MANILA, Philippines – Aabot sa 10 katao ang iniulat na nasawi at pito ang nawawala makaraang masunog ang isang pampasaherong barko sa dagat na sakop ng Basilan nitong Miyerkules ng gabi, Marso 29, ayon sa Provincial Disaster Risk Reduction and Management Office (PDRRMO) nitong Huwebes, Marso 30.

Ayon kay Basilan PDRRMO chief Nixon Alonzo, ang ulat na ito ay mula sa Hadji Muhtamad Municipal DRRMO at sasailalim pa sa validation.

“Bale total po, according sa nalaman namin, apat na ang naiwan namin dito sa barko tapos noong dumating kami sa may port ng Isabela, may anim ding namatay. So all in all, 10 po ‘yung mga namatay po,” ani Alonzo sa panayam ng DZBB.

“Nakuha sila sa barko na patay or tumalon kasi yung iba sa dagat. Either nalunod or may mga nakita rin kami na signs na yung iba ay sunog din,” dagdag pa niya.

Nasagip naman aniya ang nasa kabuuang 195 pasahero at 35 crew mula sa nasusunog na passenger vessel.

Sa ulat, nakadaong ang MV Lady Mary Joy 3, sa pier ng Baluk-Maluk Island nang sumiklab ang sunog pasado alas-11 ng gabi.

Nakatakda sana itong bumiyahe patungong Jolo, Sulu.

Sa kasalukuyan ay nagsasagawa pa ng monitoring activities ang mga awtoridad upang matukoy kung may karagdagan pang nasawi.

Nagpapatuloy din ang search and rescue operations sa bisinidad ng Baluk-Baluk Island sa Hadji Muhtamad, Basilan, ayon sa ulat ng Coast Guard Station Basilan.

“Upon receipt of information regarding the said fire incident, a Search and Rescue (SAR) Team from Coast Guard Sub-Station Maluso immediately proceeded in the area of the incident and was able to retrieve one female cadaver,” sinabi ng Coast Guard sa isang Facebook post.

Ipinadala na rin ang dagdag na SAR Team na binubuo ng CGS Basilan, CGSS Lamitan at Special Operations Unit Team Lamitan.

Nakapagligtas naman ng apat na indibidwal at isang bangkay ng babae ang nakuha ng CGSS Hadji Muhtamad, na bumuo ng Joint Search and Rescue Team kasama ang Local Government Unit ng Hadji Muhtamad sa pangunguna ni Mayor Arsina Kahing-Nanoh.

Ipinadala na rin ang BRP Cape Engaño, BRP Tubbataha at MCS 3007 upang tumulong sa search and rescue operations.

Samantala, sinusuri naman ng Coast Guard Station Basilan, kung mayroong senyales ng oil spill sa nangyaring insidente. RNT/JGC

MANILA, Philippines – Arestado ang limang hinihinalang fixer sa operasyon ng Criminal Investigation and Detection Group (CIDG) at Land Transportation Office (LTO) nitong Miyerkules, Marso 29 sa harap ng Novaliches District Office nito sa Quezon City.

Mismong sina LTO Assistant Secretary Jose Arturo Tugade at Executive Director Giovanni Lopez ang nagpanggap na aplikante at lumapit sa mga fixer na nasa harap ng opisina sa Novaliches.

“Kami po ay nag-disguise nung araw na yon nais po namin makita first hand sa opisina batay sa complaint na natanggap namin tumambay kami sa opisina at talagang napakaraming fixer,” ani Tugade sa isinagawang media briefing sa LTO Central Office sa Quezon City.

Dagdag pa niya, inaresto rin ng mga tauhan ng CIDG-Quezon City ang iba pang hinihinalang fixer sa harap din ng LTO Novaliches District Office nitong Martes, Marso 28.

Ani Tugade, ang limang akusado ay haharap sa reklamong paglabag sa Republic Act 9885 o Anti-Red Tape Act of 2007.

“Yung limang fixers po, ang chinarge po natin sa kanila is [The five fixers will be charged for their] violation of the anti-red tape act […] aside from the penalty of a fine, penalty of imprisonment if found guilty of the charges filed against them.”

Maliban sa pag-aresto sa mga fixer, ibinahagi rin ni Tugade na sinuspinde at inalis muna sa pwesto ang pinuno ng Novaliches District Office upang bigyang-daan ang imbestigasyon.

“If he is found to be in connivance with the fixers, then the appropriate criminal cases will be filed against him,” aniya.

Hindi naman tinukoy ni Tugade ang pagkakakilanlan ng mga akusado maging ng Novaliches District Office head.

Aniya, dapat sitahin at pagbawalan mismo ng mga tauhan ng mga opisina ng LTO ang mga fixer na pakalat-kalat sa kanilang lugar.

Nagbabala naman si Tugade sa mga fixer at mga empleyado ng ahensya na makikipagsabwatan na mayroong “zero tolerance” sa korapsyon ang LTO. RNT/JGC

DASMARINAS, Cavite- Kaawa-awa ang sinapit ng isang dalagang graduating college student matapos ataduhin ng saksak at pagnakawan ng pinaniniwalaang kawatan, nitong Martes ng hapon, Marso 28 sa bayang ito.

Kinilala ang biktimang si Queen Leanne Daguinsin, 24-anyos, graduating student sa Bachelor in Computer Science sa De La Salle University, Dasmariñas City, Cavite, at nanunuluyan sa kanyang dormitoryo sa nasabing lungsod.

Ayon kay PCol. Christopher Olazo, provincial director ng Cavite Police Provincial Office, bandang alas-4 ng hapon nang matagpuan ang bangkay ng biktima sa loob ng kanyang dormitoryo sa nasabing lungsod.

Kwento ng land lady ng biktima, nagtataka siya kung bakit hindi pa lumalabas ng kanyang kuwarto ang biktima para pumasok sa paaralan at panay na rin ang tawag ng kanyang mga kaklase.

Pagsapit ng hapon, napilitan na ang land lady na buksan ang silid ng biktima at laking gulat na lamang niya nang tumambad sa kanyang harapan ang naliligo sa sariling dugo na biktima at wala na itong buhay habang nakatakip ang unan sa mukha.

Sa pagsisiyasat ng pulisya sa nasabing krimen, nadiskubre na nawawala ang cellphone, pera at laptop ng biktima kaya hinihinalang pagnanakaw ang motibo sa krimen.

Nakita sa rin sa CCTV ang suspek na nakasuot ng kulay asul na t-shirt, black shorts, black cap na dumaan sa rooftop ng kabilang dormitory patawid sa kwarto ng biktima.

Nagtamo rin ng 14 na saksak sa katawan at leeg ang biktima na naging sanhi ng kanyang kamatayan.

Nagpapatuloy naman ang ginagawang follow-up investigation ng pulisya para sa agaran pagkakailanlan at ikadarakip sa suspek.

Nanawagan naman sa publiko ang pulisya sa sinumang nakakakilala o may impormasyon sa pagkakakilanlan ng suspek ay makipag-ugnayan sa malapit na istasyon ng pulisya. Mary Anne Sapico

MANILA, Philippines – Limang street level individuals (SLIs) ang nadakip kasabay ng paglalansag ng hinihinalang drug den sa ikinasang buy-bust operation ng mga tauhan ng District Drug Enforcement Unit-Southern Police District (DDEU-SPD) sa Brgy. 127, Pasay City.

Kinilala ang mga suspek sa isinumiteng report ni Pasay City police chief P/Col. Froilan Uy kay SPD director P/Brig. Gen. Kirby John Brion Kraft na sina Vicente Galura (HVI-pusher), namamahala ng drug den; Victor Sillacay Roble, (SLI-pusher); Jomar Areglado Realingo (SLI-user); Ted Gonzales Torres (SLI-user); at Leksis Bunyi Gentucao (SLI -user).

Sa pagsalakay ng mga operatiba ng DDEU sa drug den ay narekober sa posesyon ng limang suspek ang 7 transparent plastic sachets na naglalaman ng pinaghihinalaang shabu na may bigat na 30 gramo at nagkakahalaga ng ₱204,000; drug paraphernalia at ang ₱500 buy-bust money na ginamit sa operasyon.

Ang narekober na di-umano’y shabu na gagamiting ebidensya laban sa suspeck ay dinala sa SPD Forensic Unit upang sumailalim sa chemical analysis.

Nahaharap sa kasong paglabag sa Sections 5, 6, 11, 12, 13, at 14 sa ilalim ng Art II ng RA 9165 ang mga suspects na kasalukuyang nakapiit sa detention facility ng DDEU-SPD. James I. Catapusan

ZAMBOANGA CITY – Patay ang kambal na babae habang sugatan ang 26 na iba pa matapos tumaob at nagpagulong-gulong ang sinasakyan nilang trak umaga ng Miyerkules, Marso 29, sa lungsod na ito.

Kinilala ang nasawi na isa sa kambal na si Nursiya Taring, habang inaalam pa ng mga awtoridad ang pagkakakilanlan ng kapatid nito.

Patuloy namang ginagamot sa Zamboanga City Medical Center ang mga sugatan kabilang ang driver ng trak na kinilalang si Banny Molina Martinez Jr., 26, lahat ay mga trabahador ng Aquatic Food Manufacturing Corp., sa naturang lungsod.

Ayon kay Lt. Col. Paul Andrew Cortes, ng Zamboanga City-PNP, bandang alas-5 ng umaga nang maganap ang insidente sa kalsadang sakop ng Barangay Sangali, ng nasabing lungsod.

Sa paunang imbestigasyon ng pulisya, sakay ang mga biktima ng company truck papasok sa trabaho nang mawalan umano ng kontrol sa manibela si Martinez sa pakurbadang bahagi ng nabanggit na kalsada.

Dahil dito, tumaob ang trak at nagpagulong-gulong sa kalsada na nagresulta ng pagkasugat ng mga biktima.

Isinugod naman sa nasabing ospital ang mga biktima subalit idineklara na ring dead-on-arrival ang kambal ng umatending doktor na si Dr. Afdal Kunting.

Nagpapatuloy naman ang imbestigasyon ng mga awtoridad sa nasabing insidente. Mary Anne Sapico