MANILA, Philippines – Gigil na gigil ang fans ng sikat na Kpop group na BTS sa isang Filipino vlogger.

Ito ay dahil umano sa racist remarks nitong ipinalabas sa official Tiktok account.

Sa video na ipinalabas ni Bryanboy, isang Filipino influencer at vlogger na mayroong milyon-milyong follower, sinagot niya ang tanong kung nakasalamuha o nakita na ba niya in person si BTS member ‘Taehyung’ o kilala sa tawag na V.

Ayon sa fans, tila ay nilibak niya ang BTS member nang sadya nitong maliin ang pagbigkas ng pangalan nito kung kaya’t nag-iba ang kahulugan ng pangalan ni Taehyung.

Kung akala niya ay nakakatuwa ang kanyang ginagawa ay nagpatuloy pa sa pagbibiro ang vlogger na kalaunan ay nagtrending hindi lamang sa Tiktok kundi maging sa Twitter.

Sigaw ng fans, i-report ang account ni Bryanboy. Sa ngayon ay hindi pa naglalabas ng pahayag ang sikat na vlogger/influencer. RNT/JGC

MANILA, Philippines – Inamin ni outgoing President Rodrigo Roa Duterte na talagang tinira nito ang ABS-CBN at sinabihan ang mga miyembro ng Kongreso na nakikipag-deal sila sa isang “mandaraya.”

“Tinira ko talaga sila,” ayon kay Pangulong Duterte.

“I used the presidential powers to tell Congress that you are dealing with scoundrels and if you continue to kowtow with them, kawawa ang Pilipino” dagdag na pahayag nito sa kanyang naging talumpati sa oath-taking ng mga lokal na opisyal sa kanyang hometown sa Davao City.

Sa talumpati pa rin ng Pangulo, mayroon ding itong mga pahayag sa ibang negosyo na nagsasamantala sa mga Filipino.

Matatandaang, Mayo ng taong 2020 nang magpalabas ng cease and desist order ang National Telecommunications Commission (NTC) laban sa ABS-CBN na iniuutos ang pagtigil ng operasyon ng kompanya matapos mapaso ang prangkisa nito.

Sa direktiba, inutusan ng NTC ang network na itigil ang kanilang mga TV at radio operation habang wala pa itong karampatang prangkisa.

Hulyo ng taong 2020 pa rin nang ibasura ng Kamara ang aplikasyon ng ABS-CBN para sa bagong prangkisa nito.

Nasa 70 mambabatas ang bumoto pabor sa resolusyon ng binuong technical working group na nirekomendang huwag bigyan ng prangkisa ang ABS-CBN, kumpara sa 11 na tumutol dito.

Samantala, dalawa ang nag-inhibit at isa ang nag-abstain.

Nagmula ang mga mambabatas sa House committee on legislative franchises at mga lider ng Kamara na ex-officio members.

Labing-dalawang beses humarap sa Kamara ang mga opisyal ng ABS-CBN para manawagan ng bagong prangkisa na makapag-operate alang-alang sa 11,000 manggagawang nakadepende sa network. Kris Jose

MANILA, Philippines – Kaisa ang Philippines (CBCP) – Episcopal Office on Women sa makasaysayang araw para sa Estados Unidos matapos na baliktarin ng US Supreme Court ang naunang desisyon ng Korte Suprema sa Roe v. Wade noong 1973 na nagpapahintulot ng aborsyon sa nasabing bansa.

Ang naging desisyon ng US Supreme Court na ipagbawal na ang aborsyon o ang pagpapalaglag ng sanggol sa sinapupunan sa Amerika ay isang magandang balita ayon kay Borongan Bishop Crispin Varquez na siyang chairman ng tanggapan.

Inihayag ng Obispo na makabuluhan ang desisyon ng Korte Suprema ng Estados Unidos na naliwanagan ng Banal na Espiritu lalo’t ginugunita ng Simbahang Katolika sa Roma ang World Meeting of Families sa pangunguna ng Santo Papa Francisco.

“Good news ang nangyayari sa USA Supreme Court to ban abortion. A decision enlightened by the Holy Spirit. It was timely when Rome celebrated World Meeting of Families led by Pope Francis.” pahayag ni Bishop Varquez sa Radio Veritas.

Umaasa naman si Bishop Varquez na matutunan ng mga kababaihang nagdusa dahil sa pagpapalaglag ng kanilang supling na patawarin ang sarili kasabay ng paghingi ng kapatawaran sa Panginoon at sa kanilang mga inosenteng sanggol.

“They need to ask forgiveness from God, from their aborted babies and learn to forgive themselves as well.” Dagdag pa ni Bishop Varquez.

Unang inihayag ng U.S. Conference of Catholic Bishops (USCCB) na sa loob ng mahabang panahon ay maituturing na naabuso ng mga mamamayan ng Estados Unidos ang ipinagkaloob ng Panginoon na kalayaang makapagdesisyon. Jocelyn Tabangcura-Domenden

MAGUINDANAO- PATAY ang isang barangay kagawad matapos pagbabarilin ng riding in tandem suspek habang ang una ay naglalakad nitong Lunes sa lalawigan ito.

Kinilala ang biktimang si Barangay Kagawad Macmod Masiangal, kasapi ng MILF Inner Guard Brigade at residente ng Barangay Labungan Datu Odin Sinsuat Maguindanao.

Batay sa report ng Datu Odin Police Station, naglalakad ang biktima patungong barangay hall ng bigla na lamang siyang pagbabarilin ng mga suspek gamit ang .45 kalibre na baril.

Tinamaan ang biktima sa likod na tumagos sa dibdib na naging sanhi ng agaran nitong kamatayan.

Matapos ang krimen mabilis na tumakas ang mga suspek patungo sa direksyon ng Cotabato City.

Patuloy ang ginagawang imbestigasyon ng pulisya sa nasabing krimen./Mary Anne Sapico

MANILA, Philippines – Arestado ang isang lalaking pinaghahanap dahil sa kasong panggagahasa at pangwalo sa most wanted persons ng Northern Police District, Lunes ng umaga sa Malabon City.

Bandang 8:30 a.m. ng Hunyo 27 nang madakip si Charles Benedict Reyes y Lazaro, 22, istambay, ng 35 Mallari St, Brgy., Agustin, Malabon City.

Dinakma si Reyes sa bisa ng warrant na inisyu ng Regional Trial Court Branch 293, Malabon City para sa kasong Rape.

Walang inirekomendang pyansa ang korte para sa pansamantalang kalayaan ng dinakip. Merly Iral