AHAS AT BUWAYA

AHAS AT BUWAYA

February 6, 2023 @ 1:29 PM 2 months ago


NITONG nagdaang mga araw, lumutang ang mga kwentong masama at mabuti ukol sa mga buwaya at ahas.
Pero may mabuti mang kwento, takot ang higit na namamayani hindi lang sa hanay ng mga bata kundi pati sa matatanda.

Pareho kasing pumapatay ang mga ito ng tao at hayop ang mga ahas at buwaya.

Ang ahas, lalo na ang sawa, kapag malalaki ang mga ito, nilalamon nila nang buo ang tao o hayop.
Gayundin ang buwaya.

Pero kapag maliit ang ahas, pumapatay ito sa bisa ng kamandag na ibinubuga sa pinagkagatan nito pero ang buwaya, pumapatay sa pagkagat at pagdurog sa biktima.

Nito lang nagdaang araw, may tinuklaw ang King Cobra sa Panganiban, Catanduanes.

Isa sa pinakakamandag na ahas sa buong mundo ang King Cobra kaya hindi na nakaabot pang buhay sa ospital ang lalaking natuklaw.

Pero sa Indonesia, may malaking buwaya na naghatid ng batang namatay sa lunod sa mga taong umiikot sa tabing dagat para hanapin ang biktima.

Kagat-kagat ng buwaya ang bata na nakalutang sa tubig at makaraang maihatid nito ang bangkay sa rescuers, umalis na rin ito palayo.

Ngayon, paano natin tratuhin ang mga ahas at buwaya?

May mga ahas na sinasabing kaibigan ng mga tao at aktuwal ngang ipinahahawak at ipinapupulupot sa tao sa zoo.

Pero bibihirang may palakaibigan sa mga ito at mas lalong bibihira ang hindi lumalamon at pumapatay ng tao.

Kaya naman dapat higit na ituring ang ahas at buwaya na delikado at ituro ito lalo na sa mga bata upang mailayo ang mga ito sa kapahamakan at kamatayan.

Ang mga animal lover, maging ang media, kasama ang social media, dapat mag-ingat sa pagpapalabas ng mga hayop na ito bilang mga kaibigan ng tao.

Para klaro, pigilan, lalo na ang mga bata at iba pa na lumapit at makipaglaro sa mga ahas at buwaya.