit mula nang tanggalin nh China ang zero-Covid policy nitong Disyembre. RNT/SA