MANILA, Philippines – Inirekomenda na ng Department of Education (DepEd) nitong Lunes, Agosto 14, ang pagsasagawa ng blended learning sa mga paaralang lubhang napinsala ng Super Typhoon Egay na hindi pa rin maisasaayos hanggang sa pagbubukas ng klase sa Agosto 29.
Ayon kay Vice President Sara Duterte, na siya ring Department of Education (DepEd) secretary, palagi namang bahagi ng kanyang departamento ang blended modality.
“Yung mga tinamaan po ng bagyong Egay, sila po yung priority natin sa budget natin for repair this year,” pagbabahagi ni Duterte kasabay ng ‘Brigada Eskwela’ program sa Maynila.
“Pero kung hindi po umabot yung repairs nila sa opening sa August 29, ay immediately po na i-implement ng ating paaralan yung blended learning program natin dahil wala na pong learning disruption,” sinabi pa niya.
Ayon naman kay Pangulong Ferdinand Marcos Jr., na kasama ni Duterte sa naturang event, gagawin ng pamahalaan ang makakaya upang agarang maipaayos ang mga nasirang silid-aralan.
“Nung tumama yung bagyo, sinabi namin, ‘ano ang magagawa namin sa isang buwan?’” pagbabalik-tanaw ni Marcos.
“So, so far, kung ano yung kaya natin gawin, together with… kasama pa ang ating mga LGU (local government unit), ay ginagawa yung lahat para maayos natin yun mga nasira at patuloy naman dapat ang school-building program,” pagpapatuloy niya.
“Pero talagang malaking sagabal ng weather natin.”
Sa datos, mayroong 196 paaralan ang nasira sa siyam na rehiyon sa bansa dahil sa bagyong Egay. RNT/JGC
