Anak ni Ka Tunying, cancer-free na!

Anak ni Ka Tunying, cancer-free na!

July 9, 2022 @ 1:07 PM 1 month ago


Manila, Philippines – Masayang ibinalita ng news anchor na si Anthony Taberna na cancer-free na ang kanyang anak na si Zoey Taberna pagkatapos ng halos kalahating taong pagpapagamot sa Singapore.

Masakit tanggapin para kay Ka Tunying (palayaw ni Anthony) at sa asawang si Roselle na sa murang edad, tinamaan ng cancer o leukemia ang anak na si Zoey.

Para kay Anthony, kahit magastos ang pagpapagamot sa Singapore, inilipad nila ang anak dahil nandoon daw ang mga ekspertong doktor para sa leukemia.

Sa kanilang pinagdaanan sa panganay nilang anak, ang itinuturing niyang ‘bayani’ para sa paggaling ni Zoey ay ang bunso nilang anak na si Helga na nag-donate ng kanyang bone marrow stems na pangunahing kailangan ng kapatid para mabuhay.

Pahayag ni Ka Tunying, “Napakalaking papel ang ginampanan ni Helga para mailigtas ang kapatid.

“Bayani si Helga sa tingin namin lalo na ni Zoey dahil nagsakripisyo ito nang walang tanong-tanong para makatulong na gumaling ang kanyang kapatid. Siya rin ang unang nagpapasaya sa ate niya ‘pag malungkot ito at nagpapalakas ng loob nito ‘pag gusto nang sumuko dahil sa kirot na dulot ng karamdaman,” ani Anthony.

Dagdag pa ni Tunying, “Helga, we’re so proud of you. Pinatunayan mo ang tunay na kahulugan ng pag-ibig sa kapatid. We love you! Ipinagmamalaki ka namin.”

Ibinahagi ni Ka Tunying sa kanyang Instagram ang proseso kung paanong si Helga ang nagsilbing bone marrow donor ng kanyang ate nang sumailalim ito sa transplant sa Singapore.

“Si Helga ang siyang bone marrow donor ng kanyang Achi Zoey nang sumailalim ito sa transplant.

“Una’y dumaan muna ako, si Misis at si Helga sa isang pagsusuri at lumitaw na si Bunso ang perfect match para maging stem cell donor ng kanyang kapatid. Kahit minsan, hindi nagtanong si Helga kung bakit siya. Ang tanong lang niya, kailan gagawin. ‘Yung proseso ng preparasyon hanggang sa araw na hinarvest sa kanya ang stem cell ay hindi madali para sa isang batang tulad ni Helga subalit hindi siya dumaing, hindi siya nagreklamo.”

Matatandaang nito lamang Lunes, Hulyo 4, masayang ibinalita ng 13 years old na si Zoey na nakauwi na sila from Singapore at siya’y cancer-free na.

“I am totally cancer-free! I couldn’t have done all of this without the help, support, and love of everyone special to me and, most of all, God,” ani Zoey.

Sa hiwalay na panayam kay Tunying, siya’y nagpasalamat sa mga nagdasal at nagpakita ng kanilang suporta para sa kanyang anak.

“Gusto ko lang magpasalamat sa lahat ng kasama namin sa pananalangin. Nakauwi na kami kasama si Zoey pagkalipas ng halos kalahating taon sa Singapore. Salamat higit sa lahat sa Panginoong Diyos,” pagtatapos ni Tunying. Ador Saluta