MANILA, Philippines – Umapela ng panalangin ang isang opisyal ng Catholic Bishops’ Conference of the Philippines (CBCP) para sa nakatakdang 125th plenary assembly ng kalipunan ng mga Obispo sa pagtatapos ng buwan ng Enero.

Apela ni Military Ordinariate of the Philippines Bishop Oscar Jaime Florencio, nawa ay sama-samang ipanalangin ng mga layko, kasama ang mga consecrated person na mga relihiyoso, relihiyosa at mga pari na maging makabuluhan at matagumpay ang plenary assembly na nakatakda sa ika-29 hanggang ika-31 ng Enero, 2023.

Ayon sa Obispo, mahalaga ang pananalangin ng bawat isa upang gabayan ng Espiritu Santo ang mga Obispo at makikibahagi sa pagtitipon na magkaroon ng kaliwanagan ng puso at isipan sa pagtalakay sa iba’t ibang usaping dapat tutukan ng Simbahang Katolika sa bansa.

Inihayag ng Obispo na kabilang sa matatalakay sa pagtitipon ng kalipunan ng mga Obispo ang mahahalagahang usapin tulad ng patuloy na pagpapatatag ng ugnayan ng Simbahan at pamayanan na bahagi ng patuloy na pagsusulong ng Synodality na panawagan ng Santo Papa Francisco.

Inaasahan din ang talakayan sa higit na pagpapatatag ng iba’t ibang mga tanggapan ng CBCP sa pamamagitan ng episcopal commission, offices at committees na nangangasiwa sa iba’t ibang adbokasiya ng Simbahan sa lipunan.

Nakatakda ang 125th plenary assembly ng CBCP sa Pope Pius XII Catholic Center kung saan sa pangalawang pagkakataon mula ng lumaganap ang COVOD-19 pandemic sa bansa ay muling magtitipon ng personal ang kalipunan ng mga Obispo ng Pilipinas.

Sa kasalukuyan binubuo ang CBCP ng 88-active bishops, dalawang diocesan priest-administrators, at 38 honorary members na pawang mga retiradong Obispo mula sa iba’t ibang diyosesis. Jocelyn Tabangcura-Domenden

MANILA, Philippines – Maaaring magbigay na lamang ng discount sa EDSA Bus Carousel sa halip na magbigay ng Libreng Sakay dahil sa limitadong budget.

Ito ang sinabi ng Land Transportation Franchising and Regulatory Board (LTFRB) nitong Biyernes, Enero 27 sa isang press briefing.

Ayon kay LTFRB chief Assistant Secretary Teofilo Guadiz III, layon nito na mapahaba pa ang P1.2 bilyon na budget para sa naturang programa.

“Malamang ang gagawin dito is we will just be giving discount,” tugon ni Guadiz nang tanungin kung magbabalik na ba ang Libreng Sakay Program sa EDSA Carousel.

Aniya, hindi lamang bus ang sasakupin ng planong discount kundi maging ang iba pang modes of transportation tulad ng jeepney.

Naghihintay pa ang LTFRB sa kautusan mula sa Department of Transportation (DOTr) kaugnay ng pagpapatupad ng programa.

Sa televised public briefing, sinabi ni LTFRB technical division head Joel Bolano na naghihintay na lamang ang ahensya na madownload ang budget sa kanila.

“Hinihintay na lang natin na ma-download sa LTFRB yung budget na P1.2 billion para sa ngayong taon,” sinabi pa ni Bolano.

Samantala, sinabi ni Bolano na nasa P3 bilyong budget ang inilaan para sa fuel subsidies para sa mga public utility vehicles (PUVs).

Matatandaan nagtapos na ang Libreng Sakay Program sa EDSA Bus Carousel noong Disyembre 31, 2022. RNT/JGC

MANILA, Philippines – Maaari nang kumandidato sa Party-list election ang sinumang kandidato na natalo sa nakalipas na eleksyon.

Ito ay matapos ideklara ng Supreme Court En Banc, na labag sa saligang batas ang probisyon sa Party-List System Act at sa Commission on Elections (COMELEC) Rules and Regulations kaugnay sa pagsusumite ng nominees sa ilalim ng party-list-system na nagbabawal sa kandidato na natalo sa nagdaang eleksyon na mapasama sa list of nominees bilang party-list representatives.

Sa desisyon na iniakda ni Associate Justice Jhosep Y. Lopez, kinatigan ang Petitions for Certiorari and Prohibition with Application for the Issuance of Temporary Restraining Order and/or Writ of Injunction na isinampa noong 2021 nina Catalina G. Leonen-Pizzaro at Glen Quintos Albano, pawang mga kandidato para sa party-list representatives noong 2019 National Elections.

Kinwestyon ng mga petitioner ang legalidad ng Section 8 ng Party-List System Act, at Sections 5(d) at 10 ng COMELEC Resolution No. 10717 na nagbabawal sa natalong kandidato na makasama sa list of nominees bilang party-list representatives.

Ayon sa SC ang pagbabawal sa mga natalong kandidato na lumahok agad sa party-list election ay paglabag sa due process at panghihimasok sa karapatan ng natalong kandidato na lumahok muli sa eleksyon.

“The Court found that the prohibition placed on losing candidates violates the constitutional guaranty of substantive due process as it effectively intrudes on the right of losing candidates in the immediately preceding elections from participating in the present elections,” nakasaad sa desisyon.

Binigyan-diin ng SC na hindi maaring gamitin na requirement ng estado ang pagkatalo ng isang kandidato sa nakalipas na eleksyon dahil hindi naman ito pamantayan sa kakayanan ng isang tao na magsilbi sa publiko. Teresa Tavares

MANILA, Philippines – “I am ready.”

Ito ang sinabi ni Senador Ronald “Bato” Dela Rosa nitong Biyernes, Enero 27 makaraang ianunsyo ng International Criminal Court na magpapatuloy na ang imbestigasyon sa brutal na drug war ni dating Pangulong Rodrigo Duterte kung saan namuno ito sa Pambansang Pulisya nang panahong iyon.

“I have no more fears. You can go ahead whatever you want. I am ready. Whatever happens, my life, my future is dependent to the decision of this government,” pahayag ni Dela Rosa sa panayam ng ANC.

Anang Senador, inasahan niya na na magpapatuloy ang imbestigasyon para rito.

“If the Philippine government would cooperate, then I am a part of the Philippine government, so I will cooperate,” sinabi pa ng Senador.

Kung ipatatawag siya ng ICC pre-trial chamber o kaya naman ay magbibigay ng warrant of arrest, sinabi ni Dela Rosa na tatanggapin niya ito.

“Kung magkakaroon ako ng warrant, sabihin ng Philippine government, ‘Okay, i-surrender natin si Bato dun sa International Criminal Court. Ipakulong natin ito sa The Hague.’ Anong magagawa ko? That’s the government’s decision,” aniya.

“Kahit na magtatago ka, if you are wanted by the Philippine government, there’s no way you can hide. Kilalang-kilala ako kaya hindi ako puwede makapagtago,” dagdag niya. RNT/JGC

MANILA, Philippines – Idineklara ng Supreme Court na legal at naaayon sa konstitusyon ang Republic Act No. 10963, o ang Tax Reform for Acceleration and Inclusion Act (TRAIN Law).

Sa desisyon ng SC en banc, ibinasura ang mga petisyon ni ACT Teachers Representative Antonio Tinio at Laban Konsyumer, Inc.

Una nang iginiit ng mga petitioner na labag sa batas ang TRAIN Law dahil bukod sa naisabatas ito kahit kulang sa quorum ang House of Representatives, maituturing din na prohibited regressive taxes ang probisyon na nagpapataw ng excise taxes sa diesel, coal, liquefied petroleum gas, at kerosene.

Ipinunto rin ng petitioners na ang excise taxes ay hindi pabor sa mahihirap at nilalabag ang right to due process at equal protection of laws ng mamamayan.

Gayunman, sinabi ng korte na nabigo ang mga petitioner na patunayan na ang probisyon sa TRAIN Law ay “anti-poor” at maituturing na haka-haka lamang.

Lumabas din sa official Journal ng House of Representatives na may quorum nang ipasa ang TRAIN Law.

Labing-tatlong mahistrado ang bumoto para ibasura ang petisyon, isa ang tumutol habang isa ang hindi nakibahagi. Teresa Tavares