8 PUPUGUTAN SA SHABU SA KAPSULA

8 PUPUGUTAN SA SHABU SA KAPSULA

September 5, 2022 @ 6:53 PM 3 weeks ago


NAKIKINIKINITA na natin, mga Bro, na mapupugutan ang 8 kataong nahuli na nagpapasok ng malaking bulto ng shabu sa bansang Saudi Arabia.

Kapag droga kasi ang kaso ng isang tao sa nasabing bansa, tiyak na pupugutan ito bilang parusa.

Kung hindi man ito pupugutan, bibitayin naman.

Walang sinasanto ang mga awtoridad sa nasabing bansa na nagdadala ng droga sa kanila.

47M SHABU SA KAPSULA

Wais ang mga druglord na nagpasok ng nasabing uri ng droga sa Saudi Arabia.

Isinilid nila ang mga shabu sa kapsula na may tatak na Captagon.

Ginagamit ang Captagon bilang gamot na pampataranta.

Pero kwidaw ang anim na taga-Syria at 2 taga-Pakistan na nagismagel ng droga.

Ito’y dahil ipinagbabawal at kinukumpiska ang Captagon sa nasabing bansa.

Nagkamali ang mga druglord sa paggamit ng Captagon at hindi nila natularan ang mga druglord sa Pinas na tsaa ang sisidlan ng mga shabu na ipinapasok nila rito.

Hindi rin nila tinularan ang mga druglord na nagpasok din ng P100 bilyong shabu sa United Arab Emirates sa pamamagitan ng pagsisilid ng mga ito sa pagitan ng mga marmol at ipasok sa nasabi ring bansa.

ISININGIT SA MGA SAKO NG ARINA

Heto naman ang kakaiba sa huling ismagling ng droga.

Bukod sa isinilid ang mga shabu sa maliliit na kapsula ng gamot, anak ng tokwa, inilagay ang sako-sakong shabu sa loob ng mga salansan ng mga kaban ng arina.

Nakapuslit na ang mga arina mula sa pier at nakarating na sa warehouse ng arina nang salakayin ito.

Hayun, nabisto ang ismagling ng shabu na pinakamalaki umano sa kasaysayan ng droga sa Saudi.

WALANG AWA-AWA

Ngayon, tiyak nang haharapin ang parusang kamatayan ng mga Syrian at Pakistani ang kanilang ginawa.

Noong 2019, 184 ang binitay sa pamamagitan ng pugot-ulo at pagbigti ang karamihan sa mga pinarusahan ang mga drug smuggler.

Noong 2018, 149 naman at karamihan pa rin ang ismagler ng droga.

Hindi natututo ang mga drug ismagler na karaniwang kumukuha ng epektos sa umano’y mga Hezbollah group.

Sa Pinas kaya, mga Bro?

Maganda sana kung tularan natin ang Saudi Arabia sa pagpaparusa sa mga drug smuggler.

Hindi dapat kaawaan ang mga gumagawa ng dahilan para maging rapist, magnanakaw, mamamatay-tao at siraulo ang mga Pinoy sa bisa ng droga.

Sana suportahan ng mga kongresman at senador ang panukalang parusang bitay laban sa mga druglord at mga kasabwat nilang taga-pamahalaan at sibilyan.