5 illegal vape traders kakasuhan ng BIR sa P1.2B tax violations

5 illegal vape traders kakasuhan ng BIR sa P1.2B tax violations

December 14, 2022 @ 1:43 PM 2 months ago


MANILA, Philippines – Naghain ng tax evasion complaints sa Department of Justice ang Bureau of Internal Revenue (BIR) laban sa limang vape traders na itinuturong mayroong P1.2 bilyon na halaga ng tax violation.

Mismong si BIR Commissioner Romeo Lumagui, Jr. ang nanguna sa paghahain ng tax evasion case at unlawful possession of article subject to excise tax laban kina Wei Feng Bao, alyas Sofi Chua ng TAP FOG Philippines, Christina Poa ng Rocket Bull Race Marketing, Sandoval Severino Briones ng SBS Motorcycle Parts & Accessories, Jimy Go ng TAP FOG Philippines at Bibiano Lesaca.

“This is the first one…Sisiguraduhin natin na lahat ng malalaking illegal traders at mga big time smugglers yan ang hahabulin natin at seryoso tayo sa kampanyang ito,” ani Lumagui.

Ang reklamong ito ay bunsod ng isinagawang raid ng BIR noong Nobyembre na nagresulta sa pagkakakumpiska ng napakaraming mga hindi rehistradong vape products.

Sa kasalukuyan ay inaalam na kung gaano katagal nang nag-ooperate ang mga vape traders na ito.

“As I’ve said before we are very serious in our crackdown on this illegal vape traders as well as all other illegal traders na hindi nagbabayad ng karampatang buwis,” giit ni Lumagui.

“Kaya po ang panawagan natin sa mga nais mag negosyo ng mga vape products at kahit mga sigarilyo, magrehistro po kayo at irehistro niyo yung produkto niyo. Otherwise, considered illegal siya at subject to confiscation yan at puwede pa kayong makulong. Kaya po siguraduhin naitn na nakarehistro kayo at magbayad ng tamang buwis,” dagdag pa niya.

Nilinaw naman nito na hindi upang ipakulong ang mga tax evaders sa dahilan nila ng paghahain ng tax evasion cases kundi upang siguruhing na magbabayad ang mga negosyo ng kanilang buwis at maabot ng BIR ang collection target.

“So in addition to this, syempre kailangan natin pagbutihin ang ating serbisyo sa mga tax payers, so of course that’s also one of the priorities that we have in addition to aggressive pursuance of these illegal traders at mga hindi nagbabayad ng buwis,” pagtatapos ni Lumagui.

Matatandaan na nalampasan na ng BIR ang collection target nito sa unang 100 araw ng bagong administrasyon. RNT/JGC