Manila, Philippines – Pinasalamatan ni House Speaker Alan Peter Cayetano ang buhos ng suportang ibinibigay ng mga kongresista sa kaniyang liderato kahit ang mga ito ay iba-iba ang Partido.

“I am eternally grateful to every member of Congress for your continued trust and support in the leadership of this House of the People. And now I would ask that we translate this an overwhelming show of unity into action by swiftly passing a great budget that we can all be proud of,” ani Cayetano sa kaniyang Facebook post.

Naniniwala ang speaker na mawawalan ng kabuluhan ang suportang kaniyang natatanggap kung hindi rin lamang maipapasa ang mga panukalang batas na nauukol sa pagsugpo sa pandemya at pagtulong sa mga Pilipinong labis an naapektuhan ng krisis.

“Balewala ang support if we stay in office pero we don’t deliver y’ung priorities ng administration at pangangailangan ng tao. So, y’un po ang puno’t dulo. Hindi po pondo ang pag-uusapan dito kundi priorities.”

Kasunod ito ng pahayag ni Deputy Speaker at Mandaluyong Rep. Boyet Gonzales na kung pababayaan lamang ang Mababang Kapulungan ng Kongreso ay mananatiling Speaker si Cayetano.

Paliwanag ng mambabatas na nagging maayos ang liderato ni Cayetano na ang karanasan sa politika at pagsisilbi ay malawak na aniya dahil nagsimula ito biang councilor, congressman, senador at kalihim ng Department of Foreign Affairs.

“Never has the House experienced a closer relationship and coordination with the Cabinet Secretaries, all because Speaker Alan was also a former cabinet secretary.This is the only time in the history of the House, that a Speaker was once a upon a time, both a former Senator and a cabinet Secretary.”

Sinabi pa ni Gonzales na nararamdaman ng lahat miembro ng kamara ang pagsisikap at mainig na pakikisama ng liderato ni Cayetano lalo ngayon nasa gitna ng pandemya.

“Masalimuot masyado ang sitwasyon sa ating bansa at ng buong mundo sa ngayon. Pati ang Kamara ay naapektuhan sa paraan ng pagtrabaho. But under the leadership of Speaker Alan, the House effectively delivered. And ironically, it is more productive today despite the pandemic,” ani Gonzales. (Meliza Maluntag)

Manila, Philippines – Humirit si Deputy Majority Leader at Pampanga Rep. Juan Miguel Arroyo sa Commission on Elections na pag-aralan ang posibilidad na kanselahin muna ang eleksyon sa 2022.

Sa deliberasyon ng COMELEC 2021 proposed budget ng House Committee on Appropriations ay binigyang diin ng mambabatas ang kaniyang pangamba na maaaring magkaroon ng kontaminasyon ng COVID-19 sa araw ng eleksyon.

Posible rin aniyang kahit handa ang COMELEC ay marami ang hindi magpaparehistro  at marami rin ang hindi makaboboto dahil sa takot sa pandemya.

Ngunit tinugon ito ni Comelec Chairman Sheriff Abas na hindi maaaring ipagpaliban ang eleksyon sa 2022 dahil ito ay mandatong isagawa sa takdang panahon.

Giit ni Arroyo na makabubuting ang mga taga-COMELEC mismo ang magtulak na ipagpaliban ang eleksyon dahil kapag ang mga kongresista ang magsusulong nito ay maaaring pagdudahan ng taumbayan.

Aminado si Abas na mabigat na usapin ang pagpapaliban sa pambansang halalan at wala aniya sa posisyon ng Comelec ang ganitong pagkilos kungdi ito ay nakasalalay sa KOngreso.

Ngunit handa naman aniya ang COMELEC na pag-aralan ang rekomendasyon ni Arroyo kung saan ang gagawin aniya nilang batayan ay ang magiging development sa kalusugan at ang bakuna ng COVID-19.

Sa nasabing budget hearing ay humirit na rin ang COMELEC na ibalik ang tinapyas na alokasyon ng ahensya para sa 2021.

Ang inaprubahan lamang ng Department of Budget and Management na pondo para sa COMELEC sa 2021 ay P14.56 bilyon gayung ang hinihiling nito ay P 30.673 bilyon.

Paliwanag ni Comelec Spokesperson James Jimenez, ang tinapyas na pondo ay gagamitin sana para ipambili ng dagdag na makina para sa 2022 elections at maipatupad ang contingency plan at matiyak na ligtas sa COVID-19 ang halalan.

Sa 2022 ay inaasahang aabot sa 65.304 milyon ang rehistradong botante na magtutungo sa mga presinto para bomoto.  (Meliza Maluntag)

Manila, Philippines – Habang naninindigan ang Armed Forces of the Philippines sa pagsasabing hindi makatarungan ang bintang ng isang mambabatas na Amerikano na sangkot ang AFP at Philippine National Police sa paglabag sa karapatang pantao, inihayag naman ni Interior Secretary Eduardo Año na makatitindig sa sariling paa ang AFP at PNP kahit walang ayuda mula sa Amerika.

Tugon ang nasabing mga paninindigan at pahayag sa panukala ng mambabatas sa Kongreso ng United States na alisin ng pamahalaang US ang ayuda nito sa pulisya at militar ng Pilipinas dahil sa paglabag ng mga ito sa karapatang-pantao.

Sinabi ni AFP Spokesman Major General Edgard Arevalo na hindi makatarungan ang bintang sabay sabing walang anomang paglabag sa karapatang-pantao ang militar.

Kung mayroon mang paglabag, nakahanda ang AFP na tumanggap ng mga reklamo at magsampa ng kaso sa mga suspek.

Hindi umanong mangingiming isalang ng AFP sa court martial at parusahan ang mga sundalo kung may ebidensya ang mga biktima laban sa mga ito.

Gayunman, nilinaw ni Arevalo na nasa kamay ng Kongreso ng US ang desisyon at hindi pupwedeng makialam ang AFP dito.

Sinabi rin ni Arevalo na ang mga naninira sa AFP ang mismong may malalang krimen laban sa karapatang-pantao gaya ng NPA na pumatay mismo sa Inopacan, Leyte sa daan-daang sarili nilang kasama at mamamayan na inakusahan nilang espiya ng pamahalaan.

May mga kaso na umanong nakasampa laban sa mga sangkot sa Inopacan massacre.

Samantala, iginiit naman ni Año na ang usapin sa tulong militar ng ibang bansa sa Pilipinas ay sakop ng Pangulo ng Pilipinas at Department of Foreign Affairs.

Subalit idiniin nitong makatitindig sa sariling paa ang mga pulis at sundalo kahit walang ayuda mula sa US at hindi titigil ang mga ito sa pagprotekta sa mga mamamayan laban sa mga lawless element at komunistang grupo.

Nauna rito, si Pennsylvania Representative Susan Wild ang naghain ng nasabing panukala bilang tugon sa pagpasa ng Kongreso ng Pilipinas ng anti-terror law na sinasabi ng mga kritiko na gagamitin ng mga pwersa ng pamahalaan sa paglabag sa karapatang-pantao.

Itutuloy lang umano ang ayuda kung susunod ang mga militar at pulis sa mga kondisyong inilatag niya.

Kabilang sa mga kondisyon ni Wild ang pag-imbestiga at pagkaso sa mga miliar at pulis na sangkot sa paglabag sa karapatang-pantao, pagtiyak ng sistemang pangkatarungan para mapanagot ang mga violator, pagkakaroon ng proteksyon sa mga obrerong unyonista, mediaman, tagapagtanggol ng human rights, indigenous persons, maliliit na magsasaka, aktibistang LGBTI at kritiko ng gobyerno at iba pa. RNT

Manila, Philippines – Tinatayang nasa 200,000 returning overseas Filipino workers (OFWs) na ang nakabalik sa kani-kanilang mga probinsya, batay kay Department of Labor and Employment (DOLE).

Sa report ng Overseas Workers Welfare Administration (OWWA), inilatag ni DOLE Secretary Silvestre Bello III na 218,205 OFWs na ang natulungan buhat nitong Mayo.

Ang pinakabagong batch ay binubuo ng 1,440 OFWs na nagnegatibo sa COVID-19 bago tuluyang pauwiin sa probinsya.

Inihanda rin ng gobyerno ang akomodasyon, pagkain. transportasyon mula sa pagdating sa bansa hanggang makauwi na ng probinsya. RNT/FGDC