MANILA, Philippines- Sumiklab ang isang bus terminal sa Araneta Center, Cubao nitong Huwebes, ayon sa ulat.

Batay sa inisyal na imbestigasyon ng Bureau of Fire Protection (BFP), nagsimula ang apoy bandang alas-4:46 ng hapon, na umabot na sa Task Force Bravo.

Apektado rin sa sunog ang isang food and amusement park.

Ayon sa ulat, sobrang kapal nang apoy at kita mula sa malayo.

Agad na rumesponde ang mga awtoridad sa lugar. Subalit, nahirapan ang mga bumbero na apulahin ang apoy dahil sa dami ng tao. RNT/SA

MANILA, Philippines- Nanatiling ‘buo’ ang P809 milyong cancer fund, ayon sa Department of Health sa kabila ng mga alegasyon ng pagsasabwatan.

Ipinaliwanag ni DOH OIC Maria Rosario Vergeire na sa halip na centrally-procured ang pondo, kailangan nilang direktang ilipat ang pera sa mga ospital para mapabilis ang proseso, na binanggit ang mga pagkaantala noong nakaraang taon.

Inaprubahan aniya ito ng National Integrated Cancer Control Council, ang pinakamataas na policy-making body for cancer control sa bansa kong saan siya noon naging miyembro.

“Dahil nga po ‘yung ating pinabibili dati natin ng gamot ‘yung mechanism natin dati hindi mapayagan ng ating COA (Commission on Audit) because may unliquidated funds ‘yung bumibili po ng gamot natin, so we had to have another means of procurement,” pahayag ni Vergeire. “Wala pong nawala dito sa prosesong ito.”

Sinabi ni Vergeire na ang mga ospital ang siyang nagpapadala ng bilang ng pasyente at gamot na kailangan upang matukoy ang halaga ng pondo na kanilang matatanggap.

Dagdag pa na nakatanggap din ang ibang ospital ng isa pang uri ng cancer funds na kanilang magagamit para makakuha ng gamot.

Inulit din ni Vergeire na ang proseso ay “aboveboard,” na nagsasabing ang National Integrated Cancer Control Council ay binigyan ng mga opsyon kung paano bumili ng mga gamot sa kanser sa panahong iyon.

“Gusto ko lang pong sabihin sa ating mga kababayan, lahat po ng ginawa naming proseso ukol dito sa pagda-download ng pera natin was aboveboard. This was through the National Integrated Cancer Control Council,” anang opisyal.

Sinabi ni Dr. Clarito Cairo Jr., ang program manager ng cancer control division ng DOH’s Disease Prevention and Control Bureau, na inilipat ang mga pondo sa 20 specialized public hospitals sa halip na 31.

Sinabi niya sa kanyang reklamo sa Office of the Ombudsman na lubhang nakapipinsala sa gobyerno at isang matinding kapinsalaan sa mga pasyente ng kanser.

Ayon naman kay Vergeire, hindi pa nila natatanggap ang anumang dokumento kaugnay sa reklamo ni Cairo sa Ombudsman. Jocelyn Tabangcura-Domenden

MANILA, Philippines- Nagbigay na ng “go signal” ang Department of Trade and Industry (DTI) sa pagpapatupad ng manufacturers ng basic necessities and prime commodities (BNPCs) ng taas-presyo sa gitna ng mataas na inflation.

Batay sa pinakabagong suggested retail price bulletin ng ahensya, ang presyo ng 76 o 35% ng stock keeping units (SKUs) ay mas mahal ng ₱0.45 hanggang ₱7.

Samanta;a, 141 o 65% ng SKUs ang walang pagbabago ang August 2022 prices.

Sinabi ng DTI na kabilang sa mga bilihin na nadagdagan ang presyo ang canned sardines in tomato sauce, processed milk, coffee 3-in-1 original, noodles, tinapay, detergent soap, canned meat, candles, at condiments.

“The DTI assures the public that price adjustments were carefully studied and kept to a minimum to ensure that affordable goods are still available in the market,” pahayag nito.

Iginiit ng departamento na mahalaga ang desisyon na pagpayag sa na magtaas ng presyo ang manufacturers “to keep their businesses running” sa gitna ng pagsirit ng presyo ng raw materials, imported products sa mga pamilihan, maging logistics.

Anito pa, walang paggalaw sa presyo ng basic and prime commodities sa nakalipas na anim ba buwan sa kabila ng pagtaas ng halaga ng produksyon.

“The DTI also keeps a close watch over the movements in prices of raw materials and continues to regularly monitor the price and supply of basic goods in the market to safeguard consumers from profiteering,” dagdag nito.

Batay sa datos ng Philippine Statistics Authority, sumampa ang inflation sa 8.7% nitong nakaraang buwan, na pinakamataas mula noong November 2008, mula sa 8.1% nitong Disyembre. RNT/SA

MANILA, Philippines- Isinusulong ni Senate President Juan Miguel Zubiri ang pagsisimula ng exploratory talks sa pagitan ng Pilipinas at Japan sa paglikha ng Visiting Forces Agreement (VFA) sa lalong madaling panahon.

Sinabi ni Zubiri na nakikita niya ang naturang panukala bilang “strategic sense.”

“It makes strategic sense. Japan is an ally, and with ongoing territorial disputes over our waters, we stand to benefit from stronger security cooperation with our allies,” aniya sa media interview.

Ayon kay Zubiri, una nitong Ipinalutang ang ideya sa Philippine – Japan VFA nang makipagkita ito kay  Ambassador Koshikawa Kazuhiko noong nakaraang taon.

Hindi pa nakakarating ang pormal na usapan sa VFA kay Pangulong Ferdinand Marcos Jr. Pero, aniya na paborable ang panahon na ipalutang ang panukala sa pakikipagpulong ng chief excutive kay   Prime Minister Kishida Fumio.

Kasalukuyang nasa Japan si Marcos kasama si Zubiri bilang bahagi ng  Philippine delegation.

“Japan is already offering vital support to our Coast Guard, not just through vessels and equipment but also through other capacity-building opportunities such as training. The VFA will strengthen our partnership even further,” ayon kay Zubiri.

“Peaceful diplomacy remains our foremost move toward conflict resolution, but we also have to be prepared for any eventuality,” patuloy niya. “With Japan on our side, we will be able to empower our Coast Guard and Armed Forces in times of conflict.”

Aniya, makatutulong din ang VFA sa Pilipinas sa panahon ng kalamidad at natural disaster.

“Let us remember that Japan is just as disaster-prone as we are, and so they have made it a priority to ensure that their armed forces are well-equipped to conduct disaster management efforts and rescue operations. Our armed forces can use their disaster management training and knowledge, to help us become a more resilient country as well,” ayon sa lider ng Senado.

Umaasa si Zubiri na susuportahan ng Senado ang panukala.

“Given all the benefits we stand to gain from the VFA, I am hopeful that we will be able to begin formal discussions about it soon, and I am pretty certain that we will be able to garner enough support in the Senate for it,” aniya.

Sa ngayon, tanging sa US may VFA ang Pilipinas. Ernie Reyes

MANILA, Philippines- Itinalaga ni Pope Francis si Monsignor Anthony Celino bilang auxiliary bishop ng Diocese of El Paso, ang ikatlong Filipino-American na obispo sa Simbahang Katoliko sa America.

Ito ayon sa Catholic Bishops’ Conference of the Philippines (CBCP) batay sa anunsyo ng Vatican nitong Miyerkules.

Ang bishop-elect ang unang auxiliary bishop sa El Paso mula nang itatag ito bilang diyosesis noong 1914.

“We thank the Holy Father for his attention and care for the Diocese of El Paso,” sabi ng diocese’s Bishop Mark Seitz.

Ang espiscopal ordination ni Celino ay gagawin sa Marso 31 sa St. Patrick Cathedral.

Ang dalawang iba pang Filipino bishops sa US ay sina Bishop Oscar Solis ng Salt Lake City at Auxiliary Bishop Alejandro Aclan ng Los Angeles.

Si Celino ang kasalukuyang pastor ng St. Raphael Parish sa silangang bahagi ng El Paso, Texas, at ang hudisyal na vicar ng diyosesis.

Ipinanganak siya sa Anda, Pangasinan natapos ng pag-aaral ng philosophy Mary Help of Christians Seminary sa Dagupan City noong 1993 at lumipat sa El Paso area matapos ang kanyang college seminary.

Ipinagpatuloy ni Celino ang kanyang pag-aaral sa teolohiya sa Unibersidad ng Saint Mary of the Lake sa Mundelein, Illinois at itinalaga siya bilang parochial vicar sa St. Patrick Cathedral sa El Paso at pagkatapos ay sa Our Lady of Peace sa Alpine, Texas, pagkatapos ng kanyang ordinasyon bilang pari noong 1997.

Nagsilbi rin siya bilang bise heneral, moderator ng curia, at chancellor ng Diocese of El Paso. Jocelyn Tabangcura-Domenden