MANILA, Philippines – Sinabi ni Defense chief Carlito Galvez na nangako ang gobyerno ng  Estados Unidos na tutulong sa  cleanup drive sa oil spill sa Oriental Mindoro.

Iniulat ni Galvez kay Pangulong  Ferdinand  Marcos Jr. na nangako si  US Secretary of Defense Lloyd Austin  na magde-deploy ng naval units para tumulong sa cleanup operation sa nasabing lugar.

“I had a phone call last night with Sec. Austin at 7:45 p.m., they are committed to help in coordination with Japan and other countries,” ayon kay Galvez.

“In fact, as I’ve recommended, some of the exercise scenarios of the forthcoming ‘Balikatan’ exercises will be ‘real life’ and actual HADR (Humanitarian Assistance and Disaster Response) operations relative to the oil spill,” ayon kay Galvez.

Idinagdag pa nito na tiniyak ni Austin sa gobyerno ng Pilipinas na ang kanilang HADR team ay “now on their way to help and provide assistance in managing the oil spill.”

Winika pa ni Galvez  na ipagpapatuloy ng gobyerno ng Pilipinas ang paghahanap ng expertise at technical support ng ibang partner countries, gaya ng  France at United Kingdom, para pigilin ang oil spill.

Iniulat din ni Galvez sa Pangulo na ang mga tauhan mula sa  Philippine Coast Guard (PCG)  ay binigyan ng  briefing ukol sa mga dayuhan na nagpaabot ng kanilang tulong sa pamahalaan sa nagpapatuloy na cleanup operations sa lalawigan. Kris Jose

MANILA, Philippines – Muling magpupulong ang provincial government, Philippine Coast Guard (PCG), insurance company, ship owner, at Harbor Star Shipping Services Inc. para mailatag ang mga susunod na aksyon ukol sa lumubog na motor tanker.

Ito ay makaraang matagpuan ng Remotely Operated Vehicle (ROV) Hakuyo ang lumubog na MT Princess Empress sa katubigan ng Oriental Mindoro.

“We will respond correspondingly once we have discussed yung result ng assessment na ginawa ng ROV. Mahalaga na ngayon ay nakikita na nila ang nasa ilalim,” ani Oriental Mindoro Governor Humerlito Dolor.

Ayon kay Office of Civil Defense (OCD) Administrator, Usec. Ariel Nepomuceno, kapaki-pakinabang ang pagbili ng ROV na nasa P40 hanggang P50 milyon, kumpara sa mahigit P200 milyong direktang nagagastos ng gobyerno sa pagbibigay ng ayuda sa mga apektadong komunidad dahil sa naganap na oil spill.

“Yung pamahalaan mismo ay kailangan pang mag-procure ng ROV upang magkaroon ng sariling kakayanan. Sa mas lalong madaling panahon ay kailangan nating bumili ng sarili nating ROV,” dagdag pa ni Usec. Nepomuceno.

Ang ROV HAKUYO ay kayang sumisid hanggang 2,000 metro. Jocelyn Tabangcura-Domenden

Manila, Philippines- Nagkwento ang premyadong aktres na si Amy Austria sa ginanap na mediacon para sa pinakabagong drama series ng GMA 7 na “Hearts on Ice,” tungkol sa mga bastos at walang respetong kabataang artista na na-encounter niya sa ilang proyektong ginawa niya nitong mga nakalipas na taon.

Ayon sa kanya, marami na siyang mga batang artista na nakatrabaho sa mga teleseryeng nagawa niya na talagang hindi nambabati kahit pa magkasama na sila sila sa dressing room.

Kwento ni Amy, “Siyempre, ang ginagawa ko, kapag may ganu’ng mga bata, ‘O, halika hija, dito tayo, pag-aralan mo.’

“Maski nga yung iba, hindi ako binabati, ako ang unang bumabati. ‘Hello.’ Ako yung nagri-reach out, kasi ang iba, baka hindi mo rin alam kung minsan baka nahihiya sila o natatakot sila.

“So, habang nagdi-develop ka ng bonding sa kanila, ng friendship sa kanila, ng relationship sa kanila, unti-unti maga-guide mo,” aniya pa.

May ilan pa raw siyang nakatrabaho na talagang dedma lang kahit pa ilang araw na silang magkasama sa taping. Tandang-tanda rin niya ang artistang hindi bumabati pero kapag may dumating nang mga pagkain ay unang-una pa itong susugod.

“Yung darating, hindi man lang bumati, yung ganyan. Tapos, pagdating…sama-sama kayo sa tent, mag-occupy siya ng napakalaking ano (space), may ganyan.

“Pagkatapos, minsan yun nga, hindi masyadong kabisado yung lines, ganyan, tapos nag-a-attitude na (umiirap), may ganu’n.

“Meron pang isa na may nakasama din kami na ayun, hindi ka kilala. Alam naman niya kung sino ka, ganyan-ganyan. Pero kapag merong handaan na, meron kang…naku! Nakakahiya naman, sinasabi ko ito, may pagkain na, lalapit na, yung ganu’n.

“Palagi yun, e. Wala. Hindi ako nakita. Pero kapag meron nang pagkain, ‘lika, kain tayo! Ay, hello!” ang naloloka pang kuwento ni Amy.

Nang magkaroon ng chance, kinausap daw niya ang nasabing artista, “Kasi nahihirapan ako… pag magkatrabaho kayo, ang hirap magtrabaho nang hindi ka kumportable sa isang tao.

“Ibig sabihin, tanggapin niya o hindi, nailalabas ko lang yung nararamdaman ko. I mean, baka mamaya gawin sa iba, kawawa naman. Kinausap ko, tapos niyakap ko, ganyan. Nag-thank you naman siya,” ayon pa kay Amy. Rommel Placente

MANILA, Philippines – Pasado na sa House population and family relations committee ang substitute bill para sa isinusulong na kontrobersiyal na Divorce Law sa bansa.

Sa naging botohan sa committee level ay 12 ang pumabor at walang naging pagtutol.

Sa ilalim ng panukala, ang divorce petition ay dadaan muna sa isang judicial process kung saan papatunayan ng magkabilang panig na wala nang tiyansa na magkaayos at tuluyan nang nasira ang pagsasama ng mag-asawa.

Hindi naman papayagan sa panukala ang mabilis na pagresolba sa divorce.

“The bill prohibits quickie, notarial, email and other speedy drive-thru divorces. In addition, no decree of absolute divorce will be based upon a stipulation of facts or a confession of judgment. A cooling-off period of 60 days after the filing of the divorce petition is provided, during the said period, the judge is required to exert earnest efforts to reconcile the parties,” nakasaad sa panukala.

Sinabi ni Albay Rep Edcel Lagman na umaasa siyang maisasabatas na ang Divorce bill sa bansa upang bigyan ng pagkakataon ang dating mag-asawa na magkaroon ng mas maayos na buhay.

“Spouses, especially wives, will soon have the option of getting out of an irremediably broken marriage and get a new lease on life,” pahayag ni Lagman.

Sinabi ni Lagman na mahigpit ang probisyon na nakapaloob sa divorce bill at hindi ito masasamantala o magagamit sa maling paraan, aniya, nakasaad sa divorce bill na ang public prosecutor na may hawak ng kaso ay kailangan magsagawa ng imbestigasyon upang matiyak na walang panggigipiit sa magkabilang panig sa paghahain ng divorce petition at kahit pa man nasa proseso na ang divorce ng mag asawa ay maaari pa rin itong materminate sa anumang oras na magkasundo ang mag-asawa.

“The divorce decree can be nullified even after the issuance of an absolute divorce decree provided that the parties decide to reconcile,” ani Lagman.

Mahaharap naman sa limang taong kulong at multa ang partido na mapapatunayan na naggigipit para makipag-divorce ang kanyang asawa.

Suportado ng Philippine Commission on Women ang panukala dahil na rin ang kawala ng divorce ay naglalagay sa mga kababaihan sa maling sitwasyon. Gail Mendoza

MANILA, Philippines – Umapela si Manila Rep. Joel Chua sa Kamara na maisalba ang 132-anyos na San Sebastian Church sa Quiapo, Manila.

Sa kanyang privilege speech sa Kamara, sinabi ni Chua na kailangan nang gumawa ng hakbang ang gobyerno para masimulan ang private sector-led rehabilitation ng San Sebastian Minor Basilica.

“Direcho na po ako sa punto: Pabagsak na po ang San Sebastian Church sa Quiapo, Manila. Literal na malapit na pong gumuho ang istraktura ng San Sebastian. At huwag na po nating hintayin na may maaksidente o mamatay pa bago tayo umaksyon,” ani Chua.

“I understand, realize, and accept that this undertaking I am appealing for needs massive funding, multi-year effort, much detailed engineering, and highly-specialized technical expertise,” giit pa nito.

Aniya, ang San Sebastian Church ay national treasure ng bansa, ito ay itinatag noong 1891 at napakaganda ng neo-gothic design nito.

Ipinaliwanag ni Chua na sa isinagawang advanced structural engineering study ni Portuguese Engineer Rui Tiago Pinto dos Santos Beleza de Seabra noong 2016 ay lumitaw na may anim nang vulnerable spots sa San Sebastian Church na kung hindi maagapan ay maaaring agad nang bumigay.

“With urgency, I now ask for the concerned agencies of the national government to band together to rehabilitate the San Sebastian Church,” pakiusap ni Chua.

“Let the rehabilitation of San Sebastian Church be private sector-led, supported by foreign assistance, but with the concerned government agencies behind them or with the provision of technical expertise, technical assistance, and grant funding,” mungkahi pa nito.

Partikular ng tinukoy ng mambabatas na manguna sa rehabilitasyon ng simbahan ang Tourism Infrastructure and Enterprise Zone Authority (TIEAZ), Department of Tourism (DOT), National Historical Commission of the Philippines (NHCP), National Museum, Commission on Higher Education (CHEd), Department of Science and Technology (DOST) at the National Economic Development Authority (NEDA) Public-Private Partnership Center. Gail Mendoza