Home METRO 3 NPA patay sa sagupaan sa Negros

3 NPA patay sa sagupaan sa Negros

Image Representation Only

BACOLOD CITY – Tatlong rebeldeng New People’s Army (NPA) ang napatay sa engkwentro sa pwersa ng gobyerno sa Sitio Mansulao, Barangay Pinapugasan, Escalante City, Negros Occidental noong Miyerkules ng umaga, Pebrero 21.

Sinabi ni Lt. Col. J-jay Javines, tagapagsalita ng Army 3rd Infantry Division (ID), ang mga napatay na rebelde ay dalawang lalaki at isang babae. Hindi pa sila nakikilala ng Army.

Sinabi ni Javines na nakatanggap ng impormasyon ang tropa ng 79th Infantry Battalion (IB) tungkol sa presensya ng armadong grupo na nagsasagawa ng extortion activity sa lugar.

Nakasagupa ng mga sundalo ang walong labi ng nalansag na Northern Negros Front (NNF) na pinaniniwalaang bahagi ng grupo ni Roger Fabillar, alyas Arnel Tapang, na may patong na P1 milyon, dahil sa umano’y pagkakasangkot nito sa serye ng mga pagpatay sa Calatrava, Negros Occidental, ayon kay Javines.

Naganap ang isa pang sagupaan makalipas ang tatlong oras bandang alas-2 ng hapon.

Narekober sa encounter site ang dalawang mahaba at isang maikling baril.

Ang mga engkwentro ay naganap ilang araw matapos i-claim ng Roselyn Jean Pell Command-Northern Negros Guerrilla Front ng NPA ang pagpatay sa asawa ng isang barangay kagawad sa Barangay Salamanca, Toboso, Negros Occidental.

Sinabi ni Cecil Estrella, tagapagsalita ng RJPC-NPA, na inaksyunan nila ang mga reklamo laban sa 55-anyos na si Allan Macasling Sr. dahil sa umano’y pang-aabuso at pagbabanta na nagdulot ng takot sa komunidad. Santi Celario

Previous articleMister na nag-amok patay sa rumespondeng pulis
Next articleAlbay Young Farmers Organization pinuri ng solon sa mga karangalang inani nito