Bong Go sa Pilipino: Malasakit Centers lapitan, gamitin

Bong Go sa Pilipino: Malasakit Centers lapitan, gamitin

January 12, 2023 @ 3:00 PM 3 weeks ago


MANILA, Philippines- Ipinaalala ni Senate committee on health and demography chair, Senator Christopher “Bong” Go sa publiko na unahin ang kanilang kalusugan at hinimok niya silang gamitin ang serbisyo ng alinman sa 153 Malasakit Centers na nakakalat sa buong bansa.

Ayon kay Go, higit sa pitong milyong Pilipino na sa ngayon ang naserbisyuhan o natulungan ng Malasakit Centers.

“Lapitan n’yo lang po ang Malasakit Center. Handang tumulong po ‘yan sa ating mga kapwa Pilipino,” ani Go.

“Basta Pilipino ka, poor and indigent patient ka, qualified ka sa Malasakit Center. Lapitan n’yo lang po ang Malasakit Center diyan po sa inyong lugar at tutulungan po kayo na mabayaran ang inyong billing,” idinagdag niya.

Ayon sa DOH, mula nang itatag ito noong 2018, ginawang mas accessible ng Malasakit Centers sa mga mahihirap na Pilipino ang tulong medikal mula sa gobyerno.

Partikular na rito ang Medical Assistance for Indigent Patients Program ng DOH na maaaring ma-avail sa alinmang Malasakit Centers. Ang programa na may kabuuang budget na P50.8 bilyon ay nakatulong na sa 7,481,333 pasyenteng mahihirap.

Noong 2022 lamang, mahigit 1.4 milyong pasyenteng benepisyaryo ang nakatanggap ng P14.6 bilyong halaga ng tulong ng gobyerno sa pamamagitan ng Malasakit Centers program.

Ang Malasakit Center ay isang one-stop shop kung saan ang mga mahihirap na pasyente ay madaling makakuha ng tulong medikal mula sa Department of Social Welfare and Development, Department of Health, Philippine Health Insurance Corporation, at Philippine Charity Sweepstakes Office.

Ayon sa DOH, ito ay ginagawa upang palawigin ang saklaw ng mga tulong tulad ng mga benepisyo sa outpatient na gamot. Binanggit din nito na ang PhilHealth, ang health insurer na pinamamahalaan ng gobyerno ng bansa, ay pinagbubuti ang kanilang mga plano sa pagpopondo upang maprotektahan ang mga pasyente mula sa pagbabayad ng out-of-pocket expenses.

“Natutuwa po ako sa bagong report ng DOH kung saan nailapit ng Malasakit Center ang mga programa ng gobyerno na medical assistance sa mga mahihirap na pasyente sa iba’t ibang sulok ng bansa,” sabi ni Go.

“Bilang isang lingkod-bayan, wala nang higit na kasiya-siya kaysa malaman na ang ating mga inisyatiba ay talagang nakatutulong sa ating mamamayang Pilipino. Kaya naman lalo akong natutuwa sa kamakailang ulat ng DOH na nagsasaad na mahigit pitong milyong Pilipino ang nakinabang sa buong bansa, mula Batanes hanggang Tawi-Tawi,” dagdag niya.

Inilarawan ni Go kung paano niya nabuo ang ideya para sa Malasakit Center upang mabigyan ng madaling access ang mga naghihirap sa pangangalagang medikal.

“Ang mga residente mula sa mga karatig probinsya ay pumupunta sa Davao City Hall para sa tulong medikal. Gayunpaman, ang pondo ng Davao City ay hindi magagamit para tulungan ang mga residente mula sa mga karatig probinsya,” pagkukuwento ni Go.

“Ngunit si dating Pangulong Rodrigo Duterte, na siyang mayor ng Davao City noon, ay hindi nakayanan na talikuran ang mga kapwa Pilipino na humihingi ng tulong sa ating lalawigan. Ang mga pakikipag-ugnayan na ito ay nagbigay inspirasyon sa akin na isipin ang one-stop shop para sa lahat ng tulong na may kinalaman sa medikal para sa ating kapwa Pilipino,” dagdag niya.

Nagsimula ang Malasakit Center bilang convergence initiative ng Office of the President noong 2018 sa pakikipag-ugnayan sa Office of the Presidential Assistant to the Visayas. Ang unang center ay itinatag sa Cebu City sa Vicente Sotto Memorial Medical Center.

Ang Republic Act 11463 o ang Malasakit Centers Act of 2019, na isinulat at itinaguyod ni Go, ay tuluyang nilagdaan ni dating Pangulong Duterte bilang batas noong Disyembre 2019. Ipinag-uutos nito ang pagtatatag ng mga ccenter sa bawat ospital na pinatatakbo ng DOH sa buong bansa at sa Philippine General Hospital sa Maynila.

Mayroon na ngayong 153 Malasakit Centers sa buong bansa. Bawat rehiyon ay may kanya-kanyang Malasakit Centers, kabilang ang Bangsamoro Autonomous Region in Muslim Mindanao.

“Hindi niyo na kailangan pumila o umikot pa sa iba’t ibang opisina para humingi ng tulong pampagamot. Nasa isang kwarto sa loob ng ospital na po. Pera n’yo yan, ibinabalik lang sa inyo sa pamamagitan ng mabilis at maaasahang serbisyo,” ayon kay Go. RNT