3 miyembro ng Krisostomo crime group timbog sa Makati

3 miyembro ng Krisostomo crime group timbog sa Makati

July 17, 2022 @ 10:37 AM 4 weeks ago


MANILA, Philippines – Natimbog sa ikinasang gun buy-bust operation ng pinagsanib pwersa ng Criminal Investigation and Detection Group-Southern Police District (CIDG-SPD), District Mobile Force Battalion-SPD (DMFB-SPD) at ng Makati City police ang tatlong miyembro ng kilabot na Krisostomo Criminal Group na sangkot sa illegal na pagbebenta ng matataas na uri ng baril sa nabanggit na lungsod Sabado ng umaga (Hulyo 16).

Kinilala ni SPD director P/Brig. Gen. Jimili Macaraeg ang mga arestadong suspects na sina Joseph Palarca y Caranto, 37, driver/bodyguard, residente ng Makati City; Jethro dela Fuente y Osorio, 32, driver/bodyguard, residente ng Quezon City at Emmanuel San Jose y Katipunan, 32, executive assistant na nakatira sa Pasig City.

Ayon sa report na natanggap ni Macaraeg, matagumpay na naisagawa ng mga nabanggit na operatiba ang gun buy-bust operation dakong alas 10:30 ng umaga sa A Venue Parking, B. Valdez corner Salamanca Streets, Barangay Poblacion, Makati City.

Bago maganap ang pag-aresto sa mga suspects ay nakatanggap ng impormasyon ang CIDG-SPD mula sa kanilang asset tungkol sa ilegal na operasyon ng kilabot na grupo kung saan isinagawa ang surveillance operation laban sa mga ito.

Nang magpositibo ang kanilang nakalap na impormasyon ay agad na ikinasa ng CIDG-SPD ang gun buy-bust operation na nagresulta ng pagkakaaresto ng mga suspects.

Sa isinagawang operasyon ay nakarekober ang mga operatiba sa posesyon ng mga suspects ng 1 M16-AI caliber 5.56mm rifle with Serial No. 4899784 na di-umano’y bibilhing baril sa buy-bust; 1 Bush Master caliber 223-5.56mm rifle; 3 magazine ng M16-AI caliber 5.56 rifle; 20 bala ng 5.56mm; 3 magazine ng Bushmaster caliber 223-5.56mm rifle; 25 bala ng 5.56mm; 1 Glock 22 Gen 4 caliber .40 pistol na may kasamang magazine na kargado ng 10 bala; ₱1,000 dusted bill na nakapaibabaw sa bugkos ng boodle money; 3 sling bag at ID ng mga suspects.

Ang mga suspects ay kasalukuyang nakapiit sa detention facility ng CIDG-SPD habang ang mga nakumpiskang iba’t-ibang uri ng matataas na kalibre ng baril ay gagamitin sa korte bilang ebidensya laban sa tatlong suspects.

Kasong paglabag sa RA 10591 o illegal possession of high-caliber firearms ang kinahaharap ng mga suspects sa Makati City prosecutor’s office.

“I would like to commend our personnel for the job well done in arresting the members of Krisostomo Criminal Group, this is the result of our intensified intelligence gathering measure here in Southern Metro, this must also serve as warning to those other, stop your illegal activities in our area or you will get caught and put behind bars,” ani Macaraeg. James I. Catapusan