MANILA, Philippines – Patay ang tatlong deboto habang sugatan ang tatlong iba pa matapos na makuryente habang sakay ng bangka sa fluvial parade sa Apalit, Pampanga.

Ang parada sa ilog ay taunang isinasagawa kasabay ng kapistahan ni St. Peter the Apostle na magmula sa kaniyang shrine sa Barangay Capalangan papunta sa Pampanga River.

Sa ikinasang imbestigasyon ng awtoridad, sumabit ang bakal ng banderitas ng banka sa live wire na sanhi ng pagkakakuryente ng anim na biktima.

“Hindi raw nila napansin dahil hindi na sila makapili halos madadaanan [sa dami ng bangka]. Natapat sila doon sa medyo mababa na [nakalaylay] na parte ng high tension wire,” ayon kay Police Lieutenant Colonel Jose Charmar Gundaya, hepe ng Apalit Police Station.

“Kahit daw hindi dumikit ‘yon [bakal] basta within 12 inches ang distansya, magkakaroon ng current yung bakal na didikit doon sa high tension wire kasi napakalakas daw ng kuryente nun,” dagdag pa ni Gundaya.

Sinabi pa ng opisyal na tinitingnan nila kung may pananagutan sa nangyaring insidente ang kapitan ng bangka.

Nagtamo naman ng matinding sugat ang isa pa, habang minor injuries lang ang tinamo ng dalawang iba pang biktima.

Sa kabila nang nangyari, nagpatuloy at tinapos pa rin ang prusisyon. RNT

MANILA, Philippines – Isang malaking paghinga sa mga Pinoy ang sasalubong ngayong Hulyo dahil sa inaasahang bababa ang presyo ng liquefied petroleum gas (LPG).

Sa isang advisory nitong Huwebes, inihayag ng Petron Corporation na magpapatupad ito ng P0.40 kada kilo na rollback sa mga presyo ng kanilang household LPG. Magkakabisa ang price adjustment sa ganap na 12:01 a.m.

Ang pababang pagsasaayos ay katumbas ng P4.40 na bawas sa presyo ng tipikal na 11-kilogram na tangke ng LPG.

Sinabi rin ni Solane na ibababa nito ang presyo ng LPG ng P0.36 kada kilo, simula alas-6 ng umaga noong Hulyo 1.

Ang datos mula sa Department of Energy noong Hunyo ay nagpakita ng retail prices ng 11-kilogram LPG cylinder na nasa pagitan ng P879.20 at P1,107.09.

Inanunsyo din ng Petron na babawasan nito ang presyo ng AutoLPG ng P0.22 kada litro nang sabay-sabay.

“Ang mga ito ay sumasalamin sa internasyonal na presyo ng kontrata ng LPG para sa buwan ng Hulyo,” sabi ng kumpanya. RNT

MANILA, Philippines – Nagpaabot ng pagbati si Chinese president Xi Jinping sa kanyang bagong Philippine counterpart na si Ferdinand “Bongbong” Marcos Jr. matapos ang presidential inauguration ng huli, araw ng Huwebes.

Ayon sa Chinese Embassy sa Maynila, nagpadala si Xi kay Marcos ng isang congratulatory letter, kung saan inalala nito ang “important consensus” na kanilang nakamit “on upholding good-neighborly friendship” ng kanilang mga bansa “and joining hands for common development.”

“Xi said he is ready to work with Marcos to chart the course for the development of bilateral ties from a strategic and long-term perspective, and continue to write a great chapter of the China-Philippines friendship and cooperation for the new era, so as to benefit the two countries and their people,” ang pahayag ng embahada sa isang kalatas.

Matapos manalo sa presidential elections noong Mayo, nagkaroon ng phone conversation si Pangulong Marcos kay Xi, kung saan itinuring ng huli ang una bilang “a builder, supporter, and promoter of” ng pagkakaibigan ng dalawang bansa.

Samantala, si Chinese Vice President Wang Qishan ang special representative ni Xi sa inagurasyon ni Pangulong Marcos. Kris Jose

MANILA, Philippines – Idineklara ng kapulisan ang naging inagurasyon ni Pangulong Ferdinand Marcos Jr. na generally peaceful.

Sinabi ni National Capital Region Police Office (NCRPO) regional director MGen Felipe Natividad na ito ay dahil sa “maagang paghahanda at pinaigting na pagpapatupad ng planong pangseguridad ng mga pulis, tropang militar, at mga miyembro ng pwersa ng Pilipinas.”

“Ang pagsisikap ng lahat ay lubos na pinahahalagahan at ang bawat papel ay mahalaga sa tagumpay ng makasaysayang kaganapang ito,” aniya.

Napansin ni Natividad na sa kabuuan ng mga seremonya, ang mga opisyal ng police ay namahagi ng mga pagkain sa mga dumalo sa mga itinalagang freedom parks, kabilang ang Liwasang Bonifacio sa Maynila, “anuman ang grupo o organisasyon na kanilang kinakatawan.”

Ang mga dumalo, sabi ng NCRPO ay “nagtipon at nagpakita ng diwa ng pagkakaisa,” isang pagtukoy sa mensahe ng kampanya ni Marcos.

Nauna nang sinabi ng Philippine National Police (PNP) na humigit-kumulang 15,000 tauhan ang ipapakalat para masigurado ang inagurasyon ni Marcos.

Nagpatupad din ng gun ban sa buong Metro Manila bilang dagdag na hakbang sa seguridad. Magiging epektibo ito hanggang Hulyo 2. RNT

MANILA, Philippines – Nanawagan si dating Pangulong Rodrigo Roa Duterte sa sambayanang Filipino na suportahan ang liderato ni Pangulong Ferdinand “Bongbong” Marcos Jr.

“Let us give all our support to the new administration…tulungan natin sila,” ayon kay Duterte sa isang video na kuha ni dating Presidential Communications Secretary Martin Andanar.

Nagtapos na kasi kahapon , Hunyo 30 ang termino ni Duterte. Pinuri naman nito ang kanyang gabinete bilang “one of the best.”

“I am a student of government. I have been in the government for so long. I assembled one of the best Cabinet ever,” ani Duterte.

“Totoong-totoo ‘yan. Piling pili ko,” dagdag na pahayag nito.

Samantala, namataan naman si Duterte na nag-shopping at nagtanghalian sa Makati City matapos na iwanan ang Malakanyang dahil nagtapos na ang kanyang termino bilang Pangulo ng bansa.

Kasama ni Duterte ang mga miyembro ng Presidential Security Group (PSG.)

Matatandaang, hindi ito ang kauna-unahang pagkakataon na nagpupunta sa mall si Duterte matapos ang special events.

Madalas na nagpupunta si Duterte sa mga luxury watch store, habang nagpunta rin siya sa mall para bumili ng bansa noong 2017.

At nang tanungin si Duterte kung bakit siya nagpunta sa mall matapos na iwan ang Malacañang Palace, ang sagot ng dating Pangulo ay “Kain, that is my favorite restaurant.”

“There is a new government. The transition has been completed and we only have one country and so we only have one president. He is now the head of the government. We should give Marcos our full support,” anito pa rin.

“Huwag na natin guluhin kasi isang bayan lang ito. You know [pag-gumulo] wala ng katapusan, this country will never find peace,” dagdag na pahayag ng dating Chief Executive.

Sa kasalukuyan, nakabalik na ng kanyang hometown sa Davao City si Duterte.
Sinabi nito na matagal na niyang hinihintay ang araw na ito dahil siya ay pagod na at kailangan nang magpahinga.

“It is a killing job so if you really want to be a president… [it will] deprive you of so much sleep,” ayon kay Duterte.

Sinabi rin niya na na-miss niya ang pagsakay sa kanyang motorbike at plano nitong magbyahe sa ilang bayan sa Mindanao.

Samantala, pinasalamatan naman ni Duterte ang sambayanang filipino para sa suporta ng mga ito sa loob ng anim na taon ng kanyang termino.

“goodluck” naman ang wish ni Duterte kay Pangulong MArcos.

ISANG mainit na pagtanggap naman ang ipinakita ng mga Dabawenyo kay Duterte nang dumating ito sa Davao City.

“Dabawenyo niya siya at talagang proud yung mga Dabawenyo na after six years na ginawa niya sa buong bayan, buong bansa ay babal?k na siya sa kanyang siyudad. Pinapasalamatan po siya ng mga Dabawenyo sa ginawa niya sa buong Pilipinas,” ayon kay Senador Bong Go. Kris Jose