15K dayuhan nakapag-report na sa BI 

15K dayuhan nakapag-report na sa BI 

January 13, 2021 @ 6:08 PM 2 days ago

  •  
  •  
  •  

Manila, Philippines – Halos nasa 15,000 mga dayuhan na ang nakapag-ulat sa iba’t ibang tanggapan ng Bureau of Immigration (BI) noong nakaraang linggo sa pagsisimula ng annual report (AR) ngayong taon ng mga foreign nationals na nananatili sa bansa.

Ayon kay Immigration Commissioner Jaime Morente, nasa 5,000 mga dayuhan ang nag-ulat sa BI main office sa Intramuros, Maynila habang ang ibang foreign nationals ay nagpasa ng kanilang AR sa iba’t ibang mga tanggapan ng Immigration tulad na lamang sa mga satellite at extension office sa Metro Manila at probinsiya.

Hinimok naman ni Morente ang ibang mga dayuhan sa BI na magparehistro sa online appointment system ng bureau upang makuha ang kanilang iskedyul sa pag-uulat.

“We advise you to book your appointment slots now and make your report early. As in previous years, this year’s March 1 deadline of the AR is not extendable.  You may visit http://e-services.immigration.gov.ph to schedule your annual report,” ani Morente.

Gayunman, nakitaan na ni Morente ang pagbagsak ng bilang ng mga nag-ulat ngayong taon dahil sa ipinapatupad na travel restrictions dulot ng nararanasang pandemya sa bansa. Noong 2020, mayroong higit sa 77,000 mga dayuhan na nag-file para sa kanilang mga AR.

“There are many of them who are currently out of the country and are not able to come back to the Philippines due to these travel restrictions.  They can, however, still make their report within 30 days from the date of their return,” paliwanag ni Morente.

Sa ilalim ng alien registration act, ang mga dayuhan na may hawak na valid immigrant at non-immigrant visas gayundin ng valid alien certificate of registration identity card (ACR I-Card) ay kinakailangang mag-ulat sa BI sa loob ng unang 60 araw ng isang taon ng kalendaryo.

Ang mga dayuhang mag-uulat ay dapat magpakita ng kanilang mga pasaporte at ACR I-Card at bayaran ang kanilang annual report fee sa gobyerno.

Napag-alaman sa BI na ang mga dayuhang hindi susunod sa naturang taunang pag-uulat ay maaaring mamaharap sa mga parusa tulad ng pagbabayad ng multa, pagkansela ng visa, pagpapatapon, at pagkabilanggo. JAY Reyes


  •  
  •  
  •  

Loading...