MANILA, Philippines – Lumabas sa pag-aaral ng Social Weather Station (SWS) na isa sa apat na Filipinong Muslim ang nananalangin ng Salah limang beses isang araw.

Sa National Survey noong Disyembre 10 hanggang 14, 2022, tinanong ang mga Muslim respondents kung ilang beses silang nananalangin ng Salah, o panalangin na isinasagawa ng mga Muslim limang beses kada araw o ayon sa itinakdang dami.

Lumabas sa resulta na 26% ng mga Filipino Muslims ang nananalangin ng Salah limang beses kada araw, 32% naman ang “few times daily”, 38% “sometimes” at 3% ang tuwing Ramadan lang, habang 2% ang nagsabing mahigit isang taon na ang nakalilipas nang sila ay huling mag-Salah.

Patungkol naman sa pagdalo sa religious service, 71% ng mga Muslim ang nagsabing dumadalo sila ng religious service isang beses sa isang linggo o mahigit sa isang beses, 9% ang nagsabing dalawa o higit pang beses kada buwan, 6% ang nagsabing isang beses isang linggo, 1% ang nagsabing dalawa hanggang 11 beses sa isang taon, 7% ang nagsabing isang beses isang taon at 3% ang nagsabing hindi kailanman.

Samantala, 96% ng mga Muslim ang nagsabing personal silang nagtungo sa mga lugar sambahan sa nakalipas na tatlong buwan at 3% ang nagsabing hindi sila nakadalo sa anumang religious service.

Ang naturang survey ay idinaos sa pamamagitan ng face-to-face interview kasama ang 1,200 adults edad 18 pataas sa buong bansa.

Nasa 6% ng mga respondents nito ay Muslim, ayon sa SWS. RNT/JGC

MANILA, Philippines – Umarangkada na para sa plenary debates ang panukalang gagawing mandatoryo ang Reserve Officers’ Training Corps program sa mga estudyante sa higher education institutions (HEIs) at technical-vocational institutions (TVIs).

Nitong Miyerkules, Marso 22, ay inisponsoran ni Senador Ronald “Bato” Dela Rosa ang Senate Bill 2034 na substitution sa walong proposed measures kaugnay ng mandatory ROTC, na isa sa mga prayoridad ng administrasyong Marcos.

Sa ilalim ng panukala, sasakupin ng mandatory basic ROTC program ang lahat ng estudyante na naka-enroll sa hindi bababa sa dalawang taon nang undergraduate degree, diploma, o certificate programs sa HEIs at TVIs.

Ang programa ay kukunin sa loob ng apat na semester.

Hindi naman magiging kwalipikado para makapagtapos ang estudyanteng hindi papasok sa ROTC program.

Mahaharap din sa disciplinary at administrative sanctions ang mga paaralan na hindi magpapatupad ng basic ROTC, mula sa Commission on Higher Education at Technical Education and Skills Development Authority.

Gagawan din ng specialized program ang naturang programa para sa mga estudyante na maituturing na persons with disabilities, at mga mayroong religious beliefs na nagbabawal sa paghawak ng armas upang makapagserbisyo sa bansa, o mga na-convict sa krimen kabilang ang
moral turpitude.

Bubuoin naman ng Department of National Defense, CHED, at TESDA, kasama ng pakikipag-ugnayan sa ibang ahensya ng gobyerno at stakeholders ang Basic ROTC Program Curriculum.

Mayroon ding probisyon ang panukala na nagbibigay ng Advance ROTC program ngunit hindi na sapilitan para sa lahat.

Magbibigay naman ng insentibo para sa mga estudyante na lalahok sa programang ito.

Saad naman sa Section 14 ng panukala ang mga safeguards upang maiwasan ang hazing, korapsyon at iba pang uri ng pang-aabuso kasabay ng pagtatatag ng ROTC grievance board para sa mga reklamong may kaugnayan dito. RNT/JGC

Manila, Philippines- Kailanma’y hindi magtatagumpay ang kanyang mga bashers.

Ito ang paniniwala ni Paolo Contis sa mga bashers niya.

Wala raw kasing alam ang mga ito sa kuwento ng buhay niya.

“Technically, wala silang alam kahit sinasabi nilang meron,” aniya.

Kung susukatin daw by percentage, mga 10 to 15% lang ang alam ng mga bashers.
Ever since naman daw kasi’y hindi niya hinahayaan ang kanyang sarili na maapektuhan.

Binansagan nga niyang background noise ang mga ito who pretend to know everything about him.

“My personal problems are mine. Hindi porke nananahimik ako, ibig sabihin ay wala akong ginagawa,” ani Paolo na hindi naniniwalang dapat gamiting sounding board ang social media bilang daan para malaman ng buong mundo ang kanyang pinagdadaanan.

Proof ng pagmamaliit nga ng aktor sa kanyang mga bashers ay nang sabihin niyang: “Sino’ng mukhang tanga ngayon?!”

May ilang netizens namang naninindigan na imposibleng kahit katiting ay hindi apektado ang actor sa inaabot na pamba-bash.

Kung ganoon daw ay napaka-dense o insensitive ni Paolo.

Defense mechanism na lang daw ‘yon ng aktor pero deep within ay nasasaktan din daw siya kahit paano.

Hindi pa raw ba sapat na paratangan siyang walang kuwentang ama sa mga anak niya sa dalawang babaeng nakarelasyon niya?

Kung tutuusi’y nahahabag ang mga netizen sa maaaring sapitin ng nobya niyang si Yen Santos.

May precedent na raw kasi.

Paano kung magkaanak daw si Yen kay Paolo na hindi malayong mangyari?

Saka raw maliitin ni Paolo ang mga aniya’y mukhang tangang bashers niya pag hindi nangyaring iwanan din niya si Yen at magiging anak nila.

May point. Ronnie Carrasco III

PAKISTAN – Umabot sa 13 katao ang nasawi at mahigit 90 ang nasaktan sa nangyaring magnitude 6.5 na lindol sa Pakistan at Afghanistan nitong Martes, Marso 21.

Sa ulat, siyam na katao ang nasawi sa northwest Pakistanh habang 44 naman ang nasaktan, ayon sa isang Pakistani government official.

Kasunod nito, inilagay na ang mga ospital sa northern Khyber Pakhtunkhwa province sa state of emergency.

Mayroon namang apat na katao ang nasawi at 50 nasaktan sa lindol sa Afghanistan, ayon sa health ministry official.

Maraming mga tirahan at gusali ang napinsala sa dalawang bansa.

Samantala, naramdaman naman ang lindol sa layong 1,000 kilometro ng nasa 285 milyon katao sa mga bansa ng Pakistan, India, Uzbekistan, Tajikistan, Kazakhstan, Kyrgyzstan, Afghanistan at Turkmenistan, ayon sa European-Mediterranean Seismological Centre.

Ang sentro naman ng lindol ay nasa kabundukan ng Hindu Kush, isang lugar sa hilagang-silangan ng Badakhshan, Afghanistan sa lalim na 187 kilometro. RNT/JGC

MANILA, Philippines – Nanawagan si Senate ways and means committee chairman Sherwin Gatchalian sa administrasyong Marcos na tuluyan nang ipagbawal ang Philippine Offshore Gaming Operations (POGOs).

Ito ay matapos na ipakita ni Gatchalian ang ulat nitong Miyerkules, Marso 22, na nagpapakitang nagpapatuloy pa rin ang mga krimen dulot ng patuloy na operasyon ng POGO sa bansa, mas mabigat kumpara sa benepisyong nakukuha natin dito.

“Mr. President, the POGO experiment has failed to provide the promised economic benefits to the Filipino people. Instead, POGOs have created new avenues for crime and corruption, damaging our country’s reputation among diplomatic allies, foreign investors, potential tourists, and even our own countrymen,” anang senador.

“The data and evidence on hand all point to the same conclusion: Enough is enough. It is time to ban offshore gaming operations in the Philippines, once and for all,” dagdag pa niya.

Ani Gatchalian, magpapasa siya ng proposed Senate resolution na layong himukin ang Executive Department na agaran nang ipagbawal ang operasyon ng lahat ng POGO sa bansa.

Isasama sa naturang resolusyon ang lahat ng rekomendasyon batay sa mga idinaos na pagdinig ng Senado sa operasyon ng POGO sa bansa, pagbibigay ng Department of Labor and Employment ng tulong sa mga maaapektuhang empleyadong Filipino, koleksyon ng Bureau of Internal Revenue sa outstanding tax liabilities ng POGO licensees, service providers, at third-party auditor; at kanselasyon ng working visas at Alien Employment Permits na inisyu sa mga dayuhang POGO workers para mapauwi na ang mga ito sa kani-kanilang pinagmulang bansa.

Kabilang naman sa mga natuklasan ni Gatchalian na inilagay sa report ay ang
“inherently unstable” business model ng POGO dahil sa outsized foreign regulatory at political risks.

“Using the currency and employment data as proxies, we can safely assume that Chinese nationals are the most prolific POGO consumers. This is problematic because gambling is illegal in China…In essence, Chinese nationals are using offshore gaming operations based in the Philippines as a loophole to circumvent Chinese criminal law,” diin ng senador.

Maliban dito, lumalabas din ang “troubling social risks” ng industriya, dahil sa datos na ipinakita ng Philippine National Police, nakapagtala na ng nasa 102 POGO-related crimes mula Enero 1, 2017 hanggang Enero 23, 2023, biktima ang nasa 316 katao.

Sa nasabing bilang, 214 ang Chinese at 28 ang mga Filipino.

Posibleng pinagmumulan din umano ng financial crime ang POGO industry, kung saan sa ulat ng Anti-Money Laundering Council na ang naturang service provider ay maituturing na vulnerable sa money laundering.

Sangkot din ang ilang POGO operators sa tax evasion, ani Gatchalian, mula naman sa datos ng BIR.

Nasa P34.2 bilyon halaga ng gross gaming revenues ang underreported ng POGOs mula Enero hanggang Agosto 2022, dahilan para sa hindi pagbabayad ng tax na aabot sa P1.7 bilyon dahil sa under-declaration.

Matatandaan na nagsagawa ang Senate ways and means committee at Senate public order and dangerous drugs panel ng magkahiwalay na serye ng mga pagdinig kamakailan upang timbangin ang mga benepisyo at pinsalang idinudulot ng POGO sa bansa. RNT/JGC