MANILA, Philippines- Agad na binawian ng buhay ang isang rider matapos na masalpok ng nasa likurang mIxer truck at magulungan pa kahapon sa lungsod ng Quezon.

Kinilala ang biktima na si Henry Sumigao Guianan, nasa hustong gulang, residente ng De Gloria EXT., Area B, Batasan Hills, Q.C.

Agad namang dinakip ang driver ng Sany Mixer truck na may conduction sticker number N1 U945, na si Daniel Calimquim.

Sa ulat ng Quezon City Police District (QCPD) Traffic Sector 3, bandang alas-5:28 ng hapon (August 10), nang maganap ang aksidente sa kahabaan ng Elliptical road sa kanto ng Commonwealth Ave,. Brgy. Old Capitol Site, Q.C.

Sa imbestigasyon ni PSSG Jaime Samson ng Traffic Sector 3, kapwa binabaybay ng biktima sakay ng Honda wave Motorcycle na may plakang 1366-0340455 at ng driver ng Mixer Truck ang kahabaan ng Elliptical road galing sa Kalayaan Ave., patungong Commonwealth Ave., sa lungsod.

Pero pagsapit sa nasabing lugar ay nasalpok ng Mixer Truck ang likuran ng motorsiklo ng biktima dahilan upang bumagsak ito sa semento.

Sa kasamaang palad ay hindi agad naipreno ng driver ang minamanehong mixer truck at nagulungan pa ang rider sanhi ng agarang kamatayan ng biktima.

Nakapiit na ang driver ng mixer truck at inihahanda na ang kasong Reckless Imprudence Resulting in Damage to Property with homicide sa piskalya ng lungsod. Jan Sinocruz

MANILA, Philippines- Nasabat ng mga opisyal ng Bureau of Customs (BOC) sa Ninoy Aquino International Airport ang tatlong pakete ng ilegal na droga na nagkakahalaga ng P14.7 milyon ngayong araw.

Sa ulat ng Port of NAIA, isang outbound parcel sa DHL Warehouse ang naglalaman ng 300 gramo ng methamphetamine hydrochloride (HCL), na kilala sa tawag na shabu, na nakatago sa loob ng wall sticker.

Habang nasa dalawa pang papasok na parcel sa Central Mail Exchange Center (CMEC) ang naglalaman ng Ecstasy na nakatago naman sa loob ng mga karton at bed sheet.

Ang palabas na kargamento ay idineklara na palamuti sa bahay (wall sticker) at sumailalim sa X-ray, na kalaunan ay nagpakita ng mga puting kristal na sangkap. Kalaunan ay napatunayang shabu ito na nagkakahalaga ng hindi bababa sa P2.04 milyon.

Idineklarang “women’s and baby wear gift” ang ikalawang shipment na papasok sa CMEC, ngunit nabuking ito na Ecstasy na nagkakahalaga ng P8.9 milyon. Ang huling shipment, na hindi idineklara, ay nakumpirma rin na mayroong Ecstasy, na nagkakahalaga ng P3.8 milyon.

Ayon sa Port of NAIA, patuloy ang imbestigasyon para arestuhin ang nasa likod ng illegal trade dahil sa posibleng paglabag sa Republic Act (RA) 9165, o Comprehensive Drug Act at RA 10863, o Customs Modernization and Tariff Act (CMTA). JAY Reyes

MANILA, Philippines- Tinatayang nasa higit P46 milyon halaga ng mga ismagel na sigarilyo ang muling nasamsam ng mga tauhan ng Bureau of Customs (BOC) Port of Subic na nagmula sa bansang Singapore.

Ayon sa BOC, nakatanggap ang Port ng impormasyon sa nasabing kargamento, na nagresulta sa pagpapalabas ng Pre-Lodgement Control Order. Nasa kabuuang 1,122 master case ng Marvels Filter Cigarettes na idineklara bilang mga tela ang natuklasan sa pisikal na pagsusuri.

Sa isinagawang imbestigasyon, na ang nagsilbing consignee ng nasabing kontrabando na Proline Logistics Philippines Inc., ay hindi rehistradong SBMA locator ng mga dayuhang sigarilyo at produktong tabako. Hindi rin ito kasama sa listahan ng Bureau of Internal Revenue (BIR) List of Registered Importers of Cigarette Brands.

Dahil dito, naglabas ng warrant of seizure at detention si Maritess T. Martin, District Collector ng Port, laban sa shipment dahil sa paglabag sa National Tobacco Administration (NTA) Memorandum Circular No. 03 at Republic Act No. 10863, o ang Customs Modernization Tariff Act.

Matatandaan na noong nakaraang buwan ay nasamsam ng nasabing Port ang dalawang shipment na nagkakahalaga ng P84.97 milyon mula sa parehong consignee.

Sinabi ni Martin na patuloy na palalakasin ng Port of Subic ang mga pagsisikap nito sa pagprotekta sa hangganan laban sa pagpasok ng mga ipinagbabawal na produkto sa bansa. JAY Reyes

MANILA, Philippines- Pinangasiwaan ni MMDA Acting Chairman Engr. Carlo Dimayuga ang una niyang Metro Manila Council meeting sa bagong gusali ng MMDA sa Pasig City, Huwebes.

Tinalakay ng mga opisyal ang panukalang muling ipatupad ang expanded number coding bilang paghahanda sa pag-arangkada ng face to face classes sa Agosto 22. (Mga larawan kuha ni Danny Querubin)

MANILA, Philippines- Tatlong scammers ang arestado kabilang ang dalawang Nigerian national at isang Pinay nang maaktuhan ang isa sa mga ito na nagtangkang mag-withdraw sa account ng isang negosyanteng Indian national sa China Bank San Pedro City, Laguna .

Kinilala ng pulisya ang biktima na si Surjan Singh Kathait ,45 , may-asawa, Indian national, businessman, at pansamantalang naninirahan sa Bacoor, Cavite.

Ang mga naarestong suspek na kinilalang sina Samuel Nomso Esomchi 42, Nigerian national, nakatira sa Barangay Buaya, Imus, Cavite , Taye John Bamidele, 40, Nigerian national, residente ng Barangay Tandang Luna III, Imus Cavite at ang Pinay na si Gladys Rias Francisco, 47, widower, ng Carmona, Cavite.

Batay sa isinumiteng report sa tanggapan ni PBGen Antonio C. Yarra Regional Director ng PRO4 Calabarzon, nauna umanong nadakip ang Pinay na si Francisco ng dakong alas-2 ng hapon nang magtangka itong mag-withdraw ng halagang P400,000 sa China Bank San Pedro Branch sa Barangay Nueva San Pedro City, Laguna, subalit nabigo ito nang makipag-coordinate ang China Bank San Pedro Branch sa China Bank Carmona para sa inter-branch withdrawal.

Bukod dito, nakatanggap ng impormasyon mula sa China Bank Bonifacio Global City of Taguig kung saan ang nasabing remittance ay na-hack at posibleng fraud , kaya mabilis na nakipag-coordinate ang China Bank Manager San Pedro na si Ms. Ma. Victoria Marquez sa kanilang security office at San Pedro City Police Station para ireport ang naturan insidente.

Napag-alaman sa isinagawang follow up operation ay naaresto ang Nigerian National na si Mr. Esomchi sa Petron sa lungsod ng San Pedro, Laguna, samantalang nadakip naman si Mr. Bamidele (Nigerian national  sa Robinsons Galleria South at narekober ang halagang cash na P1,4000 na kakawithdraw lang.

Ang mga naarestong suspek ay pansamantalang nasa kustodiya ng San Pedro City Police Station at ini-relay sa Provincial Directorate for investigation and Detective Management, Laguna Police Provincial Office, kung saan nahaharap sa kaso ang tatlong suspek sa paglabag sa Republic Act 10178 Sec 4 (b) (2) known as “Cybercrime Prevention Act of 2012 “, Computer related fraud / Article 315 (Sindling Estafa ) of Revised Penal Code in relation to Sec 6 of RA 10175 na isinampa sa City Prosecutors Office of San Pedro City, Laguna .

“Isa na namang kahanga hangang aksyon ang ating nasaksihan mula sa ating kapulisan, sa kanilang pagtutulungan para maresolba itong kriminalidad na ito. Tunay na kahanga hanga ang dedikasyon at puso ng hindi lamang ng ating tropa kundi pati na rin ng mga responsableng mamamayan para mapatupad ang batas at bigyan hustisya ang lahat ng mga biktima ng maling gawain nitong masasamang loob na ito. Asahan ninyo na ang inyong PRO CALABARZON ay handang umagapay sa inyo at maglingkod ng tapat, may puso at malasakit sa lahat ng ating kababayan na nangangailangan ng aming tulong,” ayon kay PBGen. Yarra. Ellen Apostol