Agri info system isusulong ni Gatchalian sa sapat na pagkain

Agri info system isusulong ni Gatchalian sa sapat na pagkain

October 26, 2022 @ 12:12 PM 1 month ago


MANILA, Philippines – Hangad ni Senator Win Gatchalian ang pagtatatag ng isang agriculture information system (AIS) upang makatulong na matiyak ang sapat na suplay ng produktong agrikultura at mabawasan ang kahirapan.

Sa pahayag, sinabi ni Gatchalian na kailangan magtatag ang gobyerno ng imprastraktura at mekanismo na maipapaalam sa magsasaka kung saan ibebenta ang kanilang ani sa lugar na nangangailangan ng partikular na agricultural products.

“Ang misyon ay tulungan ang ating mga magsasaka na mahanap ng pamilihan dahil ito ay susi upang mabawasan ang kahirapan sa bansa,” sabi ni Gatchalian, kaugnay ng inihain niyang Senate Bill No. 1374.

Ang panukalang batas ay magbibigay daan sa paglikha ng AIS, na pamamahalaan ng Kagawaran ng Agrikultura (DA), na magsisilbing isang online database kung saan makikita ang lahat ng impormasyon hinggil sa mga ibinebentang agricultural at fisheries commodities.

Ito rin ay ia-upload nang sabay-sabay kasama ng mga impormasyon na magmumula sa mga magsasaka sa bawat barangay.

Ani Gatchalian, pagsasama-samahin ang lahat ng makukuhang datos at ilalagay sa isang database para mas madali ang ugnayan sa pagitan ng farm sources at mamimili, kabilang na ang pandaigdigang merkado.

“Inaasahan natin na sa pamamagitan ng pagtatatag ng AIS, mas magiging maayos ang kabuhayan ng ating mga magsasaka at makakatulong na malutas ang problema ng kagutuman sa bansa,” dagdag ni Gatchalian.

Ayon pa sa mambabatas, sinusuportahan ng panukalang batas ang layunin ng kasalukuyang administrasyon na tiyakin ang food security, lalo na sa panahon ng emergency habang ang bansa ay unti-unting bumabangon mula sa epekto ng pandemya.

Ang panukala ay alinsunod din sa pangako ng DA sa United Nations Food and Agriculture Organization (FAO) na isusulong nito ang digitalization ng sektor ng agrikultura upang makamit ang mga layunin na bawasan ang kahirapan at makamit ang seguridad sa pagkain.

Sinabi ni Gatchalian na ang panukalang AIS ay hango sa Municipal Agricultural Information System na binuo ng lokal na pamahalaan ng Mina, Iloilo na kumukolekta, nagsusuri, at gumagamit ng datos ng agrikultura para sa mga magsasaka, kanilang pamilya, aktibidad, lupa, pananim, at iba pa.

Naging matagumpay ang ganitong sistema sa naturang lugar upang maibenta nila ang kanilang mga ani sa labas ng kanilang komunidad na nagbibigay sa kanila ng mas magandang presyo sa kanilang mga produkto at mas maayos na kita na inuuwi nila sa kanilang mga pamilya. Ernie Reyes