LUMALABAS sa mga balita na maaaring magkagiyera ang United States at China kaugnay sa agawan sa Taiwan sa loob ng dalawang taon o hanggang 2025.

Si United States Air Mobility Command, General Mike Minihan ang nagsasabi nito.

Maaaring simulan umano ng China na kunin nang sapilitan ang Taiwan na itinuturing nitong bahagi ng kanyang teritoryo at itataon ang giyera sa presidential elections sa US sa taong ito.

Kasabay ng pagsasalita ni Minihan, umiikot naman si North Atlantic Treaty Organization Secretary General Jens Stontelberg na kung gaano kahalaga ang Europa sa Asya, gayundin ang Asya sa Europa.

Pumunta naman dito sa Pinas si U.S. Defense Secretary Lloyd Austin na nagsabing nais nitong dagdagan ang mga pwesto ng militar sa Pilipinas ng US sa ilalim ng Enhanced Defense Cooperation Agreement.

Sa kasalukuyan, klarong isasailalim sa EDCA ang Cesar Basa Air Base sa Floridablanca, Pampanga; Fort Magsaysay Military Reservation sa Nueva Ecija; Lumbia Airfield sa Cagayan De Oro; Antonio Bautista Airbase sa Puerto Princesa, Palawan; at Benito Ebuen Air Base in Cebu.

Sinasabi naman ni Gregory Poling, ng Washington’s Center for Strategic and International Studies think tank, kailangan ang mga dalampasigan sa hilaga o north Luzon na tatamnan ng shore-based missile bilang pamigil sa kilos ng China laban sa Taiwan.

At sa pagbisita ni Austin, sinasabing apat na base militar ang idaragdag sa nasabing base ngunit lahat itatayo sa Luzon dahil pinakamalapit ito sa Taiwan habang isa ang itatayo sa Palawan para naman sa problema sa Spratlys.

Biglang kong naalala ang nagaganap sa Ukraine na kalaban ang Russia.

Durog na durog na ang Ukraine sa mga bomba, missile, sumasabog na drone, 100,000 patay na sundalo, libo-libong patay na sibilyan, kasama ang mga namamatay na maysakit dahil sa kawalan ng kuryente dahil giba-giba ang suplay ng kuryente ngayon.

Handa ba tayong Pinoy na matulad sa Ukraine na giyera ng US at Russia?

MARAMING gamit ang apoy. Pwede sa pagluluto, pantunaw ng bakal at iba pa pero mahirap din itong kalaban dahil maaari nitong sunugin ang hindi dapat.

May tatlong elemento ang apoy para mangyari, tinatawag itong ‘fire triangle’. Binubuo ito ng fuel, heat at oxygen.

Nagtutuloy-tuloy lamang ang pagliyab dahil sa tinatawag na chain reaction ng tatlo. Isa lamang sa mga elemento ang kailangang tanggalin para maapula ito.

Marami na ang nagbuwis ng kanilang buhay at ari-ariang naabo dahil sa fire accident. Sa record ng Bureau of Fire Protection, tinatayang umabot sa 13K kaso ng sunog ang naitala nito lamang nakaraang taon. Kabilang sa talaan ang ilang residential fire event.

Karaniwang dahilan ng trahedya ang naiwang umaapoy na kandila, naiwang bukas na gas stove, faulty wiring, arson, electrical overload, defective appliances at iba pa.

Kaya mainam din na mayroon tayong batas na RA 9514 o Fire Code of the Philippines of 2008 na magiging gabay ng lahat para makaiwas sa panganib ng sunog. Iyon nga lang, may limitasyon din ang batas. Sa ating interpretasyon, hindi lahat ng residential houses ay kailangan ng Fire Safety Inspection Certificate. Karaniwang mga business enterprise, building owner, mall, industrial at iba pang establisimyento na nangangailangan ng business permit ang obligadong sumunod.

Kaya ang payo natin sa mga residente o may-ari ng bahay na hindi naman nagnenegosyo, maging aktibo tayong alamin ang fire prevention measures.

Sa ganitong paraan, maililigtas natin ang buhay ng buong pamilya gayundin ang mahahalagang mga ari-arian. Mas praktikal kung magkukusa tayong maglagay ng mga aprubado at may integridad na fire detection, alarm and communication system.

Makatutulong din ang pagbili ng aprubadong fire extinguishers. Kailangan lamang gawin ang buwanang inspeksiyon para masiguro ang maayos na kondisyon nito. Alamin din ang emergency procedure at contact number ng malapit na fire station sa inyong lugar para makaresponde kaagad ang mga awtoridad gayundin ang mga fire volunteer.

Maaaring may kamahalan ang ating payo, pero hindi ba mas malaki ang maaaring mawala kapag nasunugan tayo?

ILANG buwan na nating pinag-uusapan ang isyu nang pagtaas ng presyo ng sibuyas, hanggang sa tayo, sa ngayon, ay nagsisimula nang bahain ng mismong mga sibuyas.

Ano ba ang talagang pinagmulan nito? Sa pag-iimbistiga ng marami, ito raw ay kakulangan sa diskarte ng mga taga-Department of Agriculture, na siyang kaagapay dapat ng mga lokal na nagtatanim ng sibuyas.

Sabi ng departamento, noong buwan ng Agosto, 2022, sapat ang dami ng sibuyas sa pangangailangan ng mapanglasang Pinoy. Wala itong pinahintulutang mag-angkat ng sibuyas mula pa ng Abril, 2022 hanggang noong Disyembre.

Pero nang mag-Setyembre, nagsimulang tumaas ang presyo ng sibuyas sa ‘di rin maipaliwanag na dahilan ng DA. Pumalo pa nga sa P700 bawat kilo noong Disyembre sa panahon pa naman nang pagluluto dahil sa Kapaskuhan.

Biruin n’yo, mula sa P240 hanggang P350 bawat kilo ng pulang sibuyas halos dumoble ang presyo nito. At eto pa, sabi rin ng DA, ang sibuyas ay tumatagal ng anim hanggang walong buwan para maibenta.

So paanong nagkaroon ng kakulangan? Ganoong may tinatayang aanihin pa ang ating magsisibuyas nang mga panahong iyon. At kung magkulang man, napakarami pang naka-imbak sa mga bodegang nagkalat sa tabi ng mg taniman ng sibuyas sa bansa.

Sa ulat din ng DA, ang mga sibuyas sa mga bodegang ito ay nangawala, kaya sumirit ang presyo ng gulay na ito. Paanong nangayari?

May gumawa ba ng pangsamantalang kakulangan ng sibuyas para kumita? Malamang sa alamang! Ito ay totoo, para tumatak sa ating mga pag-iisip na ito ay kakulangan din sa diskarte ng ating bagong Pangulo.

Ngunit, sa kabila ng isyung ito, pinayagan ng Pangulo na mag-angkat na lamang muna tayo para tugunan ang pangangailangan sa sibuyas.

Pagdating ng mga inangkat na ito, siguradong babahain na tayo ng sibuyas, matapos naibenta na sa mataas na presyo ang mga nangawalang sibuyas na ating pinahahanap noong isang taon.

May misteryo nga siguro dito. Dahil kung noon, naluluha ka habang naghihiwa ng sibuyas, ngayon ay makita mo lamang ang sibuyas ay mapapaiyak ka na din.

oOo oOo oOo

Assalamu Alaikum Warahmatullahi Wabarakatuh!

SA gitna ng kontrobersya hinggil sa umiinit na namang pagkakasangkot ng ilang police officials sa illegal drugs ay may magandang balitang iniulat ang liderato ni PMGen. Jonnel Estomo.

Malaking balita ang pagsuko ng 26 na hardcore officials and members ng New People’s Army sa pinamumunuang National Capital Region Police Office (NCRPO) ni Estomo.

Nabatid na ang mga sumuko ay mula sa malayong lugar ng Kabikulan na at sila ay kumikilos bilang local party leaders.

Hindi na nga ‘area of responsibility’ ni ‘Esto’, tawag ng ilan kay Estomo, ang Bicol subalit bakit kilala siya ng mga rebelde at sa kanyang teritoryo nagsisuko ang mga ito?

Dahil sa mga pangyayari, maliwanag na ipinakikita ng heneral na top cop ng NCRPO na ang kanyang pagseserbisyo ay walang hanggan at para sa lahat. Ito ay patunay lang na siya ay isang tunay na alagad ng batas.

Tiyak na may ginawang estratehiya ang kampo ni ‘Esto’ kaya nagsisuko ang mga NPA sa NCRPO at hindi sa dapat asahan na pulis-Bicol at Armed Forces of the Philippines.

Malaki ang balitang ito na nagbigay ningning sa PNP, lalo ngayong ang pulisya ay nahaharap na naman sa ‘madilim na nakaraan’ dahil sa usaping may kaugnayan sa ilang opisyal at pulis na sangkot sa iligal na droga.

Speaking of accomplishments, siguro’y mananahimik na ang kaluluwa ng pinatay na PR man na si Bubby dacer dahil ang killer na si Willian Reed na dating pulis ay nasakote ng NCRPO cops.

Madulas itong si Reed na missing sa mahigit 29 na taon. Siya ay unang nagtago sa ibang bansa at bumalik sa Pilipinas bago nagpalipat-lipat sa iba’t ibang probinsya hanggang matunton ng NCRPO intelligence team.

Ang kaliwa’t kanang malalaking accomplishment ng NCRPO, iba pa ‘yung achievement sa mga nakaraang assignments ay nagpapakita kung anong klaseng lider si Estomo.

Kaya ‘di nakapagtatakang isa sa napupusuan ni Interior and Local Government Sec. Benhur Abalos na papalit kay PNP chief PGen. Rodolfo Azurin Jr. ay ang NCRPO director dahil sa ipinapakitang sipag at dedikasyon nito sa tungkuling ipinagkaloob sa kanya bilang puno ng Metro Manila Police.