MANILA, Philippines – Arestado ang isang incumbent Barangay Chairman sa Maynila sa bisa ng warrant of arrest sa kasong Anti-Graft and Corrupt Practices Act.

Mismong sa loob ng Brgy. Hall ng 569, Zone 56, Sampaloc, Maynila ay inaresto nitong Lunes ng umaga, Marso 27 ang opisyal na si Roberto Icuscit Corpuz, 54 anyos at residente ng 718 Mindoro St., ng nasabing lugar.

Sa pangunguna ni PEMS Luis J. Coderes ng Intelligence and Warrant Section ng PS-4 MPD ay isinilbi ang warrant of arrest laban kay Corpuz.

Inisyu ni Hon. Renato Zaleta Enciso, Presiding Judge ng Manila RTC Branch 12 ang warrant of arrest na may P90,000 na piyansang inirekomenda.

Kasalukuyang nakaditene sa station custodial facility ang barangay chairman. Jocelyn Tabangcura-Domenden

BULACAN – Bumuo na ang Bulacan Police Provincial Office ng Special Investigation Task Group Serna para sa malalimang imbestigasyon sa pagpatay kay San Miguel acting chief of police PLt. Col. Marlon Serna.

Napatay si Serna nang rumesponde sa insidente ng nakawan sa isang tindahan sa Brgy. San Juan, San Miguel hanggang tuluyang mapa-engkwentro sa tinugis na riding in tandem na sangkot dito pasado alas-9 ng gabi nitong Marso 25 sa Brgy. Buhol na Mangga, San Ildefonso.

Kaugnay nito, sa isang Facebook post, nagpahayag ang PNP- Directorate for Police Community Relations na ang buong kapulisan ay nakikidalamhati sa pamilya ng kabarong si Serna.

Bilang pagluluksa at pagpapakita rin ng respeto ng buong hanay ng pulisya sa tapang at dedikasyon sa sinumpaang tungkulin ni Serna ay naka-half mast na ang watawat ng Pilipinas sa Police Region Office 3.

Patuloy ang pagtugis ng pulisya sa mga salarin. Dick Mirasol III

MANILA, Philippines – Arestado ang apat na indibidwal sa ikinasang serye ng operasyon ng National Bureau of Investigation-Cybercrime Division (NBI-CCD) dahil sa pagbebenta ng GCash accounts.

Iniharap ng NBI sa media ngayong Lunes, Marso 27, ang mga suspek na sina Jay Cortez y Orozco, Kevin Mark Maboloc y Yong, Jeffrey Miguel y Quimirit at Jeffrey Ilagan y Barraca.

Ayon sa NBI, nakatanggap ng impormasyon ang ahensya na mayroong mga Facebook accounts na sangkot sa pagbebenta ng GCash accounts na nag-ooperate sa Quezon City at Tondo, Manila.

Isinasagawa ang kanilang negosyo sa pamamagitan ng Facebook at Messenger.

Gamit ang undercover Facebook account, nakapagtransaksyon sa mga suspek ang mga awtoridad para hingin ang presyo ng bawat GCash account.

Sinabi ng mga suspek na bawat account ay mayroong P100,000 transaction at pwede silang makagawa ng hanggang 100 na account pa.

Nang magkasundo sa kanilang meet-up sa tatlong magkakahiwalay na pagkakataon at lugar, ikinasa na rin ang entrapment operation noong nakaraang linggo.

Sina Cortez at Maboloc ay naaresto sa Matandang Balara, Quezon City habang si Miguel ay naaresto sa Tondo at sa North Avenue, Quezon City naman nadakip si Ilagan.

Dinala sa Office of the City Prosecutor sa Quezon City ang mga suspek para sa kasong Access Devices Regulation Act of 1998. Jocelyn Tabangcura-Domenden

BALLESTEROS, CAGAYAN – Patay na nang matagpuan ang dalawang college student na nalunod sa karagatang sakop ng Cabuluan West, Ballesteros, Cagayan.

Ayon kay PMaj. Marlou Del Castillo, hepe ng Ballesteros PNP, nakita na ang bangkay nina Ryan Mendoza, 21 anyos, 2nd year college student at residente ng Brgy. Cabuluan sa baybayin ng Brgy. Caritan West dito sa nasabing bayan.

Naunang natagpuan ang katawan ng Rosie Ugalino, 23 anyos, graduating college student sa kursong civil engineering at residente ng Brgy. Palloc dito rin sa nabanggit na bayan na nakita malapit sa lugar kung saan ito nalunod noong hapon ng Sabado, Marso 25.

Ang mga biktima ay kalahok sa isang aktibidad ng kanilang relihiyon na ginanap sa dalampasigan ng Ballesteros.

Kasama ang ilan pang miyembro ng kanilang simbahan na naliligo nang biglang tangayin ng mataas na alon ang dalawang biktima na sanhi ng kanilang pagkalunod.

Bago pa man ang insidente ay nagkaroon ng pagpupulong kaugnay sa pagtatalaga ng mga barangay tanod sa lahat ng baybayin na sakop ng Ballesteros bilang paghahanda sa inaasahang pagdagsa ng mga turista ngayong summer season at Holy Week.

Kaugnay nito, umapela si PMaj. Del Castillo sa publiko na maging mapagmatyag at mag-ingat sa paliligo sa karagatan lalo ngayon panahon ng summer o Semana Santa. Rey Velasco

GONZAGA, CAGAYAN – Tiklo ang isang empleyado ng lokal na pamahalaan ng Gonzaga at isang tricycle driver sa isinagawang magkahiwalay na drug buy bust operation sa Gonzaga, Cagayan.

Kinilala sina Azeeval Sinopera, 20 anyos, empleyado ng Gonzaga LGU at residente ng Brgy. Tapel, Gonzaga, Cagayan ay naaresto sa Sitio Cadalagan, Brgy. Flourishing ng nabanggit na bayan matapos pagbentahan ang poseur buyer ng isang plastic sachet ng hinihinalang shabu.

Samantalang si Jhun Mark Pascual, 25 anyos, tricycle driver at residente ng Brgy. Smart, Gonzaga, Cagayan ay naaresto sa Brgy. Batangan dito rin sa nasabing bayan matapos naman nitong pagbentahan ang operatiba ng dalawang plastic sachet ng hinihinalang shabu.

Ang pagkadakip kina Sinopera at Pascual ay bunga ng isinagawang drug buy-bust operation ng pinagsanib na pwersa ng operatiba ng Gonzaga Police Station, 4th Mobile Force Platoon ng 2nd PMFC, 203rd Maneuver Company ng RMFB2.

Nakumpiska sa pangangalaga ni Sinopera ang buy-bust money, isang cellphone at motorsiklo.

Habang narekober naman sa pangangalaga ni Pascual ang ginamit na buy-bust money, isang cellphone at motorsiklo at dalawang plastic sachet ng hinihinalang shabu.

Nahaharap ang dalawang suspek sa kasong paglabag sa R.A 9165 o Comprehensive Dangerous Drugs Act of 2002. Rey Velasco