CHR HININGIAN NG TULONG NG MGA TAGA-INDANG

CHR HININGIAN NG TULONG NG MGA TAGA-INDANG

December 10, 2022 @ 10:25 AM 2 months ago


NOONG mga nakaraang linggo ay naisulat ko rito sa aking kolum ang problemang kinakaharap ng mga residente ng Sitio Quarry sa Brgy. Bancod sa Indang, Cavite na ano mang araw ay maaaring ma-demolish ang mga tahanan.

Hindi sila mga squatter dahil nabili nila ang mga lupa na kinatitirikan ng kanilang mga tahanan.=

Ayon sa mga residente, taong 2003 nakabili ng lupa ang ilang mga taga- Indang at dayo sa lupa na bahagi ng Sitio Quarry sa developer na Cavite Habitat Foundation Inc. ni  Facundo Dardo, Sr. mula sa lupa ni Roberto Espineli.
Noong una ay walang problema, nasa P19.3 milyon na ang naibayad ng mga residente, datapwa’t namatay si Dardo, Sr. na hindi pa tapos magbayad sa mga Espineli. Nagkasuhan sa korte ang mga Espineli at CAHAFI ngunit hindi naman kasama noon sa kaso ang mga residente o Cahafi Internal, House and Lot Owner’s Association, Inc o mas kilala sa tawag na Cahafi Sitio Quarry Homeowners Association, Inc.
Sa desisyon ng korte ay napabalik sa mga Espineli ang pagmamay-ari.
Isang bagong developer ang pumasok, ang Community Housing and People Ecology Development  Foundation Inc. at ang lugar ay nakilala na sa pangalang Espineli Eco-Park Village.
Subali’t makalipas ang ilang taon, ayon sa mga residente,  ng lumaon ay hindi rin nakapuno ang COMHPED sa kanilang kasunduan ng mga Espineli.
Kaya naman ayon pa sa salaysay ng mga residente ay naibenta naman umano ngayon sa mga Chinese ang lupa nila dahil nakita nila mismo kamakailan na mga Chinese ang bumisita sa lugar nila.

Lumapit ang Cahafi Sitio Quarry Homeowners Association, Inc. sa katuhan nina  Rosaly Malacad at  Celestina Suan sa Commission on Human Rights  upang idulog ang kanilang mga hinaing at karapatan.

Kaagad namang tumugon ang CHR at lumiham noong June 30, 2022 si Atty. Rexford D. Guevarra na Regional Director ng CHR-IV-A kay Judge Lerio C. Castigador ng Regional Trial Court Branch 15 sa Naic, Cavite na may hawak ng kaso.

Isa sa mahalagang isinasaad ng liham ang pagprotekta sa karapatang pantao ng mga residente ng Cahafi Sitio Quarry Homeowners Association , Inc. kagaya ng;

This office, pursuant to the constitutional mandate of Commission on Human Rights to “request assistance of any department, bureau, office or agency in the performance of its actions” hereby seeks assistance from this Honorable Court to take the appropriate measures to protect the rights and interest of the clients.

We anticipate your usual cooperation and equal concern for the promotion of the human rights of all persons especially the disadvantaged, marginalized and vulnerable.

Ngayon ay nananawagan na ang mga residente ng tulong sa pamahalaan, sa mga lingkod-bayan at sa simbahan na sila ay bigyang-pansin.

Hari nawang magkaroon ng maayos na win-win solution sa problemang ito pabor sa magkabilang panig sa tulong ng ating pamahalaan.