Air Binay 4.0 sneakers inilunsad sa Makati

Air Binay 4.0 sneakers inilunsad sa Makati

March 22, 2022 @ 12:12 PM 3 months ago


MANILA, Philippines- Inilunsad ng lokal na pamahalaan ng Makati ang bagong bersyon na Air Binay (AB) 4.0 sneakers na ipapamahagi sa mga estudyante bilang preparasyon sa pagsisimula ng face-to-face classes sa gitna ng pagbaba ng bilang ng kaso ng COVID-19 sa lungsod.

Pinangunahan ni Makati City Mayor Abby Binay, kasama ang ilang opisyal ng lokal na pamahalaan, ang distribusyon ng nabanggit na sneakers and kabilang ang iba pang school supplies sa mga estudyante ng Pio del Pilar High School at Makati High School kung saan ang bawat estudyante ay pagkakalooban ng Air Binay 4.0 sneakers, Randoseru bags, jackets at kapote.

Ayon kay Binay, mas lalo pang pinagtibay ng lokal na pamahalaan ang disenyo at katangian ng AB 4.0 matapos mapakinggan ang ng mga estudyante at mga magulang nito na una nang nakatanggap ng AB 3.0 sneakers.

Ang AB 4.0 ay may bagong katangian na mas makulay na asul at puti mula sa dating scheme na light na kulay asul at puti na AB 3.0 para sa mas madaling paglilinis ng sapatos.

Sinabi ni Binay na ang proyekto na libreng sneaker ay inilunsad noon pang 2017 kung saan naipamahagi sa 89,862 estudyante ang kauna-unahang AB sneakers.

Ang AB 2.0 ay inilabas noong 2019 at ipinagkaloob naman sa 90,000 estudyante mula kindergarten hanggang senior high school.

Nitong 2020, sa ikatlong bersyon ng sneakers na AB 3.0 ay ibinigay sa 93,110 mag-aaral na kabilang ngayon sa mga estudyante ng SPED at ALS.

Pansamantalang nahinto ang naturang proyekto nitong 2021 dahil sa pandemya na idinulot ng COVID-19. James I. Catapusan