282 pobre sa P’que bibigyan ng lupa

282 pobre sa P’que bibigyan ng lupa

December 13, 2022 @ 11:43 AM 2 months ago


MANILA, Philippines – Lumagda sa isang Memorandum of Agreement (MoA) si Parañaque City Mayor Eric L. Olivarez para sa pagbili ng lokal na pamahalaan ng lupain sa halagang P67 milyon na ipamamahagi sa 282 mahihirap na pamilya sa Barangay Sto. Niño sa lungsod.

Sinabi ni Olivarez na ang pagbili ng ari-ariang may sukat na 4,772 metro kwadrado sa 1st Street Village Extension sa Barangay Sto. Niño ay bahagi ng programang murang pabahay ng lokal na pamahalaan upang bigyan ng pagkakataon ang mga residenteng magkaroon ng kanilang pinapangarap na sariling bahay at lupa.

“Makikinabang ang 282 pamilya sa pagbili natin ng lupaing ito, na babayaran nila ito sa loob ng 30 taon sa pamamagitan ng buwanang hulog na wala pang isanlibong piso bawat buwan,” ani Olivarez sa flag ceremony.

Matatandaan na nauna nang aprubahan ng Sangguniang Panglungsod ang pagbili ng nabanggit na lupa kung saan kabilang sa mga lumagda sa MoA ang may-ari ng lupa gayundin ang mga opisyal ng 1st Street Village Extension Neighborhood Association (1SVENA).

“Pagkatapos nating maibigay sa mga residente ng lugar ang kani-kanilang titulo, hindi na sila magiging neighborhood association at sa halip ay magiging homeowners’ association na ang grupo nila,” ani pa Olivarez.

Dagdag pa ni Olivarez na ang lokal na pamahalaan ay mayroon nang ipinatutupad na programa tungkol sa pagbili at pamamahagi ng lupain sa mga maralita sa lungsod sa pamamagitan ng Local Housing Development Office (LHDO) at ng Urban Mission Areas Development Office (UMADO) na katuwang ang Social Housing Finance Corporation (SHFC).

Nasimulan ang pagbili ng mga ari-arian para sa socialized housing projects noong panahon ni dating Parañaque City Mayor Edwin L. Olivarez na ngayon ay representante na ng Unang Distrito ng lungsod. James I. Catapusan