Bulacan – Kalunos-lunos ang sinapit ng batang lalaki na siyang bunso sa magkakapatid matapos bawian ng buhay nang malunod ito sa ilog sa bayan ng Pulilan.

Sa Facebook post ng Pulilan MDRRMO, kinilala ang biktimang 14-anyos, residente Brgy. Lumbac ng naturang bayan.

Ayon sa Facebook post ng naturang tanggapan nitong Huwebes, Marso 30, ang biktima ay nalunod sa Tibag river.

Nang matagpuan ng mga rescuer ang katawan ng biktima ay agad itong dinala sa pinakamalapit na ospital subalit namatay na ito.

Tumanggi naman magbigay ng iba pang karagdagang impormasyon sa nangyaring insidente ang naturang tanggapan.

Samantala, napag-alaman naman sa Facebook post ng ilang netizen na kada-taon ay may nalulunod sa naturang ilog.

Bumuhos naman ang pagdadalamhati at pakikiramay ng mga netizen na nakakakilala sa biktima na sinasabing bunsong anak at sidekick ng amang fishball vendor. Dick Mirasol III

ROXAS CITY – Arestado ang isang miyembro ng lesbian, gay, bisexual, transgender, and questioning (LGBTQ) matapos makuhanan ng higit sa P1.7 milyon halaga ng pinaniniwalaang shabu sa isinagawang drug buy bust operation ng mga awtoridad sa lungsod na ito.

Kinilala ang suspek na si Richard Ferrer alyas ‘Cherry’, 38-taong gulang, residente ng Barangay Tiza, ng nabanggit na lungsod.

Batay sa report ng Station Drug Enforcement Team (SDET), nadakip ang suspek sa Barangay V, Roxas City.

Nasa listahan ng street level individual (SLI) ang suspek at isinailalim ito sa monitoring ng pulisya bago inilatag ang operasyon.

Nakuha kay Ferrer ang bulto-bultong shabu na aabot sa halagang P1.7 milyon matapos makabili ang operatiba ng 1 pakete na nagkakahalaga ng P2,000.

Nahaharap ngayon sa kasong paglabag sa illegal drugs ang suspek. Mary Anne Sapico

MANILA, Philippines – Magsasagawa ng motorcade ang Quiapo Church at ipaparada ang imahe ng Itim na Nazareno sa paligid ng Maynila sa Abril 7, Biyernes Santo, sinabi ngayon ni Quiapo Church spokesperson Father Earl Valdez.

Alas-12:01 ng umaga magsisimula ang Nazareno motorcade ngunit hindi pa napag-usapan ang ruta.

Sinabi ni Fr. Valdez na bagamat daragsa ang mga deboto, hindi ganung kalaki ang crowd tulad ng Nazareno 2023.

Sabi ni Valdez, ang tradisyonal na Traslacion ay maaaring maibalik sa 2024 sa pagdiriwang ng Feast of the Black Nazarene at lahat ng aktibidad sa Simbahan kasama ang Good Friday motorcade ay magsisilbing preparasyon para sa susunod na Kapistahan ng Nazareno.

“Maaaring bumalik sa nakasanayang Traslacion ang Nazareno 2024, subalit mas aayusin at paiigtingin po natin na may pag-alala sa mga natutunan natin ngayon at sa nakaraang Nazareno 2023,” sabi ni Valdez.

Ang Traslacion ay ang prusisyon na nagdadala ng imahe ng Itim na Nazareno mula sa Quirino Grandstand pabalik sa Quiapo Church.

Mula noong 2021, kinansela ang aktibidad dahil sa pandemya ng COVID-19.

Samantala, sinabi rin ng Quiapo Church na daragdagan ang seguridad para sa Semana Santa. Jocelyn Tabangcura-Domenden

MANILA, Philippines – Kinumpirma ng Philippine Coast Guard (PCG) na pawang mga “wanted” pala ang pitong Chinese na sakay ng isang barko na nasagip sa Eastern Samar noong Enero.

Ayon kay Rear Admiral Armand Balilo, tagapagsalita ng PCG, hindi pala mangingisda ang mga Tsinong sakay ng barkong MV Kai Da 899 kundi mga wanted criminal.

Nasa Tacloban City ngayon ang ilang mga kinatawan ng Chinese Embassy at Bureau of Immigration o BI para maiturn-over na ng PCG ang 7 Chinese.

Ang mga dayuhan ay “subject for deportation” na rin.

Sinabi ni Balilo na maaring intensyong tumakas ng mga Chinese national at inakalang makalulusot sila sa ating bansa.

Wala rin aniyang kahit anong certificate o dokumento na galing sa kanilang bansa ang pitong Chinese national kaya nagduda ang PCG at nakipag-ugnayan sa Embahada ng China, kung saan napag-alaman na may mga rekord o nagawang krimen nga ang mga ito. Jocelyn Tabangcura-Domenden

MANILA, Philippines – PATAY ang isang 71-anyos na lolo matapos mabangga ng motorsiklo habang naglalakad sa gilid ng kalsada sa Malabon City, kamakalawa ng hapon.

Nalagutan ng hininga habang nilalapatan ng lunas sa Tondo Medical Center sanhi ng tinamong pinsala sa ulo ang biktimang si Rolando Cua ng No. 28 Tuazon St. Brgy. Bangculasi, Navotas City.

Hawak naman ng pulisya ang driver ng Suzuki Motorcycle na may plate No. 822DVG na kinilalang si Herwen Maricas, 32, line-man at residente ng No. 86 Ibaba St. Salinas I, Bacoor, Cavite na nahaharap sa kaukulang kaso.

Sa ulat ni PCpl Anthony Codog kay Malabon police chief P/Col. Amante Daro, dakong alas-5:30 ng hapon, naglalakad ang biktima sa gilid ng kahabaan ng C4 road Brgy. Tañong, patungong Tañong Brigde nang mahagip ito ng motorsiklo na minamaneho ni Maricas.

Nagtamo ng pinsala sa ulo ang biktima na agad isinugod sa nasabing pagamutan ng rescue team ng Brgy. Tañong subalit, binawian din ito ng buhay kalaunan.

Dinala naman ng rumespondeng mga tauhan ng Sub-Station 6 ng Malabon police sa Station Traffic Investigation Unit si Maricas at sa koordinasyon sa LTO Central Office ay isinailalim siya sa Alcohol Breath Analyzer and Field Sobriety Test subalit, negatibo ang suspek sa pag-inom ng alak, gayunman isasailalim siya drug test examination. Boysan Buenaventura