MANILA, Philippines – Umarangkada na ang paglilinis ng local government unit (LGU) ng Quezon City sa mga ilog na bahagi ng programa ng Department of Environment and Natural Resources (DENR) para muling buhayin ang mga ilog na bahagi ng river restoration projects ng pamahalaan.

Ayon sa Barangay E. Rodriguez ng Quezon City, patuloy ang isinagawang dredging operation sa Buwaya Creek na nag-uugnay sa apat na barangay ng Quezon City at mahigpit na pagbabantay upang hindi tapunan ng basura ang ilog.

Sinabi ni Barangay Captain Marciano Buena-Agua Jr. ng Brgy E. Rodriguez Sr. na malaking bagay ang isinasagawang paglilinis sa Buwaya creek upang muling mabuhay ang naturang ilog.

“May plano na ang QC government para sa on site relocation ng 600 pamilya ng informal settlers na maaapektuhan ng paglilinis sa naturang ilog at popondohan ito ng lokal na pamahalaan ng QC,” ani Buena-Agua.

Sa interbyu, sinabi ni Buena-Aqua na plano na rin maglagay ng basurahan sa paligid ng creek at fish net bilang pansalo sa mga basura upang hindi na dumiretso sa ilog ang mga basura.

Ang Buwaya Creek ay pangunahing ilog sa Quezon City na nag-uugnay at pinalilibutan ng Barangay East Kamias, West Kamias, Silangan at Brgy. E. Rodriguez na konektado sa Marikina River at San Mateo river.

Nauna rito ay inatasan ng Department of Environment and Natural Resources (DENR) ang mga local government units (LGUs) para linisin ang mga ilog sa Metro Manila kaugnay ng isinasagawang rehabilitasyon sa mga ilog at Manila Bay.

“Mahigpit na rin na ipinatutupad ang city ordinance para sa pagbabawal ng pagtatapon ng basura sa ilog kaya ipinatutupad ito ng barangay,” anito.

Idinagdag pa nito na kabilang dito ang pagsasagawa ng dredging sa mga ilog at daluyan nito. Santi Celario

MANILA, Philippines – Pinamamadali ni Albay Rep at House, Ways and Means Chairman Joey Salceda sa Senado ang pagpasa sa Center for Disease Control and Prevention (CDC) bill sa katwirang kailangan ito ng bansa sa harap na rin ng banta ng mga sakit dala ng El Nino Phenomenon.

Ayon kay Salceda, ang El Nino season ay “hotbed for epidemics” kaya naman kailangan na maging handa ang Department of Health sa pagtugon sa mga sakit gaya ng cholera, Chikungunya at Zika virus.

“Tropical diseases can be particularly problematic. Global studies indicate a spike of between 2.5% to 28% in cases during El Nino activities. El Nino is a hotbed for epidemics – climate is warmer than usual, and people have less water available,” ani Salceda.

“So, we should be working on adaptations such as mandating LGUs to clean up, hospitals to probabilistically allocate resources among probably tropical diseases, and the DOH to do the coordination work and provide close guidance. We can anticipate what will happen more or less, because the models teach us when, how long, and how bad it can be,” dagdag pa ng mambabatas.

Ani Salceda, ang pagpasa sa CDC bill ay makatutulong sa mga extreme weather events gaya ng El Nino at La Nina.

“The CDC would definitely add institutional muscle to our preparations, especially since El Nino could persist until 2024. Now that the Senate version has already been certified as urgent, I am hopeful that we will have a bill ready for President Marcos’s signature before he makes his second State of the Nation Address,” pahayag pa niya.

Sinabi ng mambabatas na umaasa siya na sa pagbabalik ng sesyon ng Kongreso sa Mayo 8 ay sisimulan na ng Senado ang pagtalakay sa CDC bill.

Sa ilalim ng panukala ay mas matututukan ang emerging o re-emerging infectious diseases na siya ngayong pinangangambahan sa buong mundo matapos na rin ang pandemya dulot ng COVID 19. Gail Mendoza

MANILA, Philippines – Kinondenda ni Senator Raffy Tulfo ang kalunos-lunos na kalagayan ng ilang mga pasyente sa National Center for Mental Health (NCMH) na hindi natatrato ng tama at makatarungan dahil sa hindi maayos na pasilidad dito.

Inihain ni Tulfo ang Senate Resolution (SR) No. 562 na inaatasan ang Senate Committee on Health na imbestigahan ang kalagayan ng mga pasilidad sa NCMH upang matiyak na ang mga pasyente ay makakatanggap ng wastong pangangalaga at matugunan ang napaulat na katiwalian sa pamamahala nito.

Noong Marso 27, Lunes ng umaga ay nagsagawa ng surprise ocular inspection si Tulfo sa NCMH bilang pagtugon sa isang tip na kanyang natanggap mula sa concerned citizen.

Ayon sa sumbong, hindi raw makatarungan ang trato sa mga pasyente doon, animong mga hayop daw kung sila ay ituring.

“Nakakalungkot na makita ang kalunos-lunos na kalagayan ng ilang mga pasyente sa NCMH sa Mandaluyong. Kung mahina ang iyong sikmura, tiyak na masusuka ka sa sobrang baho ng kanilang ward. Daig pa ang amoy ng kulungan ng baboy.

Sa sahig sila natutulog at walang banig, kumot o unan. Nagsisiksikan na parang mga sardinas at sobrang init na mistulang pugon dahil walang ventilation at kulang sa electric fan,” ani Tulfo.

Ang Pavilion 8 o ang Female Ward ang una niyang binisita.

Aniya, halos bumaliktad ang kanyang sikmura sa sobrang baho, umaalingasaw ang naghalong amoy ng dumi at ihi ng mga pasyente.

Nakadagdag pa rito ang imburnal sa labas ng ward na maraming basurang lumulutang-lutang.

Dahil dito, nagbigay ng suhestiyon si Tulfo sa NCMH Chief na dapat maglagay ng maraming humidifier, automatic round ng clock disinfectant spray, at dalawang beses kada araw na paglilinis sa mga ward na sinang-ayunan naman ng pinuno nito.

Sa pagtungo niya sa Pavilion 4 o ang Forensic Ward kung saan nananatili ang mga pasyenteng nagkasala sa batas na ipina-komit ng korte, napansin ng mambabatas na nagsisiksikan ang mahigit limampung mga pasyente sa isang maliit na kwarto na ang kapasidad ay para lamang sa sampung tao.

Pinuntahan din ng senador ang isang abandonadong pavilion na hindi tinapos ang konstruksyon, ito’y ginastusan ng mahigit P60 milyon.

Ito rin ang dahilan kung bakit ang isang dating chief ng NCMH ay pinaslang dahil isiniwalat niya ang mga katiwaliang ito at iba pang mga anomalya sa nasabing institusyon.

Sa paghahain ng resolusyon, layon ni Tulfo na tukuyin ang ugat ng mga problema at lapses sa mga operasyon ng NCMH, at para rin masuri ang kalidad ng pangangalaga, paggamot, at suporta na ibinibigay sa mga pasyente ng ospital.

Ani Tulfo, dapat managot ang lahat ng mga responsable sa katiwalian sa ospital. Ernie Reyes

Bulacan – Kalunos-lunos ang sinapit ng batang lalaki na siyang bunso sa magkakapatid matapos bawian ng buhay nang malunod ito sa ilog sa bayan ng Pulilan.

Sa Facebook post ng Pulilan MDRRMO, kinilala ang biktimang 14-anyos, residente Brgy. Lumbac ng naturang bayan.

Ayon sa Facebook post ng naturang tanggapan nitong Huwebes, Marso 30, ang biktima ay nalunod sa Tibag river.

Nang matagpuan ng mga rescuer ang katawan ng biktima ay agad itong dinala sa pinakamalapit na ospital subalit namatay na ito.

Tumanggi naman magbigay ng iba pang karagdagang impormasyon sa nangyaring insidente ang naturang tanggapan.

Samantala, napag-alaman naman sa Facebook post ng ilang netizen na kada-taon ay may nalulunod sa naturang ilog.

Bumuhos naman ang pagdadalamhati at pakikiramay ng mga netizen na nakakakilala sa biktima na sinasabing bunsong anak at sidekick ng amang fishball vendor. Dick Mirasol III

MANILA, Philippines – Umapela si Bataan Rep. Geraldine Roman sa Kamara na iprayoridad ang pagpasa sa Magna Carta for Agriculture Workers upang matutukan ang pangangailangan ng mga magsasaka at mangingisda na magbibigay daan para magkaroon ng food security ang bansa.

Umaasa si Roman na papaspasan ng House Leadership ang pagpasa sa House Bill No. 5601 na ngayon ay nakabinbin sa House Committee on Agriculture.

“Panahon na para gawin nating prayoridad na mapabuti ang sitwasyon ng ating mga magsasaka at mangingisda. By helping out the agri workers, we make food security strong, and if we have the products, people can buy cheaper by patronizing our own agri products. The bill would institutionalize several measures that would help farmers and fisherfolk — like registering workers under the Kadiwa program and formulating a farm-to-market roadmap to help mobilize food products,” paliwanag ni Roman.

Sa ilalim ng panukala ay magkakaroon ng Supply Chain Redundancy Plan, kung saan ang transportation, logistics at infrastructure systems ay nakaayon sa agricultural policy.

Dagdag pa ni Roman na kung sa ibang bansa ay malaki ang kinikita ng mga magsasaka, sa Pilipinas ay ang mga magsasaka at mangigisda ay kabilang sa poorest sector. Gail Mendoza