3 tiklo sa pagpapaputok ng baril sa Bagong Taon – PNP

3 tiklo sa pagpapaputok ng baril sa Bagong Taon – PNP

January 2, 2023 @ 4:02 PM 4 weeks ago


MANILA, Philippines – Inaresto na ng mga awtoridad ang mga indibidwal na sangkot sa tatlong insidente ng pagpapaputok ng baril o indiscriminate firing sa pagsalubong sa Bagong Taon.

Ayon sa Philippine National Police (PNP) nitong Lunes, Enero 2 ay mayroong tatlong insidente na naitala mula Disyembre 31, 2022 hanggang Enero 1, 2023.

Naitala ang mga kasong ito sa Iloilo, Quezon City at City of Manila na pare-parehong mga naaresto na ang nasa likod nito.

“Dito sa tatlong naitala nating insidente simula noong Dec. 31, 2022 hanggang Jan. 1, 2023 ay walang PNP member [at] walang Armed Forces of the Philippines (AFP) member na nagpaputok ng baril,”
pagbabahagi ni Col. Rederico Maranan, Public Information Office chief ng PNP.

Sinabi rin ni Maranan na may dalawang stray bullet incidents sila na naitala sa kaparehong panahon.

“Nagtamo ito ng minor injuries. Nahuli rin naman iyong gumawa nito,” aniya.

Mayroon naman silang naaresto na 42 katao dahil sa pagbebenta ng illegal na paputok at nakakumpiska ng aabot sa P2.4 milyon na mga kahalintulad na produkto.

Mananatili ang full alert status ng PNP hanggang sa Enero 6. RNT/JGC