MANILA, Philippines- Dumipensa si Philippine National Police (PNP) chief, Gen. Rodolfo Azurin Jr., nitong Lunes sa kanyang utos na balasahin ang mahigit 80 ranking police officials, kabilang na ang three top posts ng command group ng pwersa.

“I think it’s not the first time because during the time of no less than our guest si (former PNP chief and former Senator) Gen. (Panfilo) Lacson, minove pa nga niya si Gen. Larry Mendoza noon. So it is not the first time that It happened. Ganun din nung time ni Gen. Bato (Ronald Dela Rosa now a senator) wherein si General Magalong who was with DIDM (Directorate for Investigation and Detective Management) was elevated to DCO (deputy chief for operations ). Actually this is part of ‘yung sinasabi ko rin, I had my inaugural speech that we need to have a policy flexibility. Ibig sabihin kailangan ay pag-aralan natin what is best for the organization,” pahayag ni Azurin matapos ang flag ceremony.

Pinangalanan ni Azurin si Lt. Gen. Jose Chiquito Malayo bilang bagong deputy chief for administration, second-highest official ng PNP, na pumalit kay Lt. Gen. Rhodel Sermonia, na na-reassign bilang chief of the Area Police Command (APC) sa Visayas.

“General Sermonia is well known as a good organizer, as a good advocate in organizing and mobilizing the community. And nakikita naman natin on record kung saan isa isa pinapatay ang ating pulis sa Samar. So I think we need somebody there to organize and bring awareness to all the different barangays in the Visayas region, na pagtulong tulungan natin itong problema natin insurgency. So ‘yun ‘yung reason that’s why I requested siya mag)move,” sabi ni Azurin.

Samantala, si Maj. Gen. Benjamin Santos naman ang bagong deputy chief for operations o ang number three man ng PNP.

Pinalitan niya si Lt. Gen. Vicente Danao Jr. na itinalagang pinuno ng APC Western Mindanao; habang si Maj. Gen. Arthur Bisnar ay umalis sa kanyang pwesto bilang chief of the Directorate for Human Resource and Doctrine Development (DHRDD) upang magsilbing chief of the directorial staff, ang fourth top post ng organisasyon, kapalit ni Malayo.

“On the part of Vic (Danao) I told them we have problems right now because of the implementation of Bangsamoro Autonomous Region in Muslim Mindanao (BARMM) .’Yung mga transition members last Friday took oath as members of parliament. So we need the competency and expertise ng ating mga kasamahan dito unlike if they are only here,” sabi ni Azurin.

Inilahad ni Azurin na nais niyang makipagdayalogo sa National Police Commission (Napolcom) upang ipaliwanag ang reorganization ng mga opisyal sa ilang key positions.

Matatandaang naglabas ang Napolcom ng isang resolusyon na nagre-require ng pagsusumite ng listahan ng third-level officials bago sila bigyan ng posisyon.

“We have to iron out ‘yung differences namin ng Napolcom. And I respect that particular Napolcom memorandum circular,” sabi ni Azurin .

Sa ilalim ng Napolcom memorandum circular 2019-001, nakasaad dito na ang Director for Personnel and Records Management ay kinakailangan munang mag-cause ng publication ng vacant at soon-to-be-vacant positions maging listahan ng eligible officers para sa mga posisyon.

Nakasaad pa sa publication na “any officer who is not included in the said list may not be designated to any of the third level positions in the PNP.”

“So we have to practice that’s why we have to talk it out how we can best deliver the intention of Napolcom and the intention of the PNP so that we don’t wait for what we want to happen in the PNP organization,” aniya.

Binanggit din ni Azurin na pinayagan siya ni dating Napolcom vice chairperson Rogelio Casurao na magpasa ng mga dokumento kahit huli na. Subalit, pumanaw ang huli noong Enero 2021. RNT/SA

MANILA, Philippines – Tuloy ang programa ng Congress of Philippine Aquatics, Inc. (COPA) sa pagdaraos ng mga aktibidad na sisimulan sa gaganaping  2nd leg ng Reunion Swim Challenge sa Agosto 27-28 sa Teofilo Ildefonso Swimming Pool sa loob ng makasaysayang Rizal Memorial Sports Complex sa Malate, Manila.

Sinabi ni Batangas Congressman Eric Buhain na ang torneo  ay bukas sa lahat ng Filipino, teams o clubs anuman ang kinaaanibang asosasyon bilang pagpapatibay sa nasimulang misyon na mapagkaisa ang lahat sa iisang adhikain sa swimming community.

“Regardless of your affiliation COPA welcomes everybody with an open arms. Isa lang naman ang interest natin at gusto nating  mangyari ito’y ang yumabong ang swimming. We have to train the trainers and the development and improvement of our swimmers followed,” pahayag ni swimming icon at bagong halal na Congressman ng unang Distrito ng Batangas..

“After more than two years of inaction due to pandemic, finally our young swimmers can now go back to the pool, enjoy the action once again and resumed the clubs grassroots sports development program. Importante, malaman na ng mga swimmers na balik na at puwede na ang kompetisyon,” aniya.

Ang swimming Olympian at dating SEA Games record holder ay kabilang sa bumuo ng COPA kasama sina Chito Rivera, Darren Evangelista, Joel Esquivel at Richard Luna noong 2020. Ngayon, ang grupo ay may mahigit sa 200 teams/clubs sa 11 clusters na binubuo ng 17 rehiyon sa bansa. Mayroon itong kabuuang 300 miyembrong coach at 3,500 sanctioned swimmers.

Bukod sa Reunion Swim Challenge, ang COPA ay magsasagawa rin ng 1st Novice Swim Championship na nakatakda sa Setyembre 17-18; ang Reunion 3rd leg sa  Oktubre 1-2; ang Reunion Swim Challenge Championship sa Oktubre 22-23; Sprint meet na may pagpapakilala sa SKINS Swim event (Nob. 12-13); at Short Course Yuletide Swimming Championship (Dis. 10-11).

Sinabi ni COPA National Training Director at Olympian (1972 Munich) Carlos ‘Pinky’ Brosas na nakalinya rin isagawa ang coaching seminar sa Enero sa susunod na taon sa limang lokasyon – Northern Luzon, NCR, Southern Luzon, Visayas at Mindanao – na pangungunahan ng bantog na Australian coach na si Wayne Goldsmith bilang tagapagsalita.

Nagpaplano rin ang COPA ng pakikipagtulungan sa mga local government units (LGUs) at Department of Education (DepEd) para maisama sa aktibidad ng mga  mag-aaral sa Pampublikong paaralan ang sports sa pamamagitan ng ‘Train the Trainers Program’ para sa mga guro.

“Mayroong 27 milyong mag-aaral sa pampublikong paaralan sa bansa. May mga pasilidad naman ang ating mga LGUs, napakalaki ng ating komunidad na sumusunod ng talento. Libre ang training, libre and competition, gagawin natin ang lahat para masiguro na makakalikha tayo ng world-class and many more swimming Olympians,” ani Buhain.JC

MANILA, Philippines- Ipinaliwanag ng nagbitiw na Agriculture Undersecretary Leocadio Sebastian ang desisyon niya na lumagda sa order na pumapayag sa importasyon ng 300,000 metric tons ng asukal.

“I signed the document based on the data presented to me, based on the data presented by the Sugar Regulatory Administration. There is a clear indication of the rapidly diminishing supply of sugar,” aniya sa briefing kasama ang mga mambabatas.

Nagsagawa nitong Lunes ang mga komite sa good government and public accountability, at agriculture and food ng Kamara ng briefing kasama ang mga opisyal na sangkot sa sugar importation mess.

Nagbitiw si Sebastian sa pwesto matapos sabihin ni Press Secretary Trixie Cruz-Angeles na ang Sugar Order No. 4 ay iligal na nilagdaan, dahil hindi awtorisado ang dating agriculture official na pumirma sa dokumento para kay Pangulong Ferdinand “Bongbong” Marcos Jr., wna siya ring Agriculture secretary.

“Current supply is projected to run out in August 2022, this month, and end of crop year 2021-2022,” sabi ni Sebastian said.

Batay sa datos mula sa SRA, Philippine Statistics Authority, National Economic and Development Authority, at sa United States Department of Agriculture, ang average annual shortage supply ng asukal mula 2015 hanggang 2019 ay nasa halos 530,000 metric tons, na binubuo ng average annual deficit na 203,000 MT para sa raw sugar at 332,000 metric tons para sa refined sugar, aniya.

Maiuugnay umano ang yearly deficit sa small farm productivity, small farm sizes, at low sugar milling efficiency. Para sa taong ito, makaaapekto rin ang bagyong Odette at ang pagtaas ng presyo ng fertilizer sa sugar production, base kay Sebastian.

“I cannot stand watching Filipinos suffer from high local prices of sugar that are hurting Filipino consumers,” ayon sa ex-DA official.

Sa kabila ng kanyang intensyon, agad na nagbitiw sa pwesto si Sebastian nang malaman umano niyang hindi ikinatuwa ng Pangulo ang kanyang naging aksyon.

 “It has been clear that my actions were not in keeping with administration’s desired direction for the sugar industry,” pahayag niya.

Sa parehong hearing, inihayag ni Samahang Industriya ng Agrikultura President Rosendo So ang pagkadismaya kay Sebastian sa hindi pagbibigay-alam sa chief executive ukol sa pagpirma niya sa SO no. 4.

“Sa tingin namin may tinatago and dapat malaman natin,” sabi niya.

Sa kasalukuyan, nagbitiw na sa pwesto sina Sebastian at si millers’ representative Atty. Roland Beltran kasunod ng kontrobersiya.

Nananawagan naman ang mga mambabatas na magbitiw na rin sa pwesto ang iba pang opisyal na lumagda sa resolusyon “out of delicadeza.”

Nakatakda ang isa pang House hearing sa Huwebes. RNT/SA

MANILA, Philippines – Pinuri ni dating ONE lightweight world champion Eduard Folayang ang kanyang kapwa ex-champ na si Christian Lee bilang isa sa mga pinakadakilang mixed martial artist na nakatapak sa ONE Championship.

Nakatakdang harapin ni Lee ang kasalukuyang ONE lightweight world champion na si Ok Rae Yoon sa isang rematch sa Agosto 26 sa Singapore Indoor Stadium.

“Siya ay isang pambihirang atleta, alam nating lahat iyon,” ani Folayang.

 “Sa paglipas ng mga taon, ipinakita niya ang kanyang napakalaking paglago sa isport at makatarungang nakuha niya ang kanyang puwesto sa elite group ng mga all-time fighters sa ONE Championship.”

Sa edad na 24 pa lang, natalo na ni Lee ang ilan sa mga pinakamahusay na iniaalok ng kanyang dibisyon kabilang ang Japanese legend na sina Shinya Aoki, Saygid Arslanaliev, at Timofey Nastyukhin.

Sa nakikita ni Folayang, si Lee, na may hawak na MMA record na 15-4, ay may lahat ng kakayahan na maging isang superstar sa hinaharap.

“Sa totoo lang hindi ko ma-assess nang may katiyakan pero kung titignan ang edad niya, malayo ang mararating niya sa MMA,” wika ni Folayang.JC

MANILA, Philippines- Iminungkahi ng dalawang senador sa Senado ang pagsasa-legal sa importasyon ng “Ukay-Ukay” o second-hand clothes matapos kinuwestiyunin ni Senador Raffy Tulfo ang pagpupuslit nito sa Bureau of Customs (BOC) sa kabila ng ipinagbabawal ng batas.

Inihayag ito ni Tulfo sa ginanap na pagdinig ng Senate Committee on Ways and Means sa pamumuno ni Senador Win Gatchalian matapos makatanggap ng reklamo mula sa ilang vlooger at online seller na tinatarget sila ng Bureau of Internal Revenue (BIR) sa pagbubuwis.

Ayon kay Tulfo, dapat hinahabol ng BIR ang mga bigtime smugglers tulad ng nagpupuslit ng “ukay’ukay” at langis sa bansa na hindi nagbabayad ng buwis.

Sinabi ni Tulfo na wala siyang galit sa mga small-time ukay-ukay seller pero ipinagbabawal ang importasyon nito pero laganap ang produkto kahit saang sulok ng bansa.

“‘Di po ba ang ukay-ukay ay bawal po ‘yan? Nasa batas po natin ‘yan. Dapat po hindi tayo nagbebenta ng mga ukay-ukay dahil ang mga ukay-ukay po ay ‘yan ay mga secondhand dapat po donations yan dumidiretso yan sa DSWD (Department of Social Welfare and Development). Di ho ba tama? “ayon kay Tulfo.

Sumang-ayon naman si Customs Deputy Commissioner Edward James Buco na ipinagbabawal ang importasyon ng used clothes saka ipinaliwanag na kahit ang Department of Social Welfare and Development (DSWD) na may patakaran na hindi tumatanggap ng “ukay-ukay”.

Ngunit, iginisa ni Tulfo si Buco dahil sa kabila ng ipinagbabawal ang importasyon, laganap ang bentahan ng produkto kahit may pambansang patakaran laban dito.

“So why in the heck tumingin ka sa kaliwa’t kanan. Sa Luzon, Visayas, Mindanao nagkakalat ang mga ukay-ukay? So ano po ang ginagawa ng Bureau of Customs? Bakit nakalusot itong mga ukay-ukay?” aniya.

Sinubukang “magpalusot” ng Customs officials sa paliwanag na kanilang ipinatutupad ng batas laban sa pagpupuslit ng used clothes pero nagiging mautak ngayon ang mga ismugler.

Hindi sumang-ayon si Tulfo kay Buco.

“I dont think so. Sorry, Mr. Buco. Gumala lang po kayo diyan sa mga kanto, sa mga kalye. Diyan sa Divisora, Baclaran, kahit saang sulok ngayon marami na ang ukay-ukay. Ano ba kayo bulag? I’m sorry for the word again,” ayon sa senador.

“Ang pinag-uusapan po natin dito hindi ginagawa ata ng Bureau of Customs ang kanilang trabaho… Siguro po ‘yung mga maliliit huwag na ho nating hulihin. Siguro sitahin lang saan galing ito? Sino ang nagparating nito? Sino ang importer? Sino ang consignee? etcetera. Eh palagay ko po hindi na tinatanong dahil ang consignee ay ‘friendship’ na,” patuloy ni Tulfo.

Ikinatuwiran pa ni Buco na marami na silang nakumpiskang shipments ng used clothes at nakapagsampa ng kaukulang kaso sa importer pero iginiit ni Tulfo na talamak pa rin sa merkado ang bentahan ng “ukay-ukay.”

Inihayag naman ni Gatchalian na hindi nito nalalaman na ipinagbabawal ang importasyon ng ukay-ukay sa ilalim ng Republic Act 4653.

Kaya hiniling niya sa BOC na makipagtulungan sa local government units sa implementasyon ng naturang batas dahil hindi alam ng maraming mamamayan na illegal ito.

Dahil dito, iminungkahi ni Tulfo na gawin nang legal ang commercial importation ng used clothes kundi hindi kayang pigilan ito ng BOC.

“Siguro since hindi kayang kontrolin ng Bureau of Customs ‘yung pagpasok ng ukay-ukay, siguro we have to come up with the system na, I don’t know, legalize ukay-ukay,” aniya.

“Dahil sa ngayon wala pong binabayad na buwis ang ukay-ukay, tama [o] mali? Di ‘ba wala po ni singkong duling? So kung wala siyang binabayad na singkong duling na buwis eh bakit po nagbebenta sya’t pinagkakitaan? Siguro it’s about time to revisit kung ‘di niyo po kayang pigilan,” giit niya.

Pumayag si Gatchalian sa panukalang bisitahin muli ang batas. Ernie Reyes