5 patay sa helicopter crash sa Korea

5 patay sa helicopter crash sa Korea

November 28, 2022 @ 6:25 PM 2 months ago


SOUTH KOREA – Lima katao ang nasawi sa nangyaring helicopter crash malapit sa isang Buddhist temple sa Yangyang, South Korea nitong Linggo, Nobyembre 27.

Kabilang sa mga nasawi ay ang 71-anyos na piloto at 54-anyos na mekaniko na naunang pinaniwalang tanging sakay ng bumagsak na helicopter.

Kalaunan ay nadiskubre ng mga rescue workers ang tatlo iba pang katawan kung saan ang isa ay nasa 20-anyos ang edad at dalawang kababaihan.

Sa pamamagitan ng surveillance camera footage ay napag-alaman na ang bumagsak na chopper ay may limang pasahero pala.

Hindi pa inilalabas ng mga awtoridad ang pagkakakilanlan ng mga nasawi hanggang sa oras na ito.

Ang bumagsak na helicopter na S-58T ay ipinarerenta ng lokal na pamahalaan ng Yangyang, Sokcho at Goseong na bumagsak sa isang maburo na bahagi ng nabanggit na lugar na ginamit upang magsagawa ng surveying laban sa forest fires.

Ipinag-utos na ni Prime Minister Han Duck-soo sa Korea Forest Service at mga awtoridad na maayos na tugunan ang nangyaring insidente at tulungan ang pamilya ng mga biktima.

Dahil dito ay nanawagan din siya ng pagpapalakas sa safety rules upang maiwasan na mangyari ang mga katulad nito sa hinaharap. RNT/JGC