2 tiklo sa pagbebenta ng baril sa Caloocan

2 tiklo sa pagbebenta ng baril sa Caloocan

October 23, 2022 @ 4:11 PM 1 month ago


MANILA, Philippines- Swak sa kulungan ang dalawang lalaki matapos bentahan ng baril ang isang pulis sa naganap na buy-bust operation sa Caloocan City.

Kinilala ni Caloocan Police chief Col. Ruben Lacuesta ang naarestong mga suspek bilang sina Manuel Ibot, 28, at John Romillo 28.

Ayon kay Col. Lacuesta, nakatanggap ng impormasyon mula sa isang confidential informant ang Station Intelligence S4ection (SIS) hinggil sa illegal na pagbebenta umano ng baril ni Ibot sa lungsod.

Kaagad isinagawa ng mga operatiba ng SIS sa pangunguna ni P/Major John David Chua, kasama ang 4th MFC-RMFB NCRPO ang buy bust operation na nagresulta sa pagkakaaresto kay Ibot dakong alas-3 ng hapon matapos bentahan ng baril ang isang pulis na nagsilbi bilang poseur-buyer.

Habang inaaresto bigla na lamang sinunggaban ng kanyang kasabwat na si Romillo ang arresting officer at nagkipagbuno para makatakas sila na naging dahilan upang posasan din siya ng mga pulis dahil sa obstruction.

Nakumpiska kay Ibot ang isang cal. 45, isang magazine na kargado ng pitong bala at buy bust money na dalawang pirasong tunay na P500 bills at 15 pirasong P500 boodle money habang nakuha naman kay Romillo ang isang pouch bag na naglalaman ng 10 pirasong bala ng cal. 45 baril at isang patalim.

Mahaharap ang mga suspek sa kasong paglabag sa R.A. 10591 (Comprehensive Law on Firearms and Ammunition), P.D. 1829 (Penalizing Obstruction of Apprehension and Prosecution of Criminal Offenders) at B.P 6 (Illegal Possession of Bladed, Pointed or Blunt Weapons). R.A Marquez